މާލޭގައި ސައިރަން އަޅަމުން ދިޔަ އެންބިއުލާންސަކަށް ޖާގަނުދީ، މަގު ބްލޮކްކޮށްގެން މުދާ ބޭލި މައްސަލައިގައި ޕިކަޕު ދުއްވި ޑްރައިވަރަށް ފިޔަވަޅު އަޅައިފި އެވެ.
އާދިއްތަ ދުވަހު ސޯޝަލް މީޑިއާގައި އާއްމުވެފައިވާ ވީޑިއޯއިން ފެންނަ ގޮތުގައި، އެއްކޮޅަށް ދުއްވާ މަގެއް ކަމަށްވާ، ފާށަނާ ކިލެގެ މަގުގައި ކުޑަ ޕިކަޕެއް މަގު ބްލޮކް ވާ ގޮތަށް އޮވެ މުދާ ހުސްކުރަމުންދެ އެވެ. އޭރު އެ ޕިކަޕުގެ ފަހަތުގައިވާ ބޮޑެތި އުޅަނދުތައް ބަރުގޮނު އަޅާއަޑު އިވޭއިރު، އެމްބިއުލާންސްގެ ސައިރަން އަޑު އިވެ އެވެ. އެމްބިއުލާންސް އޮތީ އެއުޅަނދުތަކުގެ ފަހަތުގަ އެވެ.
މި ވީޑިއޯ އާއްމުވުމާއެކު، ގިނަ ބަޔެއްގެ ފާޑު ކިޔުން ވަނީ އަމާޒުވެގެން ގޮސްފަ އެވެ.
މި މައްސަލައާ ގުޅިގެން ފުލުހުން ބުނީ، ފިކަޕް ދުއްވި ޑްރައިވަރަށް ފިޔަވަޅު އަޅާފައިވާ ކަމަށެވެ.
އެގޮތުން އޭނާ 750 ރުފިޔާއިން ޖުރިމަނާކޮށް، ލައިސަންސް ހިފަަހައްޓާފައިވާ ކަމަށް ފުލުހުން ބުނެ އެވެ.
މީގެ އިތުރުން މިމައްސަލަ ބަލަމުންދާ ކަމަށް ޓްރާންސްޕޯޓު މިނިސްޓްރީން ވެސް ބުނެފައިވެ އެވެ.
ޚާރުބާރު ބޮޑު މާލޭގައި މަގުތައް ބްލޮކްކޮށްގެން ފިހާރަ ފިހާރައަށް މުދާ ބޭލުމަކީ އާންމުވެފައިވާ ބޮޑު މައްސަލަ އެކެވެ. ސްކޫލުތަކަށް ދަރިވަރުން ގެންދާ ވަގުތާއި، ނިމޭ ވަގުތުގެ އިތުރުން އޮފީސްތަކަށް މުވައްޒަފުންދާ ވަގުތުތަކުގައި ވެސް މި މައްސަލަތައް ކުރިމަތިވެ އެވެ.