އެމެރިކާއާއި ޔަހޫދީން އީރާންގެ ރައްޔިތުންނާ ދެކޮޅަށް ފަށާފައިވާ ޣައިރުޤާނޫނީ ހަނގުރާމައިގެ ދަށުން ޢާންމުން ދިރިއުޅޭ ސަރަޙައްދުތަކަށް ދެމުންދާ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 1,332 އަށް އުފުލިއްޖެއެވެ. މި އަދަދު ހާމަކުރައްވަމުން އީރާނުން އެކުވެރި ދައުލަތްތައް (އދ)އަށް ކަނޑައަޅާފައި ހުންނަވާ ސަފީރު އަމީރު ސަޢީދު އީރުވާނީ ވިދާޅުވީ، އެމެރިކާއާއި ޔަހޫދީންގެ ޙަމަލާތަކުގައި އެތަކެއް ހާސް ބަޔަކު ޒަޚަމު ކޮށްލާފައިވާ ކަމުގައެވެ.

ރައީސް ޑޮނަލްޑް ޓްރަމްޕާއި ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫގެ އަމުރަށް އެމެރިކާއާއި ޔަހޫދީން އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28 ވަނަ ދުވަހުއެވެ. އެމެރިކާގެ ނިއު ޔޯކްގައި ހުންނަ އދގެ މައި މަރުކަޒުގައި ނޫސްވެރިންނާ ވާހަކަފުޅު ދައްކަވަމުން އީރުވާނީ ވިދާޅުވީ، އެމެރިކާއާއި ޔަހޫދީންގެ ގިނަ ޙަމަލާތައް އަމާޒު ކުރަމުން ދަނީ ޢާންމުން ދިރިއުޅޭ ރަށްތަކާއި ސަރަޙައްދުތަކަށް ކަމުގައެވެ. އެ ޙަމަލާތަކުގައި އެމެރިކާގެ އަސްކަރިއްޔާއާއި ޔަހޫދީ ފައުޖުން ދަނީ ނުރައްކާތެރި އަދި ފަނާކުރަނިވި ހަތިޔާރު ބޭނުން ކުރަމުންނެވެ.

އީރުވާނީ ވިދާޅުވީ، ރައްދުގައި އީރާނުން ޙަމަލާ ދެމުން ދިޔަ ނަމަވެސް، އެ ޙަމަލާތައް ޢާންމުން ދިރިއުޅޭ ސަރަޙައްދުތަކަށް އަމާޒުކޮށްފައި ނުވާނެ ކަމުގައެވެ. އީރާންގެ ރައްދު ޙަމަލާތައް އަމާޒު ކުރަމުން ދަނީ ޔަހޫދީ ދައުލަތުގެ އިތުރުން ގަލްފާއި ޢަރަބި ޤައުމުތަކުގައި އެމެރިކާއިން ޤާއިމުކޮށްފައި އޮތް އަސްކަރީ މަރުކަޒުތަކުގެ އިތުރުން އެމެރިކާގެ މަސްލަޙަތު އޮތް އިމާރާތްތަކާއި ތަންތަނަށެވެ.

އޭގެ ތެރެއިން ބައެއް ޙަމަލާތައް މަދަނީ ބިނާރުތަކަށް އަމާޒުވެފައިވާ ކަމަށް ބުނާ ހާދިސާތައް ތަޙުޤީޤު ކުރަމުންދާ ކަމުގައި ވެސް އީރުވާނީ ވިދާޅުވިއެވެ. "އަޅުގަނޑުމެން ފުރަތަމަ ބެލިބެލިމުން ފެންނަ ގޮތުގައި، މި ހާދިސާތަކުގެ ތެރެއިން ބައެއް ކަންކަމަކީ އެމެރިކާގެ ދިފާޢީ ނިޒާމުތަކުން ޙަމަލާތައް ހުއްޓުވަން އުޅުމުގެ ތެރޭގައި އަމާޒު ބަދަލުވެގެން ދިމާވި ކަންކަން،" އޭނާ ވިދާޅުވިއެވެ.

