27 ސެޕްޓެމްބަރ 2021 - 10:19
ބާސެލޯނާ (ސެޕްޓެމްބަރު 27) - ސަސްޕެންޝަނުގައި ހުރި ކޯޗު ރޮނާލްޑް ކޫމަންއާ ނުލައި ރޭ ލީގުގައި ލެވާންޓޭއާ ވާދަކޮށް ބާސެލޯނާއިން ފުރިހަމަ މޮޅެއް ހޯދައިފި އެވެ.
މި މެޗުން ބާސެލޯނާ މޮޅުވީ 3-0 އިންނެވެ.
ބާސާއިން މޮޅަށް ކުޅެ ގިނަ ހަމަލާތަކެއް ވެސް އުފެއްދި މި މެޗުގައި އެޓީމުގެ ފުރަތަމަ ލަނޑު ޖެހީ ހަވަނަ މިނިޓުގައި ލިބުނު ޕެނަލްޓީއަކުން މެމްފިސް ޑިޕާއީ އެވެ. މިއީ ޑިޕާއީ އަށް ކުރި ފައުލަކާ ގުޅިގެން އެޓީމަށް ލިބުނު ޕެނަލްޓީއެކެވެ. އޭގެ އަށް މިނިޓް ފަހުން ބާސާއަށް ލީޑު ފުޅާކޮށްދިނީ މި ސީޒަނުގައި ސެވިއްޔާއިން ލޯނަކަށް ގެނައި 31 އަހަރުގެ ފޯވަޑް ލޫކް ޑި ޔޮންގެވެ. ސާޖީނިއޯ ޑެސްޓް ދިން ބޯޅައަކުން ޑި ޔޮންގް ޖެހި މި ލަނޑަކީ އޭނާ ބާސެލޯނާގެ ޖޯޒީގައި ޖެހި ފުރަތަމަ ލަނޑެވެ.
މީގެ އިތުރުން ވެސް ފުރަތަމަ ހާފުގައި ލަނޑު ޖަހަން ލިބުނު ފުރުސަތުތަކުގައި ޕީކޭ އަށް ބޯޅަ ގޯލާ އަމާޒުކޮށް ނުލެވުނު އިރު ގަވީ އާއި ޑިޕާއީ ފޮނުވާލި ހަމަލާތަކަށް ހުރަސްއެޅީ ލެވާންޓޭގެ ކީޕަރު ފެނާންޑޭޒް އެވެ.
ބާސެލޯނާ އިން މެޗުގައި ޖެހި ތިންވަނަ ލަނޑު ފުރިހަމަ ވަގުތު ހަމަވެގެން ކުޅުނު އިތުރު ވަގުތުގައި ޖެހީ 10 މަސްދުވަހަށް ފަހު ކުޅުމަށް އަލުން އެނބުރި އައި 18 އަހަރުގެ ފޯވަަޑް އަންސޫ ފާޓީ އެވެ. މިދިޔަ އަހަރުގެ ނޮވެމްބަރު މަހު ކަކުލަށް ލިބުނު ސީރިއަސް އަނިޔާއިން ރަނގަޅުވެ، މެޗުގެ ފަހު 10 މިނިޓަށް އޭނާ ކުޅެން ނުކުތީ، މި ސީޒަނުގައި ޓީމުދޫކޮށް ފްރާންސްގެ ޕީއެސްޖީއަށް ބަދަލުވި ލިއޮނެލް މެސީގެ 10 ނަމްބަރު ޖޯޒީގަ އެވެ.
ކޫމަން ސަސްޕެންޝަނުގައި ހުރުމުގެ ސަބަބުން މި މެޗުގައި ޓީމަށް އިރުޝާދު ދިނީ އެސިސްޓެންޓް ކޯޗު އަލްފްރެޑް ޝްރޫޑާ އެވެ. މި ނަތީޖާއާ އެކު ބާސެލޯނާ އޮތީ އެއް މެޗު މަދުން ކުޅެ، އެއްވަނައިގައި އޮތް ރެއާލް މެޑްރިޑަށް ވުރެ ފަސް ޕޮއިންޓް މަދުކޮށް، 12 ޕޮއިންޓާ އެކު ލީގު ތާވަލުގެ ހަވަނައިގަ އެވެ.