13 ސެޕްޓެމްބަރ 2021 - 10:42
ރޯމް (ސެޕްޓެމްބަރު 13) - ކޯޗެއްގެ ގޮތުގައި ހޯސޭ މޮރީނިއޯ ކުރިމަތިލި 1،000 ވަނަ މެޗުން އޭއެސް ރޯމާ މޮޅުވެއްޖެ އެވެ.
ސަސުއޯލޯގެ މައްޗަށް 2-1 އިން ރޯމާ މޮޅުވީ އެންމެ ފަހު ވަގުތުގައި ސްޓެފަން އެލް ޝަރާވީ ޖެހި ލަނޑުންނެވެ. މެޗުގައި ފުރަތަމަ ލީޑު ނެގީ ވެސް ރޯމާއިންނެވެ. މެޗުގެ 37 ވަނަ މިނެޓުގައި އެ ޓީމަށް ބްރަޔަން ކްރިސްޓަންޓް ލީޑު ނެގި ނަމަވެސް ދެ ވަނަ ހާފުގެ ކުރީކޮޅު ސަސުއޯލޯ އަށް ނަތީޖާ ހަމަހަމަ ކޮށްދިނީ ފިލިޕް ޖުރިސިކް އެވެ.
ކޯޗެއްގެ ގޮތުގައި މޮރީނިއޯ ކެރިއާ ފެށީ 2000 ވަނަ އަހަރު ބެންފީކާއިންނެވެ. އެ ޓީމަށް އޭނާ ކޯޗުކޮށް ދިން 11 މެޗުގެ ތެރެއިން ހަ މެޗުން މޮޅުވި އެވެ. ރޯމާ އަކީ މޮރީނިއޯ ކޯޗުކޮށްދޭ 10 ވަނަ ޓީމެވެ.
ޔޫރަޕުގެ ފުޓްބޯޅައިގައި މަޝްހޫރު ނަމަކަށް މޮރީނިއޯ ވީ، މެންޗެސްޓާ ޔުނައިޓެޑް ބަލިކޮށް 2004 ގެ ޗެމްޕިއަންސް ލީގު ޕޯޓޯ އަށް ހޯދައިދިން ހިސާބުންނެވެ. އެ ކާމިޔާބާ އެކު ޗެލްސީ އަށް އޭނާ ގެންދިޔަ އެވެ. އެ ޓީމަށް ދެ ފަހަރެއްގެ މަތިން ކޯޗުކޮށްދީ ޕްރިމިއާ ލީގު ތިން ފަހަރު ހޯދި އެވެ.
ކޯޗެއްގެ ގޮތުގައި އޭނާ އެންމެ ބޮޑެތި ކާމިޔާބުތައް ހޯދީ، ޕޯޓޯގެ އިތުރުން ޗެލްސީ، އިންޓަ މިލާން އަދި ރެއާލް މެޑްރިޑްގަ އެވެ. އިންޓައާ އެކު 2009-2010 ގެ ސީޒަންގެ ތިން ތަށި ކާމިޔާބު ކުރި އެވެ. މެންޗެސްޓާ ޔުނައިޓެޑަށް ޔޫރޮޕާ ލީގުގެ ޗެމްޕިއަންކަން ހޯދައިދިން ނަމަވެސް ސަޕޯޓަރުން ހިތްހަމަޖެހޭ ވަރުގެ ނަތީޖާތަކެއް ހޯދައި ނުދެވުމުން އޭނާ މަގާމުން ވަކިކުރީ 2018 ގަ އެވެ. ޓޮޓެންހަމްގެ ކޯޗުކަމާ 2019 ވަނަ އަހަރު ހަވާލުވިޔަސް މި އަހަރުގެ އޭޕްރީލް މަހު އޭނާ މަގާމުން ވަކިކުރި އެވެ.
ސެރީއާގައި ރޯމާ އޮތީ ނުވަ ޕޮއިންޓާއި ފައިދާ ހަތް ގޯލާ އެކު ތާވަލުގެ އެއްވަނައިގަ އެވެ. ލާޒިއޯ އަތުން 2-0 އިން ރޭ މޮޅުވި އޭސީ މިލާން އިން ވެސް ވަނީ ނުވަ ޕޮއިންޓް ހޯދައިފަ އެވެ. މިލާނަށް އޮތީ ފައިދާ ހަ ގޯލެވެ. ނަޕޯލީން ވެސް ވަނީ ނުވަ ޕޮއިންޓް ހޯދައިފަ އެވެ. އެ ޓީމު ތިން ވަނައިގައި އޮތީ ފައިދާ ހަތަރު ގޯލްއާ އެކު އެވެ.