05 ޖުލައި 2021 - 12:47
ސެން ސެބޭސްޓިއަން، ސްޕެއިން (ޖުލައި 5) - ޔޫރޯގައި ސްވިޑެންގެ ޓީމުގައި އެލެގްޒެންޑާ އީސާކް ދެއްކި މޮޅު ކުޅުމާ އެކު، ބޮޑެތި ކްލަބުތަކުގެ ލޯތައް އޭނާ އަށް އަމާޒުވުމުން ރެއާލް ސޮސިއެޑާޑުން އޭނާގެ މުސާރަ ބޮޑުކޮށް އާ އެއްބަސްވުމުގައި ސޮއިކުރުވައިފި އެވެ.
ސޮސިއެޑާޑަށް 2019 ގައި ބަދަލުވެ، އެ ކްލަބާ އެކު އީސާކް ސޮއިކުރީ ފަސް އަހަރުގެ އެއްބަސްވުމެއްގަ އެވެ. އޭރު 2023 އަށް ހަމަވާން އޮތް ކޮންޓްރެކްޓް އާކޮށް ސޮސިއެޑާޑުން ވަނީ އީސާކްގެ މުސާރަ ބޮޑު ކޮށްފަ އެވެ. އޭނާ އަށް ސޮސިއެޑާޑުން ކުރިން ދެނީ ހަފުތާއަކު 22،500 ޑޮލަރެވެ. މިހާރު އާ ކޮންޓްރެކްޓުގެ ދަށުން ދޭ މުސާރަ ހާމަކޮށްފައެއް ނުވެ އެވެ. މިހާރު އޮތް ކޮންޓްރެކްޓް ހަމަވާނީ ޖޫން 2026 ގަ އެވެ.
ސޮސިއެޑާޑުގެ ޓީމަށް އީސާކުގެ މުހިންމުކަން ހާމަކޮށް ދިނުމުގެ ގޮތުން، ކޮންޓްރެކްޓް އާ ކުރުމުގެ ވާހަކަތަކަށް، އެ ކްލަބުގެ ރައީސް ޔޯކިން އެޕިރޭބޭ ވަނީ ސްޕޯޓިން ޑައިރެކްޓާ ރޮބާޓޯ އޮލާބޭއާ އެކު ސްވިޑެންގެ ވެރިރަށް ސްޓޮކްހޯމް އަށް ވަޑައިގެންފަ އެވެ.
"ލަ ރެއާލް (ސޮސިއެޑާޑް) އާ އެކު ކުރިއަށްދާން ލިބުމުން އަހަރެން ވަރަށް ހިތްހަމަ ޖެހޭ،" ކޮންޓްރެކްޓް އާ ކުރުމަށް ފަހު ސޮސިއެޑާޑްގެ ވެބްސައިޓަށް ދިން އިންޓަވިއުގައި އީސާކް، 21، ބުންޏެވެ.
"މިއީ ކާމިޔާބު ކްލަބެއް. މި ކްލަބުގެ ސަޕޯޓަރުން އަހަރެން ދެކެ ލޯބިވާ ކަމުގެ އިހްސާސް އަހަންނަށް ކުރެވޭ."
ސޮސިއެޑާޑްއާ އެކު ހޭދަކުރި މިދިޔަ ދެ ސީޒަންގައި އީސާކް ވަނީ 89 މެޗު ކުޅެ 33 ގޯލް ޖަހައިފަ އެވެ.