27 ޖޫން 2021 - 08:25
ކުއްލިއަކަށް ބޮޑު މަގުބޫލުކަމެއް ހޯދާފައިވާ އޯޑިއޯ ޗެޓް އެޕްލިކޭޝަން "ކްލަބްހައުސް" އިން އެ ބޭނުންކުރާ މީހުންގެ ޒާތީ މައުލޫމާތު އެއްކުރަނީ އެކަށީގެންވާ ވަރަށް ވުރެ ގިނައިން ކަމަށާއި އެ އެޕްލިކޭޝަންގެ ބޭރުން އެހެން ބައެއް އެޕްލިކޭޝަންތަކުން ވެސް މައުލޫމާތު ވެސް ނަގާ ކަމަށް އިންޑިއާގެ އިންޓަނެޓް ފްރީޑަމް ފައުންޑޭޝަން (އައިއެފްއެފް) އިން ބުނެފި އެވެ.
އެކި މައުލޫމާތަކުގައި ވާހަކަ ދެއްކުމަށް ރޫމްތައް ހަދައި އެތައް މިލިއަން ބަޔަކު މިހާރު ބޭނުންކުރަމުން އަންނަ ކްލަބްހައުސް އިން އެ ބޭނުންކުރާ މީހުންގެ އެޑްރެހާއި ކޮންޓެކްޓް ޑިޓެއިލްތަކާއި ފޯނު ނަންބަރާއި އައިޕީ އެޑްރެސް އާއި އޮޕަރޭޓިން ސިސްޓަމްގެ މައުލޫމާތާއި އޭގައި ހޭދަކުރާ ވަގުތާއި އެޕްގެ ތެރެއިން މުއާމަލާތުކުރާ މީހުންނަކީ ކޮބައިތޯ ވެސް ބަލާ ކަމަށް އައިއެފްއެފް އިން ބުންޏެވެ.
އައިއެފްއެފް އިން ބުނީ ޑޭޓާ މިނިމައިޒޭޝަން ނުވަތަ އެންމެ މަދު މިންވަރަކަށް ޑޭޓާ ކަލެކްޓްކުރަން އޮންނަ އުސޫލާ ކްލަބްހައުސް އިން ހިލާފުވެފައިވާ ކަމަށެވެ. އައިއެފްއެފްގެ ބްލޮގް ޕޯސްޓެއްގައި ބުނެފައިވާ ގޮތުގައި ކްލަބްހައުސް އިން ދަނީ ބޭނުންވާ ވަރަށް ވުރެ މާ ގިނައިން، އެ ބޭނުންކުރާ މީހުންގެ ޒާތީ މައުލޫމާތު ނަގަމުންނެވެ.
އެޕް ބޭނުންކުރާ މީހުންގެ އެންމެ އަސާސީ މައުލޫމާތުގެ އިތުރުން އެތައް ޑޭޓާއެއް ނަގައި އަދި ކްލަބްހައުސް އަށް އެހެން އެޕެއްގެ އެކްސެސް ދީފައިވާ ނަމަ އެ އެޕަކުން ވެސް މައުލޫމާތު ނަގާ ކަމަށާއި އެޕްތަކަށް އެކްސެސް ދެވިފައި ހުންނަ ގޮތަކުން، ފޯނުގެ ހުރިހާ ކޮންޓެކްޓް ނަންބަރުތަކެއް ވެސް ކްލަބްހައުސް އަށް ލިބޭ ކަމަށް އައިއެފްއެފް އިން ބުންޏެވެ.
އައިއެފްއެފް އިން ބުނީ މިގޮތަށް ނަގާ ޑޭޓާ ކްލަބްހައުސް އިން އެހެން މީހުންނާ ހިއްސާކުރާ ކަމަށާއި މި މައުލޫމާތު ބޭނުންކޮށްގެން މާލީ މަންފާ ނުހޯދާ ކަމުގެ އެއްވެސް ޔަގީންކަމެއް ނެތް ކަމަށެވެ.
ކްލަބްހައުސްގެ މަގުބޫލުކަން މުޅި ދުނިޔޭގައި ވެސް ވަނީ ވަރަށް ބޮޑުވެފަ އެވެ. މި މަގުބޫލުކަމާ އެކު ކްލަބްހައުސް އިން އެޕް އިތުރަށް ތަރައްގީކުރުމުގެ މަސައްކަތް ވެސް އަންނަނީ ކުރަމުންނެވެ. އެންމެ ފަހުގެ ރިޕޯޓްތައް ބުނާ ގޮތުން މިހާރު ތައްޔާރުވަމުން އަންނަނީ ކްލަބްހައުސްގައި މެސެޖުކުރެވޭ ގޮތް ހަދާށެވެ. މިގޮތުން ތައާރަފްކުރާނީ ޑީއެމް ފީޗާ އެވެ.