16 މެއި 2021 - 16:16
ރާއްޖޭގައި ކޮވިޑް-19 އަށް ޕޮޒިޓިވްވާ މީހުންގެ އަދަދު ކޮންޓްރޯލުން ނެއްޓި އިތުރުވަމުން ދާއިރު، ފަރުވާ ދިނުމަށް އެކަށީގެންވާ ވަރަށް ސިއްހީ ހިދުމަތްތެރިންގެ ނެތުމުން އަމިއްލަ ކްލިނިކްތަކާއި ހޮސްޕިޓަލްތަކުގެ އެހީ އަށް ސަރުކާރުން އެދެފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ސިއްހީ ހިދުމަތްދޭ އަމިއްލަ ތަންތަނާ ބައްދަލުކޮށް، އެ ތަންތަނުގެ ނަރުހުންނާއި ޑޮކްޓަރުންނާއި އެހެން ހިދުމަތްތެރިން، ކޮވިޑްގެ ބަލި މީހުންނަށް ފަރުވާ ދިނުމަށް ދޫކޮށްދިނުމަށް އެދިފަ އެވެ.
އެޗްޕީއޭގެ ފަރާތުން ވާހަކަ ދެއްކެވި ހެލްތު މިނިސްޓްރީގެ ޑެޕިއުޓީ ޑިރެކްޓަރު ޖެނެރަލް ތަސްލީމާ އުސްމާން (ތަހޭ) ވިދާޅުވި ގޮތުގައި ކޮވިޑްގެ ބަލި މީހުން އިތުރުވާ ވަރަކަށް، ފަރުވާ ދޭ ސިއްހީ ހިދުމަތްތެރިންގެ ދަތިކަން ވަރަށް ބޮޑަށް ކުރިމަތިވެ އެވެ. ސިއްހީ ހިދުމަތްތެރިންނަކީ އެކަމާ ގުޅޭ ތައުލީމާއި ތަމްރީނާ އެކު، ބިނާކޮށްފައި ތިބި ބައެއް ކަމުން، އެފަދަ މީހުން ހޯދަން އުނދަގޫ ކަމަށް އޭނާ ވިދާޅުވި އެވެ.
"ހިއުމަން ރިސޯސްގެ ދަތިކަން ވަރަށް ބޮޑު. އެހެންވެ، އަޅުގަނޑުމެން ޕްރައިވެޓް ތަންތަނުގައި އެދިފައިވާނީ މީހުން ދޫކޮށްދިނުމަށް،" ތަހޭ ވިދާޅުވި އެވެ.
ކޮވިޑްގެ ބަލި މީހުންނަށް ފަރުވާ ދިނުމަށް މާލޭ ސަރަހައްދުގައި ހަދާފައިވާ ކޮވިޑް ފެސިލިޓީތަކުގަ އާއި ސަރުކާރު ހޮސްޕިޓަލްތަކަށް ވެސް މިހާރު ވަރަށް ބާރުބޮޑެވެ. އެޗްޕީއޭ އިން ބުނީ ފަރުވާ ދިނުމަށް އެނދާއި ވަސީލަތްތައް ހުރި ނަމަވެސް ހިދުމަތް ދޭނެ ސިއްހީ ހިދުމަތްތެރިން ނެތް ނަމަ، ކަންކަން މެނޭޖްކުރަން އުނދަގޫވާނެ ކަމަށެވެ.
ޕްރައިވެޓް ކްލިނިކްތަކާއި ހޮސްޕިޓަލްތަކުގެ އެހީއަށް ސަރުކާރުން އެދުނު އިރު، އެ ފަދަ ގިނަ ތަންތަނަށް ވެސް މީހުންގެ ދަތިކަން ވަނީ ކުރިމަތިވެފަ އެވެ. މާލޭގައި ހަލުއިކަމާ އެކު ބަލި ފެތުރެމުންދާއިރު، ކޮވިޑްގެ މީހަކާ ކޮންޓެކްޓް ވެގެން ނުވަތަ ބަލި ޖެހިގެން ކަރަންޓީނުގައި ގިނަ ބަޔަކު އަބަދުވެސް ތިބެ އެވެ.
ސަރުކާރުގެ އެދުމަށް، އަމިއްލަ ކްލިނިކްތަކާއި ހޮސްޕިޓަލްތަކުން ދިން ޖަވާބެއް އަދި ސާފެއް ނުވެ އެވެ.
ރާއްޖޭގައި މިހާރު ކޮންމެ ދުވަހަކު ވެސް، އެވްރެޖްކޮށް 800 އަށް ވުރެ ގިނަ މީހުން ކޮވިޑަށް ޕޮޒިޓިވްވެ އެވެ. އަދި ކޮވިޑްގެ އެކްޓިވް ކޭސްތައް ވަނީ 15،000 އިން މައްޗަށް ގޮސްފަ އެވެ. އެހެންވެ ކޮވިޑް ފެސިލިޓީތައް ފުރި، އިތުރަށް އެނދު ބަހައްޓައިގެން ވެސް އަންނަނީ ހިދުމަތް ދެމުންނެވެ. އެއާ އެކު އެކަށީގެންވާ ސިއްހީ ފަރުވާ ނުލިބޭ ކަމާއި ނަގާ ސާމްޕަލްތަކުގެ ނަތީޖާ ލަސްވުމާއި އެޗްޕީއޭ އިން ފޯނު ނުނަގާ ކަމުގެ ޝަކުވާ ވަނީ ބޮޑުވެފަ އެވެ.
އެކަމަކު މިހާރު މާލޭގައި މީހުން ބަލިވަނީ، އެތަންތަނަށް ވެސް ނުކަތާ ވަރަށެވެ. މާލޭގެ އިތުރުން ރާއްޖޭގެ 50 ރަށަކަށް ކޮވިޑް ފެތުރިި ގިނަ ބަޔަކު ބަލިވާއިރު، އެ އެންމެންގެ ސާމްޕަލް ނަގައި ޓެސްޓު ހަދަން ތިބެނީ މަދު ބައެކެވެ. ނަތީޖާ ނުލިބި ގިނަ ދުވަސްތަކެއް ވަނީ ވެސް ހިދުމަތް ދޭން ތިބޭ މީހުންގެ އަދަދު މަތިވެ، އެ މީހުންގެ މަސައްކަތުގެ ބުރަ ބޮޑުވުމުންނެވެ.
އެޗްޕީއޭ އިން ބުނީ އެތަނުގެ ކޯލް ސެންޓަރަށް، ބައެއް ދުވަސް ދުވަހު 7،000-8،000 ފޯނު ކޯލް އަންނަ ކަަމަށެވެ. ބައެއް ފަހަރު ގިނަ ކޯލްތަކަށް ޖަވާބު ނުދެވޭއިރު، ހިދުމަތް ދޭން ތިބެނީ މަދު ބައެއްކަން އެތަނުން ފާހަގަ ކުރި އެވެ.