11 މެއި 2021 - 21:30
ޝައްވާލް މަހުގެ ހަނދު މިރޭ ނުފެނުމުން މާދަމާ އަކީ މި އަހަރުގެ ފަހު ރޯދަ ކަމުގައި އިސްލާމިކް މިނިސްޓްރީން ހަމަޖައްސައިފި އެވެ.
ހަނދު ސާބިތުކުރުމަށް ބޭއްވި ރަސްމީ ބައްދަލުވުމުގައި މިނިސްޓަރު ޑރ. އަހުމަދު ޒާހިރު ވިދާޅުވީ މިއަދު އިރުއޮއްސުނު ވަގުތު ރާއްޖޭގެ އެއްވެސް ރަށަކަށް އަދި އިސްލާމީ އެއްވެސް ގައުމަކަށް ވެސް ޝައްވާލް މަހުގެ ހަނދު ފެންމަތިނުވާކަން އިތުބާރު ހުރި ފަލަކީ ހިސާބުން ކަށަވަރުވާ ކަމަށެވެ.
އެހެންވެ މާދަމާއަކީ މި ރޯދަ މަހުގެ ފަހު ދުވަސްކަމަށް ހަމަޖައްސައި އަންނަ ބުރާސްފަތި ދުވަހަކީ ފިތުރު ދުވަސް ކަމަށް ކަނޑައަޅާފައި ވެ އެވެ.
"މާތްﷲ އަޅަމެން ހިފި ރޯދަ އާއި މި ބަރަކާތްތެރި މައްސަރުގައި ކުރި ހެޔޮ އަމަލުތައް ގަބޫލުކުރައްވައި އަޅަމެންގެ ފާފަ ފުއްސަވާށި. އަދި ރަމަޟާން މަހަށްފަހު ވެސް ހެޔޮ އަމަލުކުރުން މަތީ ދެމި ތިބުމުގެ ހެޔޮ ތައުފީގު އަޅަމެންނަށް ދެއްވާށި،" ހަނދު ސާބިތުކުރުމަށް ބޭއްވި ބައްދަލުވުމުގައި އޭނާ ވިދާޅުވި އެވެ.
ކޮވިޑު-19 ގެ ހާލަތު ގޯސްވުމުން މިނިސްޓްރީން ވަނީ މާލެ ސަރަހައްދުގައި ބޮޑު ޖަމާއަތުގައި އީދު ނަމާދުނުކުރަން ނިންމައިފަ އެވެ. އެކަމަކު ރަށްރަށުގައި، މިނިސްޓްރީގެ އުސޫލާ އެއްގޮތަށް ބޮޑު ޖަމާއަތުގައި އީދު ނަމާދުކުރުމުގެ ހުއްދަ ދެވޭނެ އެވެ.