ޗެލްސީ އަތުންވެސް ޔުނައިޓެޑް ބަލިވެއްޖެ

އިނގިރޭސި ޕްރިމިއާ ލީގުގައި ރޭ ޗެލްސީ އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗުން 2-0 ގެ ނަތީޖާއަކުން ޔުނައިޓެޑް ބަލިވެއްޖެއެވެ.

މި މެޗުން ޔުނައިޓެޑް ބަލިވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 9 މެޗުން ލިބިފައިވާ 7 ޕޮއިންޓާއެކު ތާވަލުގެ 17 ވަނައަށް ވެއްޓިފައެވެ. ޗެލްސީއަށް 9 މެޗުން ލިބިފައިވާ 16 ޕޮއިންޓާއެކު އެ ޓީމު އޮތީ ތާވަލުގެ 4 ވަނައިގައެވެ.

ޗެލްސީގެ ސްޓެމްފަޑް ބްރިޖުގައި ކުޅުނު މި މެޗުން ޔުނައިޓެޑް ބަލިވިއިރު މިއީ އެ ޓީމު ޖެހިޖެހިގެން ބަލިވި ތިންވަނަ މެޗެވެ. އަދި އެ ޓީމު އެންމެ ފަހުން ކުޅުނު 9 މެޗުންވެސް މޮޅުވެފައިނުވާއިރު މިއީ 1988 ވަނަ އަހަރަށްފަހު އެ ޓީމު މެޗަކުން މޮޅުނުވެ ދާ އެންމެ ދިގު މުއްދަތެވެ.

ޗެލްސީން ގިނައިރު ބޯޅަ ހިފަހައްޓައިގެން ކުޅެ ގިނަ ފުރުސަތުތަކެއް ތަނަވަސްކޮށްފައިވާ މި މެޗަށް އެ ޓީމު ނިކުތްއިރު, އަނިޔާގެ ސަބަބުން ޖޮއާއޯ ޕެޑްރޯ ނެތްތަން ފޫބެއްދުމަށް އެންމެ ކުރިއަށް ޝަބީ އަލޮންސޯ ކުޅުވާފައިވަނީ ޕެޑްރޯ ނެޓޯއެވެ. އަދި އަރިމަތިން މި މެޗުގައި ކުޅެފައިވަނީ އެސްޓެވާއޯ ވިލިއަމްސްއެވެ.

މި މެޗުގެ ފުރަތަމަ ހާފުގައި ލަނޑެއް ޖެހިފައިނުވި ނަމަވެސް ދެވަނަ ހާފުގެ ކުޅުން ފެށުނުތާ ފަސްވަނަ މިނިޓުގައި ޗެލްސީގެ މޯގަން ރޮޖާރސް ވަނީ ލަނޑެއް ޖަހާ ޗެލްސީއަށް ކުރި ހޯދަދީފައެވެ. ނަމަވެސް ފުރަތަމަ ހާފުގައި ޔުނައިޓެޑްގެ މެތިއުސް ކޫނިއާ ލަނޑެއް ޖެހި ނަމަވެސް ވީޑިއޯ ބެލުމަށްފަހު ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.

ޗެލްސީން މި މެޗުގައި ޖެހި ދެވަނަ ލަނޑަކީ މެޗުގެ 64 ވަނަ މިނިޓުގައި މެންޗެސްޓަރ ޔުނައިޓެޑްގެ ލިސަންދްރޯ މާޓިނޭޒް ކުރި ފައުލަކާއި ގުޅިގެން ރެފްރީ ވަނީ އޭނާއަށް ދެވަނަ ރީނދޫ ކާޑަކާއިއެކު ރަތް ކާޑު ދައްކާ ދަނޑުން ފޮނުވާލުމަށްފަހު ޗެލްސީއަށް ޕެނަލްޓީއެއް ދީފައެވެ. މާޓިނޭޒްއަށް މި މެޗުގައި ރެފްރީ ދެ ރީނދޫ ކާޑު ދައްކާފައިވަނީ ތިން މިނިޓުގެ ތެރޭގައެވެ.

ޗެލްސީއަށް ލިބުނު ޕެނަލްޓީއިން މެޗުގެ ނަތީޖާ 2-0 އަށް ބަދަލުކޮށްފައިވަނީ ކޯލް ޕާމާއެވެ.

މި ލަނޑަށްފަހުވެސް ޗެލްސީގެ އެސްޓެވާއޯ ވިލިއަމްސް ވަނީ ޔުނައިޓެޑް ކޮޅަށް ލަނޑެއް ޖަހާފައެވެ. ނަމަވެސް އެ ނިންމުން ރެފްރީ ބަދަލުކޮށްފައިވަނީ އޮފްސައިޑް ލަނޑެއް ކަމަށެވެ.