އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ފަށާފައިވާ ޣައިރުޤާނޫނީ ހަނގުރާމަ މުޅި މެދުއިރުމައްޗަށް ފެތުރި، އެ ސަރަޙައްދުގެ ވައިގެ ދަތުރުފަތުރުގެ ނިޒާމަށް ހުއްޓުންއަރައި، އެތަކެއް ހާސް ދަތުރެއް މެދުކެނޑިއްޖެއެވެ. މި ހަނގުރާމައާ ގުޅިގެން މެދިއިރުމަތީގެ ސަރަޙައްދުގެ ވައިގެ ދަތުރުފަތުރު މި ވަނީ މީގެ ކުރިން ދުވަހަކު ވެސް ލޮޅުން ނާރާ މިންވަރަށް ހުއްޓުންއަރާފައެވެ.

އެމެރިކާއާއި ޔަހޫދީންގެ ޙަމަލާތަކުގެ އިތުރުން އީރާނުން ދެމުންދާ ރައްދު ޙަމަލާތަކުގެ ސަބަބުން ގިނަ ޤައުމުތަކެއްގެ ވައިގެ ސަރަޙައްދު ބަންދުކޮށް، ބައިނަލްއަޤުވާމީ ވައިގެ ދަތުރުފަތުރަށް ވަނީ ބުރޫއަރާފައެވެ. ނަމަވެސް، ބައެއް ޤައުމުތަކުން މަދު އަދަދެއްގެ އުދުހުންތައް ފަށާފައިވާއިރު، އޭގެ ތެރޭގައި ހިމެނެނީ އެ ޤައުމުތަކުގައި ތާށިވެފައި ތިބި ރައްޔިތުން އެނބުރި ޤައުމަށް ދަތުރުކުރުމަށް ހަމަޖައްސާފައިވާ ރިޕެޓްރިއޭޝަން ދަތުރުތަކެވެ. އެއީ، ވަރަށް މަދު އަދަދެއްގެ އުދުހުންތަކެކެވެ.

އެމެރިކާއާއި ޔަހޫދީންގެ ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ. އަދި، ދުނިޔޭގެ އެންމެ ބާރުބޮޑު އެއް މަރުކަޒު ކަމުގައިވާ އެކުވެރި ޢަރަބި ޢިމާރާތް (ޔޫއޭއީ)ގެ ދުބާއީ އިންޓަރނޭޝަނަލް އެއާޕޯޓުން އެކަނިވެސް މާރިޗު 2އިން ފެށިގެން 4,000އަށްވުރެ ގިނަ ދަތުރު ވަނީ ހުއްޓައިލާފައެވެ. ވެރިރަށް އަބޫ ދާބީގެ ޒަޔިދް އިންޓަރނޭޝަނަލް އެއާޕޯޓުން 1,000އެއްހާ ވައިގެ ދަތުރު ހުއްޓައިލާފައިވާއިރު، ޤަޠަރުގެ ޙަމަދް އިންޓަރނޭޝަނަލް އެއާޕޯޓުން ވަނީ 2,000އަށްވުރެ ގިނަ ދަތުރު ހުއްޓައިލާފައެވެ. އަދި، ހުރިހާ އެއާޕޯޓަކުން ވެސް، އިތުރު އިރުޝާދު ނުލިބޭ ނަމަ އެއާޕޯޓަށް ދަތުރު ނުކުރުމަށް ފަސިންޖަރުންނަށް އިލްތިމާސް ކޮށްފައެވެ.

އީރާނުން ދެމުންދާ ރައްދު ޙަމަލާތަކުގައި ކުވަޔިތުގެ ބައިނަލްއަޤްވާމީ އެއާޕޯޓަށް ވަނީ ބޮޑެތި ގެއްލުންތަކެއް ލިބިފައެވެ. ޑްރޯނެއް ބޭނުން ކޮށްގެން ދީފައިވާ ޙަމަލާގައި ބައެއް މުވައްޒަފުންނަށް އަނިޔާވެފައިވާއިރު، އެ އެއާޕޯޓުގެ މައި ޓަރމިނަލް ވަނީ ބަންދުކޮށްފައެވެ. މީގެ އިތުރުން، އީރާންގެ ވެރިރަށް ތެހްރާންގެ ބައިނަލްއަޤުވާމީ އެއާޕޯޓު ވެސް ފެބުރުވަރީ 28އަށްފަހު ބަންދު ކޮށްފައި އޮތް އިރު، އީރާންގެ މެދުކެނޑުމެއް ނެތް ޙަމަލާތަކާ ގުޅިގެން ޔަހޫދީ ދައުލަތުގެ ބެން ގޫރިޔޮން ބައިނަލްއަޤުވާމީ ވައިގެ ބަނދަރުގެ ދަތުރުތަކަށް ވެސް ވަނީ ހުރަސް އެޅިފައެވެ. އަދި، ޤައުމުން ބޭރުގައި އެނބުރި ނާދެވި ތާށިވެފައިވާ ޔަހޫދީންގެ އަދަދު 120,000އަށް އަރައެވެ.

ހަނގުރާމަ ފެށުމަށް ފަހު، މެދުއިރުމަތީގެ ޤައުމުތަކުން ފޭބުމަށް އެ ޤައުމުތަކުގައި ތިބި އެމެރިކާގެ ރައްޔިތުންނަށް އެ ޤައުމުގެ ޚާރިޖީ ވުޒާރާއިން ވަނީ އަމުރު ކޮށްފައެވެ. މިހާތަނަށް 20,000އެއްހާ މީހުން އަނބުރާ އެމެރިކާއަށް ގެންގޮސްފައިވާއިރު، އަދިވެސް ގިނަ އަދަދެއްގެ ބަޔަކު ތިބީ މެދުއިރުމަތީގެ ޤައުމުތަކުގައި ތާށިވެފައެވެ. އޭގެ ތެރެއިން ގިނަ ބަޔަކު ބުނީ، އެމެރިކާގެ ޚާރިޖީ ވުޒާރާއިން އެ މީހުންނަށް އެއްވެސް ވަރަކަށް އެހީތެރިކަން ފޯރުކޮށްދެމުން ނުދާ ކަމުގައެވެ. އަދި، ފޯނަށާއި އީމެއިލަށް ޖަވާބު ނުލިބޭ ކަމުގައެވެ. އެ މީހުން ދަނީ ސަލާމަތް ކޮށްދިނުމަށް އެދި އެމެރިކާ ސަރުކާރުގައި އާދޭސް ކުރަމުންނެވެ.