ޖަރުމަނު ބުންޑަސްލީގާގައި ހެމްބާގާ ދެކޮޅަށް ކުޅެ ހަނި މޮޅެއް ހޯދައި، ބަޔާ ލެވަކޫސަން އިން ލީގު ތާވަލުގެ ފަސްވަނައިގައި އޮތް އާރުބީ ލައިޕްޒިގްއާ ދެމެދު އޮތް ފަރަގު ކުޑަކޮށްފިއެވެ.

ހެމްބާގުގެ ދަނޑުގައި ކުޅުނު މި މެޗުން ލެވަކޫސަން މޮޅުވީ 0-1 ގެ ނަތީޖާއަކުންނެވެ. ލެވަކޫސަން އިން ގިނަވަގުތު ބޯޅަ ހިފަހައްޓައިގެން ގިނަ ހަމަލާތަކެއް އުފެއްދި މި މެޗުގައި ދެ ޓީމުގެ ފަރާތުން ވެސް ފެނިގެންދިޔައީ އާދައިގެ ކުޅުމެކެވެ. މެޗުގައި ލެވަކޫސަން އިން ޖުމްލަ 15 ހަމަލާއެއް އުފައްދާފައިވާއިރު ގޯލާ އަމާޒުވާގޮތަށް ފޮނުވާލެވުނީ ހަ ހަމަލާއެކެވެ.

މެޗުގައި ފެނިގެންދިޔަ ހަމައެކަނި ލަނޑަކީ ދެވަނަ ހާފުގައި، މެޗުގެ 73 ވަނަ މިނެޓުގައި ފެނިގެންދިޔަ ލަނޑެކެވެ.ލެވަކޫސަން އަށް ތިން ޕޮއިންޓު ހޯދައިދިން މި ލަނޑު އެ ޓީމަށް ކާމިޔާބުކޮށްދިނީ ކްރިސްޓިއަން ކޮފާނޭއެވެ.

މި މޮޅާއެކު ލެވަކޫސަން އަށް 24 މެޗުން 43 ޕޮއިންޓާއެކު ތާވަލުގެ ހަވަނަ ލިބޭއިރު ފަސްވަނައިއިގައި އޮތް އާރުބީ ލައިޕްޒިގަށް 44 ޕޮއިންޓު ލިބިފައިވެއެވެ.

ބުންޑަސްލީގާއިން އަންނަ ސީޒަނުގެ ޗެމްޕިއަންސް ލީގުގެ ޖާގަ ލިބޭނީ އެންމެ މަތިން ޕޮއިންޓު ހޯދާ ހަތަރު ޓީމަށެވެ. އަދި ތާވަލުގެ ފަސްވަނައަށް ޔޫރަޕާ ލީގުގެ ޖާގައެއް ލިބޭއިރު ހަވަނައިގައި އޮންނަ ޓީމަކަށް ޖެހޭނީ ކޮންފަރެންސް ލީގުގެ ކޮލިފައިންގައި ކުޅޭށެވެ.