05 ސެޕްޓެމްބަރ 2021 - 07:20
ސްވިޑްންގެ މަޝްހޫރު ބޭންޑެއް ކަމަށްވާ "އާބާ" އިން 40 އަހަރު ފަހުން އަލްބަމެއް ނެރެން ނިންމައިފި އެވެ.
ޕޮޕް ބޭންޑެއްގެ ގޮތުގައި މީގެ 49 އަހަރު ކުރިން އާންމުންގެ މަގުބޫލުކަން ހޯދި ބޭންޑުން އެތައް އަހަރެއް ފަހުން ނެރެން ނިންމާފައިވާ އަލްބަކީ އަންނަ ނޮވެމްބަރު މަހުގެ 5 ގައި ނެރޭ "ވޮޔޭޖް" އެވެ. އަލްބަމް ޕްރޮމޯޓުރަން "އާބާ" އިން ގިނަ ހަރަކާތްތަކެއް ހިންގަން ވެސް ހަމަޖެހިފައިވާ އިރު މީގެ ތެރެއިން ބޮޑަށް ހިމެނެނީ ވާޗުއަލް ކޮންސަޓްތަކެވެ.
އަދި އަންނަ އަހަރުގެ މެއި މަހު ލަންޑަނުގައި ލައިވް ޝޯއެއް ބާއްވަން ހަމަޖައްސާފައިވެ އެވެ.
"އާބާ" ގެ އާ އަލްބަމަކީ 10 ލަވަ ހިމެނޭ އެއްޗެކެވެ. އަލްބަމް ޕްރޮމޯޓްކުރަން އެއަށް ހާއްސަ ވެބްސައިޓެއް ލޯންޗްކޮށްފައިވެ އެވެ.
"ވޮޔޭޖް" ނެރޭކަން އިއުލާންކުރަން ބުރާސްފަތި ދުވަހު ބޭންޑުން ބޭއްވި ޕްރެސްގައި ބުނި ގޮތުގައި އެހާ ދުވަސް ކޮށްފައި އަނެއްކާ ވެސް ފޭނުންނަށް އަލްބަމެއް ގެނެސްދޭން ނިންމީ ފޭނުންނާ އެކު އަދިވެސް "އާބާ" އޮތްކަން ހާމަކޮށް ދިނުމަށެވެ. އަދި ފޭނުން އަލްބަމް ބަލައިގަންނާނެކަމާ ދޭތެރޭ ޝައްކު ނުކުރާ ކަމަށް ވެސް ބޭންޑްގެ މެމްބަރުން ބުންޏެވެ.
ފިރިހެން ދެ މެމްބަރުންނާއި އަންހެން ދެ މެމްބަރުން ހިމެނޭ ބޭންޑަށް ނަން ދީފައި ވަނީ މެމްބަރުންގެ ފެށޭ ނަމުގެ އަކުރުތަކުންނެވެ. އެއީ އެގްނީތާ ފާލްސްކޯގް، 71، ބިޖޯން އަލްވީޒް، 76، ބެނީ އެންޑަސަން، 74، އަދި އެނީ-ފްރިޑް ލިންސްޓާޑް، 75، އެވެ.
"އާބާ" އިން މިހާތަނަށް ސްޓޫޑިއޯލް އަލްބަމްގެ ގޮތުގައި 8 އަލްބަމް ނެރެފައިވެ އެވެ. އެންމެ ފަހުން ނެރުނު އަލްބަމަކީ ނޮވެމްބަރު 30، 1981 ގައި ނެރުނު "ދަ ވިޒިޓާސް" އެވެ. ބޭންޑްގެ ފުރަތަމަ އަލްބަމަކީ ބޭންޑަށް އަހަރެއް ފަހުން ނެރުނު 1973 ގެ "ރިންގް ރިންގް" އެވެ.