09 އޯގަސްޓް 2021 - 16:49
ދެކުނު އޭޝިއާގެ ފުޓްބޯޅަ މުބާރާތް، ސާފް ޗެމްޕިއަންޝިޕު ރާއްޖޭގައިި ބާއްވަން، ސަރަހައްދީ ފުޓްބޯޅަ ޖަމްއިއްޔާއިން ނިންމައިފި އެވެ.
ކުރިން ބަންގްލަދޭޝްގައި ބާއްވާ ގޮތަށް ހަމަޖެހުނު މުބާރާތް، އެ ގައުމުގައި ނުބޭއްވޭނެކަން އިއުލާން ކުރުމުން، ސާފުން ނިންމީ މުބާރާތް ބޭއްވުމަށް ބިޑަށް ހުޅުވާލުމަށެވެ. މިދިޔަ މަހު 31 ވަނަ ދުވަހު ހުށަހަޅަން ޖެހޭ ބިޑަށް ކުރިމަތިލީ ރާއްޖޭގެ އިތުރުން ނޭޕާލެވެ. އިންޑިއާއިން ވެސް ޝައުގުވެރިކަން ފާޅުކުރި ނަމަވެސް ބިޑް ހުށަހަޅައިފައެއް ނުވެ އެވެ.
ރާއްޖެ ވެގެންދާނީ 13 ވަނަ ސާފް ޗެމްޕިއަންޝިޕް ބާއްވަން ބިޑް އެވޯޑްކުރާ ތިން ވަނަ ގައުމަށެވެ. އެންމެ ފުރަތަމަ ޕާކިސްތާންގައި ބާއްވަން އިއުލާން ކުރި މުބާރާތް ބަންގްލަދޭޝް އަށް ބަދަލުކުރީ އެ ގައުމުން އެދުމުން ހާއްސަ ހުއްދައެއްގެ ދަށުންނެވެ. އެއީ އެ ގައުމުގެ ބާނީ ޝައިހް މުޖީބުއް ރަހްމާން (ބަންގުބަންދު) އުފަންވި 100 އަހަރު ފުރުމުގެ މުނާސަބަތާ ގުޅިގެންނެވެ.
އޮކްޓޯބަރު 1-13 އަށް ރާއްޖޭގައި ބާއްވާ މުބާރާތުގައި ވާދަ ކުރާނީ ސާފުގެ ހަތް ގައުމުގެ ތެރެއިން ފަސް ގައުމެވެ. މި ފަހަރުގެ މުބާރާތުގައި ވާދަކުރާނީ ފަސް ޓީމެކެވެ. އެހެންވެ، މުބާރާތް ލީގު އުސޫލުން ކުޅޭތީ ރާއްޖެ އިން ހުށަހެޅީ ރާއްޖޭގައި އެކަނި މުބާރާތް ކުޅޭ ގޮތަށެވެ. ފައިނަލަށް ދާނީ އެންމެ ގަދަ ދެ ޓީމެވެ.
ރާއްޖެއިން މީގެ ކުރިން ސާފް ޗެމްޕިއަންޝިޕް ބޭއްވީ ލަންކާ އާ ދެ ގައުމު ގުޅިގެން 2008 ގަ އެވެ. އޭރު ގުރޫޕް އޭގެ މެޗުތަކާއި ސެމީ ފައިނަލު އެއް މެޗު ކުޅުނީ ރާއްޖޭގަ އެވެ. ކޮލަމްބޯގެ ސުގަތަދާތަ ސްޓޭޑިއަމްގައި ކުޅުނު ފައިނަލު މެޗު ރާއްޖެއިން ކާމިޔާބު ކުރީ އިންޑިއާ ބަލި ކުރުމަށް ފަހު އެވެ.
ސާފުގެ މެންބަރުންގެ ތެރެއިން ބޫޓާން އާއި ޕާކިސްތާން މުބާރާތުގައި ބައިވެރި ނުވާނެ އެވެ. ބޫޓާންގައި ކޮވިޑް-19 ގެ ހާލަތު އޮތް ގޮތުން އެ ގައުމުގެ ގައުމީ ޓީމު ގައުމުން ބޭރަށް ފުރަން ހުއްދައެއް ނެތެވެ. ޕާކިސްތާން އޮތީ ފީފާގެ ސަސްޕެންޝަނެއްގަ އެވެ.
މުބާރާތް އެންމެ ފުރަތަމަ ބާއްވަން ނިންމީ މިދިޔަ އަހަރުގެ ސެޕްޓެމްބަރުގަ އެވެ. ނަމަވެސް ކޮވިޑް-19 އާ ގުޅިގެން މި އަހަރަށް ފަސް ކުރީ އެވެ. ނަމަވެސް މި އަހަރު މުބާރާތް ބާއްވަން ތައްޔާރުވިއރު ވެސް ބަންގްލަދޭޝްގައި ކޮވިޑްގެ ހާލަތު ރަނގަޅެއް ނުވެ އެވެ.
ސާފް ޗެމްޕިއަންޝިޕް އެންމެ ފަހުން ވެސް ބޭއްވި ބަންގްލަދޭޝްގަ އެވެ. އެ ފަހަރުގެ މުބާރާތް ރާއްޖެ އިން ކާމިޔާބު ކުރީ އިންޑިއާ ބަލި ކުރުމަށް ފަހު އެވެ.