ހަނގުރާމައާ ގުޅޭ ގޮތުން މާރިޗު 6 ވަނަ ދުވަހު ވާހަކަފުޅު ދައްކަވަމުން ޓްރަމްޕް ވަނީ "އެއްވެސް ޝަރުޠަކާ ނުލައި އަމާންދިނުމަށް" އީރާނަށް އަމުރު ކުރައްވާފައެވެ. އަދި، އީރާނުގެ ރޫހީ އެންމެ މަތީ ވެރިޔާގެ މަޤާމަށް ދެން ޢައްޔަންކުރާ ބޭފުޅަކީ އޭނާ "ބަލައިގަންނަވާ" އަދި "ޤަބޫލު ކުރައްވާ" ބޭފުޅަކަށް ވާންޖެހޭނެ ކަމުގައި ވެސް ޓްރަމްޕް ވިދާޅުވިއެވެ. އަދި، އައު ރޫހީ ވެރިޔާ ކަނޑައެޅުމުގައި އެމެރިކާގެ ބައިވެރިވުން އޮންނަން ޖެހޭ ކަމުގައި ވެސް އޭނާ ދަނީ ދަޢުވާ ކުރައްވަމުންނެވެ.

އީރުވާނީ ވަނީ ޓްރަމްޕްގެ ވާހަކަފުޅަށް ރައްދު ދެއްވާފައެވެ. އޭނާ ވިދާޅުވީ، ޓްރަމްޕްގެ ވާހަަކަފުޅަކީ ބޭރު ޤައުމެއްގެ ދާޚިލީ ކަމެއްގެ ތެރެއަށް ނުފޫޒު ފޯރުވަން މަސައްކަތް ކުރުން ކަމުގައެވެ. އަދި، މިއީ އދގެ ޗާޓަރާ ކަނޑައެޅިގެން ޚިލާފުކަމެއް ކަން އޭނާ ފާހަގަ ކުރެއްވިއެވެ. "އީރާނުގެ އިސްވާރުން ޢައްޔަންކުރަނީ އަޅުގަނޑުމެންގެ ގާނޫނުއަސާސީގެ އުސޫލުތަކާ އެއްގޮތަށް، ބޭރުގެ އެއްވެސް ނުފޫޒެއް ނެތި އެއީ ހަމައެކަނި އީރާނުގެ ރައްޔިތުންގެ އިޚްތިޔާރުގައި އޮތް ކަމެއް،" އޭނާ ވިދާޅުވިއެވެ.

އެމެރިކާއާއި ޔަހޫދީންގެ ހަނގުރާމައިގައި އީރާންގެ ޢާންމުންނަށް ގަސްދުގައި ޙަމަލާތައް އަމާޒު ކުރަމުންދާ ކަން ވަނީ ހާމަވެފައެވެ. ހަނގުރާމައިގެ ފުރަތަމަ ދުވަހު ވެސް ޔަހޫދީންނާއި އެމެރިކާ ގުޅިގެން ވަނީ އީރާންގެ އަންހެން ކުދިންގެ މަދަރުސާއަކަށް ބޮންއަޅައި، 180އެއްހާ ދަރިވަރުން ޝަހީދު ކޮށްލާފައެވެ. އެ ޙަމަލާގެ ފަހަތުގައި އޮތީ އެމެރިކާގެ އަސްކަރިއްޔާ ކަމަށް ބެލެވޭ ކަން އެމެރިކާގެ އަސްކަރިއްޔާގެ ތަޙުޤީޤީ އިދާރާއިން ދާދިފަހުން ވަނީ ހާމަކޮށްފައެވެ. އަދި، އެ ކަން އިތުރަށް ކަށަވަރު ކުރުމަށް މަސައްކަތް ކުރަމުންދާ ކަން ވެސް އެ އިދާރާއިން ހާމަކޮށްފައިވެއެވެ. ބައެއް ޤައުމުތަކުން މެދުވެރިންގެ ގޮތުގައި ހަނގުރާމަ ހުއްޓުމަށް ގެނައުމާ ގުޅޭ ގޮތުން އެމެރިކާއާއި އީރާނާ އެކު މަޝްވަރާތައް ފަށާފައިވާ ކަމުގައި ރިޕޯޓުތައް ބުނެެއެވެ.