03 ޖޫން 2021 - 13:00
ކޮލަމްބޯ (ޖޫން 3) - ލަންކާގެ ބޭރުން ކަނޑުގެ ސަރަހައްދުގައި ރޯވެ އަނދަމުން ދިޔަ ކެމިކަލް ބަރުކޮށްފައިވާ ބޯޓު ފެތުމުން ތިމާވެށީގެ ބޮޑު ނުރައްކަލެއް ކުރިމަތިވެދާނެކަމުގެ ބިރު ބޮޑު ވެއްޖެ އެވެ.
ސިންގަޕޫރުގައި ރަޖިސްޓްރީކޮށްފައިވާ އެކްސް-ޕްރެސް ޕާލް ބޯޓުގައި ރޯވެ އަނދަމުންދާތާ ދެ ހަފުތާއަށް ވުރެ ގިނަ ދުވަސްވެއްޖެ އެވެ. އަލިފާން ނިއްވާލާފައި ވަނީ ލަންކާ އާއި އިންޑިއާގެ ކަނޑުގެ ސިފައިން ގުޅިގެން ކުރި މަސައްކަތުންނެވެ. އަލިފާން ނިއްވާލި ނަމަވެސް، ކޮލަމްބޯ ބަނދަރުގެ ބޭރުގައި އޮތް ބޯޓުގެ އެއްބައި ފެތި ޓޭންކްތަކުން ކަނޑަށް ތެޔޮ ބޭރުވުމުގެ ނުރައްކާ ވަނީ ބޮޑުވެފަ އެވެ.
"ބޯޓު އެއްކޮށް ފެތުމުގެ ކުރިން ފުން ކަނޑަށް ނެރެވޭތޯ ދަނީ މަސައްކަތް ކުރަމުން. އޭރުން މެރިން ޕޮލިއުޝަނުން ކަނޑުގެ ދިރުންތަކަށް ލިބޭ ގެއްލުން ތަންކޮޅެއް ކުޑަކުރެވޭނެ،" ލަންކާ ކަނޑުގެ ސިފައިންގެ ތަރުޖަމާން ކެޕްޓަން އިންދިކާ ސިލްވާ ވިދާޅުވި އެވެ.
ތިމާވެށީގެ ތަޖްރިބާކާރެއް ކަމަށްވާ ޑރ. އަޖަންތާ ޕެރޭރާ ވިދާޅުވީ ބޯޓު އެއްކޮށް ފެތިއްޖެ ނަމަ ތިމާވެށީގެ ހީވެސް ނުކުރާ ވަރުގެ ބޮޑު ނުރައްކަލަކާ ކުރިވާނެ ކަމަށެވެ.
"ނުރައްކާ ހުރިހާ ކެމިކަލަކާ އެކު، ނައިޓްރިކް އެސިޑް އަދި ބޯޓުގައި ހުރި ތެޔޮ ބޭރު ވެއްޖެ ނަމަ އެ ސަރަހައްދުގެ ކަނޑުގެ ދިރުންތައް އެއްކޮށް ނެތިދާނެ،" އޭނާ ވިދާޅުވި އެވެ.
ލަންކާގައި އެންމެ ރީތި ގޮނޑުދޮށްތައް އޮންނަ އެއް ސަރަހައްދު ކަމަށްވާ ނިގަމްބޯ ސިޓީގެ ބައެއް ސަރަހައްދުތަކުން ތެލުގެ އަސަރު ފެންނަތާ މިހާރު ދުވަސްކޮޅެއް ވެއްޖެ އެވެ.
ފިޝަރީޒް މިނިސްޓްރީން ބުނީ ނިގަމްބޯ ފަޅުތެރެ ހިމާޔަތް ކުރަން ޚާއްސަ ފިޔަވަޅުތަކެއް އަޅާފައިވާ ކަމަށެވެ. އަދި ޕަނަދުރާ އިން ނިގަންބޯ ހިމެނޭ ސަރަހައްދުގައި މަސްވެރިކަން ކުރުން މި ވަގުތަށް މަނާކޮށްފައިވާ ކަމަށް ވަނީ ބުނެފަ އެވެ.
އޮފިޝަލުން ބުނެފައި ވަނީ ބޯޓުގައި ރޯވެފައި ވަނީ ނައިޓްރިކް އެސިޑް ލީކުވުމުގެ ސަބަބުން ކަމަށެވެ. ބޯޓުގައި ހުރި 25 ޓަނުގެ އެސިޑް ލީކުވާކަން މެއި 11 ވަނަ ދުވަހުން ފެށިގެން ބޯޓުގެ ފަޅުވެރިންނަށް އެނގޭ ކަމަށް ވެސް ބުނެފައިވެ އެވެ. ބޯޓުގެ ކެޕްޓަނާއި ޗީފް އިންޖިނޭރާ ދެކޮޅަށް ވަނީ ފުލުހުންނަށް މައްސަލަ ވެސް ހުށަހަޅައިފަ އެވެ. ލަންކާ ފުލުހުން އަންގާރަ ދުވަހު ބުނެފައި ވަނީ ބޯޓުގެ ކެޕްޓަނާއި އިންޖިނޭރަށް 14 ގަޑިއިރު ވަންދެން ސުވާލުކޮށްފައިވާ ކަމަށެވެ. ކެޕްޓަނާއި ޗީފް އިންޖިނޭރު އަދި އެހެން އިންޖިނޭރަކު ފުރުން މަނާކޮށް ލަންކާގެ ކޯޓަކުން މިހާރު ވަނީ އަމުރު ނެރެފަ އެވެ. ބޯޓުގައި ތިބި ހުރިހާ ފަޅުވެރިން ސަލާމަތްކުރީ މިިދިޔަ ހަފުތާގަ އެވެ.
އިންޑިއާގެ ހަޒިރާ ބަނދަރުން 186 މީޓަރު (610 ފޫޓު) ބޯޓު މެއި 15 ވަނަ ދުވަހު ފުރީ 1،486 ކޮންޓެއިނާއާ އެކު އެވެ. ބޯޓުގައި ހުރި މުދަލުގެ ތެރޭގައި ނައިޓްރިކް އެސިޑުގެ އިތުރުން ކެމިކަލްގެ އެހެން ބާވަތްތަކާއި ކޮސްމެޓިކްސް ވެސް ހިމެނެ އެވެ.