12 އޯގަސްޓް 2021 - 14:58
ހދ. ހިރިމަރަދޫ ސްކޫލަށް ދަރިވަރުން ނުފޮނުވާ މައްސަލައިގައި، ބެލެނިވެރިންގެ އެދުމާ އެއްގޮތަށް އެ ސްކޫލުގެ އިންޑިއާ ޕްރިންސިޕަލް މަގާމުން ވަކިކޮށް، އަންނަ ހަފުތާގައި ދިވެހި ޕްރިންސިޕަލެއް ފޮނުވަން ނިންމާފައިވާ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.
ދިރާސީ އާ އަހަރުގެ ކިޔެވުން މިދިޔަ އަންގާރަ ދުވަހު ފެށިއިރު، ހިރިމަރަދޫ ސްކޫލްގެ ބެލެނިވެރިން އެދެމުން އަންނަ ގިނަ ކަންތައްތަކެއް އެ ސްކޫލުން ފުރިހަމަކޮށްދީފައި ނުވާ ކަމަށް ބުނެ އެއްވެސް ދަރިވަރަކު މިއަދާ ހަމަ އަށް ވެސް ސްކޫލަކަށް ނުފޮނުވަ އެވެ.
ދަރިވަރުން ސްކޫލަށް ނުފޮނުވާ މައްސަލައިގައި، އެޑިއުކޭޝަންގެ ޑެޕިއުޓީ މިނިސްޓަރު އަހްމަދު މުޖާހިދާ އެކު މިނިސްޓްރީގެ ޓީމެއް އެ ރަށަށް ގޮސް ރަށު ކައުންސިލާއި ސްކޫލްގެ ބެލެނިވެރިންނާ ބައްދަލުކޮށް، ކަންބޮޑުވުންތަކާ ގުޅޭ ގޮތުން މަޝްވަރާކުރައްވާފައިވެ އެވެ.
އެޑިއުކޭޝަން މިނިސްޓްރީގެ މީޑިއާ އޮފިޝަލަކު "މިހާރު" އަށް ވިދާޅުވީ މި މައްސަލަ ހައްލުކުރުމަށްޓަކައި ފޮނުވާ އާ ޕްރިންސިޕަލް އަންނަ އާދިއްތަ ދުވަހު އެ ރަށުގައި ހުންނާނެ ކަމަށެވެ. ޕްރިންސިޕަލް ބަދަލުކުރަން މިނިސްޓްރީން ނިންމީ، ބެލެނިވެރިންނާ އެކު ދެކެވުނު ވާހަކަތަކުގެ ތެރެއިން އެންމެ މުހިންމު ކަމެއްގެ ގޮތުގައި ސްކޫލްގެ ޕްރިންސިޕަލް ބަދަލުކުރަން އެދިފައި ވާތީ ކަމަށެވެ.
"މީގެ އިތުރުން ވެސް ސްކޫލްގެ ބެލެނިވެރިންގެ ހުރި އިތުރު ކަންބޮޑުވުންތަކަށް، މިނިސްޓްރީގެ ގަވައިދުތަކާއި އުސޫލުތަކުގެ ތެރެއިން ހައްލު ގެނައުމަށް އަންނަނީ މަޝްވަރާތައް ކުރެވެމުން،" އޮފިޝަލް ވިދާޅުވި އެވެ.
ގުރޭޑް 10 އާ ހަމަ އަށް ކިޔަވައިދެމުން އަންނަ ހިރިމަރަދޫ ސްކޫލްގައި 8-12 އަހަރުވީ ޓީޗަރުން ތިބިއިރު، ގިނައީ ބިދޭސީ ޓީޗަރުންނެވެ. މި ޓީޗަރުންގެ ފަރާތުން ރަނގަޅު ނަތީޖާ ނެރެނުދެވޭތީ ކަމަށް ބުނެ، ޓީޗަރުން ބަދަލުކޮށްދޭން ބެލެނިވެރިން އެދުމުން އަންނަތާ މިހާރު ވަރަށް ގިނަ ދުވަސް ވަނީ ވެފަ އެވެ.
މިހާރު 64 ދަރިވަރުން ކިޔަވަމުން އަންނަ، އެ ސްކޫލްގެ ބެލެނިވެރިންގެ ހުރި އިތުރު ކަންބޮޑުވުންތަކުގެ ތެރޭގައި ސްކޫލް އަލުން ހުޅުވަން އެއްވެސް ވަރަކަށް ތައްޔާރުވެފައި ނުވުމާއި ސްކޫލް އިމާރާތުގެ އާބާތުރަ ފިލުވަން ވެސް މަސައްކަތެއްކޮށްފައި ނުވުމުގެ އިތުރުން ދަރިވަރުންނަށް ބޭނުންވާ ފޮތްތައް ހަމަނުވުމުގެ މައްސަލަ ވެސް ހިމެނެ އެވެ.
އެ ސްކޫލުގެ ޕްރިންސިޕަލަކަށް އިންޑިއާ މީހަކު ހަމަޖެއްސީ މީގެ ތިން މަސް ކުރިންނެވެ. އެ ޕްރިންސިޕަލް ވެސް ސްކޫލްގައި ހުރި މައްސަލަތައް ހައްލުކުރަން އުޅުއްވާތަން ނުފެންނަ ކަމުގެ ޝަކުވާ ބެލެނިވެރިން ވަނީ ކޮށްފަ އެވެ.
ކޮވިޑް ކޮންޓްރޯލްކުރުމަށް އެޅި ފިޔަވަޅުތަކާ އެކު ދޮޅު އަހަރުގެ މެދުކެނޑުމަކަށް ފަހު، ހުރިހާ ދަރިވަރުން ސްކޫލަށް ހާޒިރުކޮށްގެން ކިޔަވައިދޭން މިދިޔަ އަންގާރަ ދުވަހު ވަނީ ފަށައިފަ އެވެ. އަދި އެހެން ދިރާސީ އަހަރުތަކާ ހިލާފަށް، ނިޒާމީ ބަދަލަކާ އެކު މިފަހަރު ކިޔެވުން ފެށީ އަހަރުގެ މެދުތެރެއިންނެވެ.