ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ހިންގެވުމާ، އަޙްމަދު ޠާރިޤް (ޓޮމް) ހަވާލުވެވަޑައިގެންނެވިފަހުން ބާއްވާ ފުރަތަމަ ކޮންގްރެސް މިރެއަށް ތާވަލުކޮށްފިއެވެ.

ފާޙަގަކޮށްލަން ޖެހޭ ކަމަކީ އެފްއޭއެމުން އޯޑިނަރީ ނުވަތަ އާންމު ކޮންގްރެސް އެއް މި ބާއްވަނީ ގާތްގަނޑަކަށް ތިން އަހަރު ފަހުންނެވެ. އެންމެފަހުން އެފްއޭއެމުން އާންމު ކޮންގްރެސްއެއް ބާއްވާފައިވަނީ 2023 ވަނަ އަހަރުގެ މެއި މަހުއެވެ. އެއީ ކޮރަޕްޝަނާއި، މަނީ ލޯންޑަރިންގެ އެތައް ތުހުމަތެއް ކުރެވިފައިވާ އެ އެސޯސިއޭޝަންގެ ކުރީގެ ރައީސް، ބައްސާމް އަދީލް ޖަލީލްގެ ޒައާމަތުގައެވެ.

އެފްއޭއެމުން ތާވަލުކޮށްފައި ވަނީ މިރޭ 21:15 ގައި އާންމު ކޮންގްރެސް ބޭއްވުމަށެވެ. މި ކޮންގްރެސްގެ އެޖެންޑާ އެފްއޭއެމުން އަދި ހާމަކޮށްފައި ނުވާއިރު، މައުލޫމާތު ލިބިފައިވާ ގޮތުގައި މިރޭ އެންމެ ފާޙަގަކޮށްލެވޭ ކަމެއްގެ ގޮތުގައި އޮންނާނީ ބަޖެޓު ފާސްކުރުމެވެ.

އެފްއޭއެމުން އާންމު ކޮންގްރެސްއެއް ނުބާއްވާތާ ތިން އަހަރު ވެފައިވާއިރު، މިދިޔަ އަހަރު އެފްއޭއެމުން، ޙާއްސަ ހާލަތްތަކުގައި ބާއްވާ ތިން ކޮންގްރެސްއެއް ބާއްވާފައިވެއެވެ.

އެގޮތުން، މިދިޔަ އަހަރުގެ މާރިޗު މަހުގެ ތެރޭގައި އެފްއޭއެމުން ވަނީ ޚާއްސަ ކޮންގްރެސްއެއް ބާއްވާފައެވެ. އެ ކޮންގްރެސް އަކީ، އިދާރީ ގޮތުން ގެންނަންޖެހޭ އިސްލާހު ތަކާއި ބަދަލުތައް ގެނައުމުގެ އިތުރުން، އެސޯސިއޭޝަންގެ 2023 ވަނަ އަހަރާއި 2024 ވަނަ އަހަރުގެ މާލީ ކަންކަން އޮޑިޓް ކުރުމަށްޓަކައި މިނިވަން އޮޑިޓް ފާމެއް ކަނޑައެޅުމަށް ބޭއްވި ކޮންގްރެސް އެކެވެ. މީގެއިތުރުން އެ ކޮންގްރެސްގައި، އެފްއޭއެމްގެ ޑިސިޕްލިނަރީ އަދި އެތިކްސް ކޮމިޓީއަށް މެމްބަރުން އައްޔަންކޮށްފައިވެއެވެ.

އެފަހުން މިދިޔަ އަހަރުގެ ޖޫން މަހު ވެސް ކޮންގްރެސްއެއް އެފްއޭއެމުން ބާއްވާފައިވެއެވެ. އެ ކޮންގްރެސް އަކީ އެފްއޭއެމްގެ އަސާސީ ގަވާއިދު އިސްލާހުކުރުމަށް ބޭއްވި، "ކޮންސްޓިޓިއުޝަނަލް ކޮންގްރެސް" އެކެވެ.

މީރުމާ ހޮޓަލުގައި ބޭއްވި ކޮންގްރެސްގައި އެފްއޭއެމްގެ އަސާސީ ގަވައިދު އިސްލާހުކޮށް، ކޮންގްރެސްގެ ބައިވެރިން، އިންތިހާބީ ގަވައިދުތަކާއި އުސޫލުތައް ފާސްކޮށްފައިވެއެވެ. މި ކަންކަމަކީ އެފްއޭއެމުން އޭރު ބާއްވަން ތައްޔާރުވަމުންދިޔަ އިންތިޚާބުގެ ކުރިން ކޮންމެހެން ކުރަން ފީފާއިން، އެފްއޭއެމްގެ ނޯމަލައިޒިން ކޮމިޓީއާ ހަވާލުކޮށްފައިވާ މަސްއޫލިއްޔަތުތަކެކެވެ.

އެފްއޭއެމުން ވަނީ މިދިޔަ އަހަރުގެ ޖުލައި މަހު ވެސް ޚާއްސަ ކޮންގްރެސްއެއް ބާއްވާފައެވެ. އެއީ ޚައްސަ އިންތިޚާބީ ކޮންގްރެސްއެކެވެ. އެ ކޮންގްރެސްގައި އެފްއޭއެމްގެ މިހާރުގެ ރައީސް ތާރިޤް މަގާމަށް އިންތިޚާބުކޮށް، އެފްއޭއެމްގެ ހިންގުމުގެ ބާރުތައް ނޯމަލައިޒޭޝަން ކޮމިޓީއަށް އޮތް އޮތުން ރަސްމީކޮށް ނިމުމަކަށް ގެނެސްފައިވެއެވެ.