31 އޯގަސްޓް 2021 - 11:44
ފުވައްމުލަކު އެއާޕޯޓުން ރޭ ފުރަން އުޅުނު މޯލްޑިވިއަންގެ މަތިންދާބޯޓު ހައިޖެކް ކުރާނެ ކަމަށް ބުނެ އިންޒާރު ދިން މައްސަލައާ ގުޅިގެން މީހަކު ހައްޔަރުކޮށްފި އެވެ.
ފުވައްމުލަކުން މާލެ އަށް ފުރަން ތައްޔާރު ވެފައި އޮތް ފްލައިޓެއް ހައިޖެކް ކުރާނެ ކަމަށް ބުނެ އިންޒާރު ދިން މައްސަލައެއްގެ ރިޕޯޓް ރޭ ނުވައެއް ޖަހަން އުޅެނިކޮށް ފުލުހުންނަށް ލިބިގެން އެ މައްސަލަ އަންނަނީ ތަހުގީގު ކުރަމުންނެވެ.
އެ މައްސަލައާ ގުޅިގެން ކޯޓު އަމުރެއްގެ ދަށުން އުމުރުން 34 އަހަރުގެ ދިވެއްސަކު މިއަދު ހައްޔަރުކޮށްފައިވާ ކަމަށް ފުލުހުން ބުނެ އެވެ.
އެ މީހާ ފްލައިޓު ހައިޖެކް ކުރާނެ ކަމަށް ބުނެ ދިން އިންޒާރާ ގުޅިގެން އެ ފްލައިޓު ޑިލޭ ވެސް ކުރި އެވެ.
މިފަދަ އިންޒާރުތަކުގެ މައްސަލަތައް ފުލުހުން ސީރިއަސް މައްސަލަތަކުގެ ގޮތުގައި ބަލަ އެވެ. އިންޑިއާގެ ހައި ކޮމިޝަން ގޮއްވާލަން އާރްޑީއެކްސް ބޭނުންވާ ކަމަށް ބުނި މީހެއްގެ އިތުރުން، މުލިއާގެ ކައިރިން ލާފައި ދަމުން އަތުގައި ބޮމެއް އޮތް ކަމަށް ބުނި މީހެއް ވެސް ފުލުހުން މި ފަހުން ހައްޔަރު ކުރި އެވެ.
ފްލައިޓެއް ހައިޖެކް ކުރާނެ ކަމުގެ އިންޒާރު ދިން އިރު، މާލެ އިން އައްޑޫ ގަން އިންޓަނޭޝަނަލް އެއާޕޯޓަށް މި މަހުގެ ދެ ވަނަ ދުވަހުގެ ރޭ ޖައްސަން ދިޔަ މޯލްޑިވިއަންގެ ބޯޓަކަށް ލޭޒާ ލައިޓެއް އެޅުވި މައްސަލައެއް ވެސް ފުލުހުންނާއި ކަމާބެހޭ އެހެން އިދާރާތަކުގެ ސަމާލުކަމަށް ވަނީ ގެނެސްފަ އެވެ.