11 ސެޕްޓެމްބަރ 2021 - 11:34
މެންޗެސްޓާ (ސެޕްޓެމްބަރު 11) - ޕްރިމިއާ ލީގުގައި މިރޭ، ނިއު ކާސަލް ޔުނައިޓެޑާ ދެކޮޅަށް މެންޗެސްޓާ ޔުނައިޓެޑް ކުޅޭ މެޗުގައި، 12 އަހަރަށް ފަހު ޔުނައިޓެޑަށް އަލުން ބަދަލުވި ރޮނާލްޑޯ ކުޅޭނެ ކަމަށް ކޯޗު އޮލެ ގުނަ ސޯލްޝެއާ ބުނެފި އެވެ.
މެންޗެސްޓާގެ އޯލްޑް ޓްރެފޯޑުގައި މިއަދު ކުޅޭ މެޗު ފަށާނީ ރާއްޖޭ ގަޑިން މިރޭ 7 ޖަހާއިރު އެވެ. ސޯލްޝެއާ ބުނީ ޔުނައިޓެޑްގެ ކުޅުންތެރިންނާ އެކު ހޭދަކުރި ވަގުތު މަދު ވިޔަސް ރޮނާލްޑޯ ހުރީ މެޗު ކުޅެވޭ ފޯމްގައި ކަމަށެވެ.
"ޔުވެންޓަސްއާ އެކު އޭނާ ވަނީ ރަނގަޅު ޕްރީ ސީޒަން ޓްރޭނިންތަކެއް ކުރިއަށް ގެންގޮސްފައި. ޕޯޗުގަލްގެ ގައުމީ ޓީމުގައި ޓްރޭނިންތައް ކުރިއަށް ގެންދިޔަ. އަހަރެމެންނާއެކު މިތަނުގައި ހަފުތާއެއް ވަންދެން ރަނގަޅު ޓްރޭނިންތަކެއް އޭނާ ކުރިއަށް ގެންދިޔަ،" ސޯލްޝެއާ ބުންޏެވެ.
"ރޮނާލްޑޯ ދަނޑުން ފެންނާނެ. އެއީ ޔަގީން ކަމެއް. ކޮންމެ ވެސް ހިސާބެއްގައި ފެންނާނެ."
ނިއު ކާސަލް އަކީ ރޮނާލްޑޯ އަށް ތާރީހީ ޓީމެކެވެ. ޔުނައިޓެޑުގެ ޖޯޒީގައި އޭނާ ހެދި ހަމައެކަނި ހެޓްރިކު ހެދީ ނިއު ކާސަލް ކޮޅަށެވެ.