18 ނޮވެމްބަރ 2016 - 17:10
ނިއު ދިއްލީ (ނޮވެމްބަރު 18) - ހޮސްޕިޓަލުގައި އޮވެ ޑައިލިސިސް ހަދަމުންދާ ކަމަށާއި ކިޑްނީ ބަދަލު ކުރުމަށް ޓެސްޓްތައް ހަދަމުން ކަމަށް ވިދާޅުވެ އިންޑިއާގެ ޚާރިޖީ ވަޒީރު ސުޝްމާ ސްވަރާޖް އަންގާރަ ދުވަހު ޓްވީޓް ކުރެއްވުމާ ގުޅިގެން އެތައް ބަޔަކު އެކަމަނާ އަށް ކިޑްނީ ހަދިޔާ ކުރަން ހުށަހަޅަން ފަށައިފި އެވެ.
ސޯޝަލް މީޑިއާ މެދުވެރިކޮށް ބައެއް މީހުން ވަނީ އެ މީހުންގެ އަމިއްލަ ކިޑްނީ ސްވަރާޖަށް ދޭން ބޭނުންވާ ކަމަށް ބުނެ އެ މީހުންނާ ގުޅޭނެ ފޯނު ނަމްބަރާ އެކު ހުށަހަޅައިފަ އެވެ. ބައެއް މީހުން ބުނި ގޮތުގައި އެ މީހުންގެ އެއް ކިޑްނީ ހަދިޔާކޮށްގެން ވެސް ސްވަރާޖުގެ ޚިދުމަތް ގައުމަށް މާބޮޑަށް މުހިންމުވެ އެވެ.
ކިޑްނީ ހަދިޔާ ކުރަން ހުށަހެޅި ޖައްމޫގެ މީހަކު ބުނީ ގައުމުން ބޭރުގައި ހާލުގައި ޖެހިފައިވާ އެތައް ބަޔަކަށް ސްވަރާޖް އެހީތެރިވެދީފައިވާ ކަމަށެވެ. އަދި އިންޑިއާ މީހުންނަށް ޚިދުމަތް ކޮށްދިނުމުގެ ގޮތުން އިންޑިއާގެ އެހެން މިނިސްޓްރީތައް އާދިއްތަ ދުވަހު ބަންދު ނަމަވެސް އެ ކަމަނާގެ މިނިސްޓްރީ އާދިއްތަ ދުވަހު ހުޅުވާ ކަމަށް އޭނާ ބުންޏެވެ.
ކިޑްނީ ހަދިޔާ ކުރަން ހުށަހެޅި ފަރާތްތަކަށް ސްވަރާޖް ވަނީ ޝުކުރު އަދާ ކުރައްވައިފަ އެވެ. ނަމަވެސް ކިޑްނީ ދޭން ހުށަހެޅި ފަރާތްތަކުގެ ހުށަހެޅުން ގަބޫލް ކުރި ކަމަށް ވިދާޅުވެފައެއް ނުވެ އެވެ.
އުމުރުން 64 އަހަރުގެ މިނިސްޓަރު މި މަހު ކުރީކޮޅު ވަނީ ނިއު ދިއްލީގެ ހޮސްޕިޓަލެއްގައި އެޑްމިޓްކޮށްފަ އެވެ. އެކަމަނާއަކީ ހަކުރު ބަލި ހުންނަ މީހެކެވެ.
ހޮސްޕިޓަލުގެ އޮފިޝަލުން ޕްރެސް ޓްރަސްޓް އޮފް އިންޑިއާ އަށް ބުނީ ހަކުރު ބަލީގެ ސަބަބުން ސުވަރާޖުގެ ކިޑްނީގެ މަސައްކަތްތަކަށް އަސަރުކޮށްފައިވާ ކަމަށެވެ.
ސުވަރާޖަކީ ބޮޑު ވަޒީރު ނަރެންދުރަ މޯދީގެ ސަރުކާރުގައި އެންމެ ބުރަކޮށް މަސައްކަތް ކުރައްވާ އަދި އެންމެ މަޝްހޫރު އެއް ވަޒީރެވެ. އެކަމަނާ އަކީ ޓްވީޓާގައި ވެސް ވަރަށް އެކްޓިވް ބޭކަނބަލެކެވެ. ސްވަރާޖަށް ކުރައްވާ ޓްވީޓްތަކަށް ޖަވާބު ދެއްވާ ރައްޔިތުންނަށް ދިމާވާ މައްސަލަތައް ހައްލު ކޮށްދެއްވައިފައިވެ އެވެ. މި މަހު ކުރީކޮޅު ވަނީ އިންޑިއާގެ މީހަކާ ކައިވެނި ކުރަން ޕާކިސްތާނުގެ ފިރިހެނަކަށާއި އޭނާގެ އާއިލާ އަށް ވިސާ ލިބުމުގައި ދަތިވި މައްސަލަ ހައްލު ކޮށްދެއްވައިފައެވެ.