ޔުއޭފާ ޔޫރޮޕާ ލީގުގައި އިޓާލިއަން ސެރީއާގެ ޔުވެންޓަސް އާއި ޑަޗް އެރެޑިވިސީގެ އޭޒީ އަލްކްމާ ބައްދަލުކުރި މެޗު ޔޫވޭއިން ކާމިޔާބު ކޮށްފިއެވެ.

އަލްކްމާގެ އޭއެފްއޭއެސް ސްޓާޑިއޯންގައި ކުޅުނު މިމެޗު ޔޫވޭއިން ކާމިޔާބު ކޮށްފައިވަނީ 2-1 ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދަފައިވަނީ އަލްކްމާއިންނެވެ. ނަމަވެސް މެޗުގެ ފެށުން ރަނގަޅުވީ ޔޫވޭގެއެވެ. މިގޮތުން އެޓީމުންވަނީ މެޗުގެ 19 ވަނަ މިނެޓްގައި ލަނޑެއް ޖަހައި މެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ ޓެއުމް ކޫޕްނެއިނަރސްއެވެ.

ޔޫވޭއިންވަނީ ފުރަތަމަ ހާފް ނިމުމުގެ ކުރިން އެޓީމުގެ ލީޑު ފުޅާ ކޮށްފައެވެ. މިގޮތުން މިލަނޑު މެޗުގެ 37 ވަނަ މިނެޓްގައި ކާމިޔާބު ކޮށްދިނީ ރަންޑަލް ކޯލޯ މުއާނީއެވެ. މިމެޗުގެ ފުރަތަމަ ހާފާއި ހިލާފަށް ދެވަނަ ހާފްގައި އަލްކްމާއިން ވަނީ އެޓީމުގެ ކުޅުން ރަނގަޅުކޮށް މެޗުން ނަތީޖާއެއް ނެރުމަށް ކުރަމުންދިޔަ މަސައްކަތް އިތުރު ކޮށްފައެވެ. ނަތީޖާ އަކަށް ވީ، ގިނަ މަސައްކަތް ތަކަކަށްފަހު މެޗުގެ 88 ވަނަ މިނެޓްގައި ލަނޑެއް ޖަހައި ދެޓީމުގެ ދެމެދުގައިވާ ފަރަގު ކުޑަކޮށް މެޗުގެ ފަހު ވަގުތު ކޮޅުގެ ފޯރި އިތުރު ވެގެންދިއުމެވެ. މިލަނޑު އެޓީމަށް ކާމިޔާބު ކޮށްދިނީ މެކްސް މީރުޑިންކެވެ. މިމެޗުގެ ފަހު ވަގުތު ކޮޅުގެ ތެރޭގައި އިތުރު ލަނޑެއް ޖަހައި މެޗުގެ ނަތީޖާ ހަމަހަމަ ކުރެވޭތޯ އަލްކްމާއިން މަސައްކަތް ކުރި ނަމަވެސް އެޓީމަށް އެކަން ކާމިޔާބު ކުރެވޭގޮތެއް ނުވިއެވެ.

މިނަތީޖާއާއެކު ޔޫރޮޕާ ލީގުގެ ތާވަލްގައި ޔޫވޭ އުޅެނީ 4 މެޗުން ލިބިފައިވާ 10 ޕޮއިންޓާއެކު 5 ވަނައިގައެވެ. ޔޫވޭ ހިމެނިފައިވަނީ މިސީޒަންގައި މިމުބާރާތުގައި މެޗަކުން ބަލިނުވެ އޮތް 6 ޓީމުގެ ތެރެއިން އެއް ޓީމަކަށެވެ. އަދި އޭޒީ އަލްކްމާ އޮތީ 6 ޕޮއިންޓާއެކު ތާވަލްގެ 14 ވަނައިގައެވެ.

މިމުބާރާތުގައި ކުޅުނު އެހެން މެޗުތަކަށް ބަލާލާއިރު ތާވަލްގެ ހަވަނައިގައި އޮތް އޮލިމްޕިއާކޯސް އާއި ރެން ބައްދަލުކުރި މެޗު ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި އެއްވަރު ވެފައިވާއިރު ޑީނަމޯ ޒަގްރެބް އާއި ސަންޑަރލަންޑް ބައްދަލުކުރި މެޗު ރަށުން ބޭރުގައި 2-0 ލަނޑުން ކާމިޔާބު ކޮށްފައިވަނީ ޑީނަމޯއެވެ. އަދި އޮލިމްޕިކް ލިއޯން އާއި ރެއާލް ސޮސިއެޑާޑް ބައްދަލުކުރި މެޗު 1-1 ލަނޑުން އެއްވަރުވިއިރު ކްރިސްޓަލް ޕެލަސް އާއި ހޯފެންހެއިމް ބައްދަލުކުރިމެޗުވެސް ނިމިފައިވަނީ 1-1 ލަނޑުން ދެޓީމު އެއްވަރު ވެގެންނެވެ.