މެދުއިރުމަތީގެ އެކި ޤައުމުތަކުގައި އެމެރިކާ ސިފައިން ތިބޭ އަސްކަރީ މަރުކަޒުތަކުގެ އޮޕަރޭޝަންތައް ހުއްޓައިލަން މަޖުބޫރުކުރުވުމަށްފަހު، އެ ޤައުމުތަކަށް އީރާނުން އިސްވެ ޙަމަލާދިނުން މެދުކަނޑާލާފައިވާކަމަށް އިޢުލާނުކޮށްފިއެވެ.

ފެބްރުއަރީ 28ވަނަ ދުވަހުން ފެށިގެން ޔަހޫދީންނާއި އެމެރިކާއިން އީރާނަށް ދެމުންދާ ޙަމަލާތަކުގެ ރައްދުގައި، ޔަހޫދީންގެ ނިރުބަވެރި ދަޢުލަތުގެ އިތުރުން، މެދުއިރުމަތީގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް ޢަމާޒުކޮށް، އީރާނުން ވަނީ ހުއްޓުމެއްނެތި ވަރުގަދަ ޙަމަލާތައް ދީފައެވެ.

ނަމަވެސް، މި ވަގުތުން ފެށިގެން، އެ ޤައުމުތައް މެދުވެރިކޮށް އީރާނަށް ޙަމަލާ ނުދޭހާ ހިނދަކު، އީރާނުން އިސްވެ އެ ޤައުމުތަކަށް ޙަމަލާދިނުން ހުއްޓައިލަން، އީރާނުގެ ހިންގުމާ ޙަވާލުވެފައިވާ ވަގުތީ މަޖިލީހުން ނިންމާފައިވާކަން އީރާނުގެ ރައީސް މަސްޢޫދު ޕިޒީޝްކިޔާން އިޢުލާނުކުރެއްވިއެވެ.

އެމެރިކާ އާއި ޔަހޫދީންގެ ގުޅިގެން ފެށި ޢުދުވާނުގައި އީރާނުގެ ރޫހީ އެންމެ މަތީ ވެރިޔާ އާޔަތުﷲ ޢަލީ އަލްޚާމަނާއި ޝަހީދުކޮށްލާފައިވާއިރު، އީރާނުން ކޮންމެ ދުވަހަކު ވެސް އެތައް ސަތޭކަ ޑްރޯންއާއި މިސައިލް ޙަމަލާތައް ދެމުންނެވެ.

އެ ޙަމަލާތަކުގައި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ބޮޑެތި ގެއްލުންތައް ލިބި، އޮޕަރޭޝަނަށް ބޮޑެތި ހުރަސްތައް ކުރިމަތިވެފައިވާކަމަށް ރިޕޯޓުތައް ބުނެފައިވެއެވެ.

މިގޮތުން، ގަލްފުގައި ޙަމަލާތަކުގެ އިންޒާރު ދިނުމަށް ހަރުކޮށްފައިވާ ރާޑަރުތަކަށް ވެސް ބޮޑެތި ގެއްލުންތައް ލިބިފައެވެ. އެކަމުގެ ސަބަބުން، އީރާނުން ޔަހޫދީންނަށް ޢަމާޒުކޮށް ދެމުންދާ ޙަމަލާތަކަށް ދިފާޢުވުމަށް މިހާރު ލިބެނީ މަދު މިނެޓުކޮޅެކެވެ.
އެއާ އެކު، ޔަހޫދީންގެ ނިރުބަވެރި ދަޢުލަތުގެ މުޙިންމު ބިނާތަކަށް އީރާނުގެ ރައްދު ޙަމަލާތަކުގައި ވަނީ ބޮޑެތި ގެއްލުންތައް ދެވިފައެވެ.