11 ޖޫން 2021 - 23:38
އަލިފުށީ ދާއިރާގެ މެންބަރު އަދި ޕާލިމެންޓަރީ ގްރޫޕުގެ ސެކްރެޓަރީ ޖެނެރަލް މުހައްމަދު ރަޝީދު ހުސެއިން (ބިގޭ) އެމްޑީޕީން ވަކިކުރަން ޖެހޭ ކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހަންމަދު ނަޝީދުގެ ފޭކް ޓުވިޓާ އެކައުންޓެއް ކަމަށް ބުނާ އެކައުންޓަކުން ބުނެފި އެވެ.
ބިގޭ ޕާޓީން ވަކިކުރަން އުޅޭ ކަމުގެ އިޝާރާތެއް ލިބިފައި ވަނީ ނަޝީދަށް ދިން ޓެރަރިސްޓް ހަމަލާގެ އިންކުއަރީ އަށް ހުރަސް އެޅުމަށް، ރައީސް އިބްރާހިމް މުހަންމަދު ސޯލިހު އިސްވެ ހުންނަވައިގެން ބިގޭ މެދުވެރި ކުރައްވައި، މަޖިލިސް މެންބަރުންނަށް ނުފޫޒު ފޯރުއްވަން އުޅުއްވާ ކަމަށް ނަޝީދާއި އެ މަނިކުފާނުގެ އަރިސް ބޭފުޅުން ތުހުމަތު ކުރެއްވުމާ ގުޅިގެންނެވެ.
އެ މައްސަލާގައި ބިގޭއާ ދެކޮޅަށް ނަޝީދު ވެސް ޓުވިޓާގައި ވާހަކަ ދައްކަވައި، ހޫނު ރައްދުތަކެއް ދެއްވާފައި ވަނިކޮށް މިރޭ "އެލެކްސް އަހުމަދު"ގެ ޓުވިޓާ އެކައުންޓުން ކުރި ޓުވިޓެއްގައި ބުނީ ފިޔަވަޅު އަޅާ ކޮމިޓީ މެންބަރުންގެ ބޭނުމަކީ ޕާޓީގެ އަސާސީ ގަވައިދާ ހިލާފުވާ ފަރާތްތަކަށް ފިޔަވަޅު އަޅައި އެފަދަ މީހުން ވަކިކުރުން ކަމަށެވެ. އެލެކްސް އަހުމަދުގެ ނަމުގައި ހިންގާ ޓްވިޓާ އެކައުންޓަކީ ނަޝީދުގެ އެކައުންޓެއް ކަމަށް ވެ އެވެ.
ޖުމްހޫރީ ޕާޓީގެ މެންބަރެއްގެ ހުށަހެޅުމަށް އެމްޑީޕީ މެންބަރުން ވޯޓު ދިނީ ބިގޭ ލޮބީ ކުރެއްވުމުން ކަމަށާއި އެއީ ޕާޓީގެ އަސާސީ ގަވައިދާ ހިލާފު ކަމެއް ކަމަށް އެ އެކައުންޓުން ބުންޏެވެ.
އެ ފާހަގަ ކުރެއްވީ ޑިފެންސް މިނިސްޓްރީގެ ނައިބަކަށް ފިޔަވަޅު އެޅުމަށް ނަޝީދު ރައްޔިތުން މަޖިލީހުގެ އިމްތިޔާޒް އަދި ސުލޫކް ކޮމިޓީއަށް ހުށަހަޅުއްވާފައި ވަނިކޮށް، އެ މައްސަލަ ބޭރު ކުރަން ޖޭޕީ އަށް ނިސްބަތްވެވަޑައިގަންނަވާ ދަނގެތި ދާއިރާގެ މެންބަރު މުހައްމަދު ނާޒިމް ހުށަހެޅުއްވުމުން އެމްޑީޕީގެ ހަތަރު މެންބަރެއްގެ ވޯޓާ އެކު އެކަން ފާސްވި މައްސަލަ އެވެ.
ނަޝީދާއި އެމަނިކުފާނުގެ އަރިސް މެންބަރުން ތުހުމަތު ކުރައްވާ ގޮތުގައި އެ މައްސަލަ ބޭރު ކުރީ ރައީސް އަންގަވައިގެން ބިގޭ މެދުވެރި ކުރައްވައި އެމްޑީޕީ މެންބަރުންނަށް ލޮބީ ކޮށްގެންނެވެ.
އެކަމަކު އެ ތުހުމަތުތަކަށް އިންކާރު ކުރައްވައި ބިގޭ ރާއްޖެ ޓީވީގައި މިއަދު ވިދާޅުވި ގޮތުގައި އެފަދަ ކަމެއް ކުރައްވާކަށް ރައީސް ނާންގަވަ އެވެ.
ބިގޭ ވަނީ އެމްޑީޕީ ތެރޭ އުފެދިފައިވާ ދެބައިވުންތަކާ ގުޅޭ ގޮތުން ވެސް ވާހަކަ ދައްކަވައިފަ އެވެ. އެގޮތުން މަޖިލީހާއި ސަރުކާރާ ދެމެދު މައްސަލަ ޖެހިފައިވާ ކަމަށާއި ސަރުކާރަށް މަޖިލީހުން ޖެއްސުން ކުރާ ކަމަށް ބިގޭ ވިދާޅުވި އެވެ.
ނަމަވެސް އެމްޑީޕީގެ ޗެއާޕާސަން ހަސަން ލަތީފް ވިދާޅުވި ގޮތުގައި އެ ޕާޓީ ދެބައިވީ ސަރުކާރުން ނަޝީދު ނުލައި ސަރުކާރު ހިންގަން އުޅުމުންނެވެ.