25 އޮކްޓޯބަރ 2021 - 00:41
ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ އެމްޑީޕީގެ މެމްބަރު އަހްމަދު ހައިތަމް އާއި އޭނާގެ މިހާރުގެ އަނބިކަނބަލުން ޝަޖާން މުއާޒްއާ މަގުމަތިން ދިމާކޮށް، އިންޒާރު ދިން މައްސަލާގައި އޭނާގެ ކުރީގެ އަނބިކަނބަލުންނާއި އޭނާގެ ދަރިއަކަށް ދައުވާކޮށްދިނުމަށް އެދި ފުލުހުން ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.
މިދިޔަ ޖޫން މަހު ކުރީކޮޅު ހުށަހެޅި މި މައްސަލަައިގެ ތަހުގީގު ނިންމައި މި މަހުގެ ތިން ވަނަ ދުވަހު މައްސަލަ ޕީޖީއަށް ފޮނުވާފައިވާ ކަމަށް، ފުލުހުން މައްސަލަ ނިންމި ގޮތުގެ ލިޔުމުގައި ބުނެފައިވެ އެވެ.
ލިޔުމުގައިވާ ގޮތުން ހައިތަމްގެ ކުރީގެ އަނބިކަނބަލުން ނަޖުމާ މޫސާ އާއި އޭނާގެ ދަރިފުޅު ފާތިމަތު ދިފްލާ ޖުނައިދު ވަނީ ހައިތަމްގެ ދެކަނބަލުންނާ މަގުމަތިން ދިމާކޮށްފައިވާ ކަމަށް ތުހުމަތުކުރެވެ އެވެ. އަދި ދިފްލާ ވަނީ ހައިތަމް އަށް ހަޑި ހުތުރު ބަހުން އެއްޗެހި ކިޔައި ހައިތަމަށް އިންޒާރު ދީ ހައިތަމްގެ އަނބިކަނބަލުން ބަލިވެ އިންދާ ބަނޑުގައި ކޮޅުފައިން ޖަހައި މާރާމާރީ ހިންގަން އުޅެފައި ކަމަށް ވެސް ފުލުހުން ތުހުމަތުކޮށްފައިވެ އެވެ. އަދި ނަޖުމާ ވެސް ސޯޝަލް މީޑިއާގައި ހައިތަމަށް އިންޒާރު ދިން ކަމަށް ވެސް ތުހުމަތުކޮށްފައިވެ އެވެ.
މި ކަންތައް ހިނގާފައި ވަނީ ހައިތަމްގެ އަނބިކަނބަލުން އެއްމާބަނޑު ދެ ކުދިންނަށް ބަލިވެ އިންދަ އެވެ. މަގުމަތިން ދިމާކޮށް އިންޒާރު ދިނުމުން ހައިތަމްގެ އަނބިކަނބަލުންނަށް ޝޮކެއް ލިބި ހޮސްޕިޓަލުން ފަރުވާ ވެސް ހޯދަން ވެސް ޖެހުނެވެ.