ކުރިއަށް އޮތް ލޯކަލް ކައުންސިލް އިންތިހާބުގައި ދިއްގަރު ޕީއެންސީ ކެންޑިޑޭޓުންނަށް ގޮނޑި ކަށަވަރު ކުރުމަށް މެންބަރު އަހުމަދު ނާޒިމުގެ ނުފޫޒުން ދިއްގަރު ފެނަކަ ބްރާންޗުގެ ސްޓޭޝަން މެނޭޖަރު މުހައްމަދު ސޯދިގު ވަޒީފާ ބަދަލު ކުރުމަށްފަހު ބަދަލު ކުރި ރަށަށް ދެވޭނެ ގޮތެއް ހަމަނުޖައްސާ ވަޒީފައިން ވަކިކޮށްފި އެވެ.
ވަޒީފާއިން ކަނޑާލި މައްސަލައިގައި ސޯދިގު ވިދާޅުވީ ވަޒީފާއިން ކަނޑާލައިފައި ވަނީ ސިޔާސީ ގޮތުން ފިކުރު ތަފާތުވުމުގެ ސަބަބުން ކަމަށެވެ. އޭނާ ވިދާޅުވީ އޭނާއަކީ ފެށުނީއްސުރެ އެމްޑީޕީގެ މެންބަރެއް ކަމަށާއި، ކައުންސިލް އިންތިހާބުގެ ކެމްޕޭން ފެށިގެން އައި ހިސާބުން ސަސްޕެންޑް ކުރި ކަމަށެވެ. އެގޮތުން އޭނާ ސަސްޕެންޑް ކުރީ މިދިޔަ އޮގަސްޓް ހިސާބުގައި ކަމަށާއި، ސަސްޕެންޑް ކުރީ ވާނުވާ ނޭނގޭ މައްސަލައެއްގައި ކަމަށެވެ. އަދި އެއިރު ސަސްޕެންޑް ކުރީ 30 ދުވަހަށް ކަމަށާއި، އެ ދުވަސްވަރު ވެސް އެއްވެސް ސަބަބެއް ބަޔާންކޮށްފައި ނުވާ ކަމަށެވެ. އަދި ސަސްޕެންޑް ކުރިތާ 25 ދުވަސް ފަހުން އެނގުނީ، ސަސްޕެންޑުކުރީ ހޮޅިއެއް ފަޅާލި ކަމުގެ ތުހުމަތުގައި ކަމަށް ސޯދިގު ވިދާޅުވި އެވެ.
އިތުރަށް ސޯދިގު ވިދާޅުވީ ސަސްޕެންޑް ކުރުމަށްފަހު ފަހުން ބަޔާންތަކެއް ވެސް ނެގި ކަމަށެވެ. އަދި ބަޔާން ދީ އެއްބާރުލުން ދީފައިވާނެ ކަމަށާއި، ނަމަވެސް ސަސްޕެންޝަނުގެ މުއްދަތު އިތުރުކުރަމުން ގޮސް 74 ދުވަސް ވަންދެން ސަސްޕެންޝަނުގައި ބެހެއްޓި ކަމަށެވެ.
ދެން ކުންފުނީގެ ގަވާއިދު ބުނާ ގޮތުން 60 ދުވަހަށްވުރެ އިތުރަށް ސަސްޕެންޑް ނުކުރެވޭނެ. އެހެންނަމަވެސް އެބޭފުޅުން 74 ދުވަސް ވަންދެން ސަސްޕެންޑް ކުރީ. ދެން އެވާހަކަ ވެސް ދެންނެވިން ކުންފުނީގެ ގަވާއިދުގައި އޮންނަނީ މިހެންނޭ، އެއާ ހިލާފަށް ނޫންތޯއޭ ސަސްޕެންޝަން އިތުރުކުރައްވަނީ. ދެން އެހެންނަމަވެސް 74 ދުވަހުގެ ސަސްޕެންޝަނަށްފަހު ވަޒީފާއަށް ނުކުމެ އޭގެ ފަހުން އަނގަބަހުން އެންގީ މިހާރު މައްސަލަ ނިމުނީއޭ. ދެން އަޅުގަނޑު ދެންނެވިން މައްސަލަ ނިމުނީ ކިހިނެއްތޯ؟ އެންމެ ކުޑަމިނުން އަޅުގަނޑު އެނގިލަން ބޭނުންވެއޭ. ބުނީމަ ބުނީ ދެން އެކަން އެ ނިމުނީއޭ ދެން މިކަން ކުރިއަށް ނުދާނޭ. ކުރިއަށްދާށޭ.މުހައްމަދު ސޯދިގު
ސޯދިގު ވިދާޅުވީ މައްސަލަ ނިމުނުކަމަށް އެންގި ނަމަވެސް، އޭގެ ހަފްތާއެއްހާ ދުވަސް ފަހުން އޮޕަރޭޝަންގެ އެއްވެސް މަސައްކަތަކަށް މީގެ ފަހުން ހަވާލުވެގެން ވެސް އަދި ކޮށްގެން ވެސް ނުވާނެ ކަމަށް އެންގި ކަމަށެވެ. އޭނާ ވިދާޅުވީ އޮފީހަށް ނުކުންނަން ޖެހޭތޯ ސުވާލު ކުރުމުން ސޮއިކުރަން ދާންޖެހޭނެކަމަށް ބުނި ކަމަށެވެ. އަދި ސޮއިކުރުމުން ނިމުނީތޯ ސުވާލު ކުރުމުން، އިތުރު މަސައްކަތެއް ނެތިއްޖެއްޔާ ނިމުނީ ކަމަށް ވެރިން އެންގި ކަމަށް ސޯދިގު ވިދާޅުވި އެވެ.
ދެން އެހެން ހުރެފައި މިދިޔަ ޖެނުއަރީ މަހުގެ 22 ހިސާބުގައި އަޅުގަނޑަށް އަންނަނީ ގއ. ކޮނޑޭ ބްރާންޗަށް ބަދަލުކޮށްފައިވާ ކަމަށް ލިޔުމުން. ދެން 25 ޖެނުއަރީ ގައި އެކޮޅަށް ނުކުތުމަށް. ދެން އަޅުގަނޑު ވާނެ ލިޔުމުން އެ ސިޓީ އަށް ޖަވާބު ދީފައި، އަޅުގަނޑުގެ ދިރިއުޅުމުގެ ހާލަތު ހުރިގޮތުން އާއިލާއާއި ދުރުގައި މަސައްކަތް ކުރުމަށް ވަރަށް ދަތި ކަމާއި، މިވަގުތު އަޅުގަނޑު އެކަމަށް އިއުތިރާޒު ކުރާ ކަމަށް. ދެން އޭގެ 12 ދުވަސް ފަހުން އަޅުގަނޑަށް އަންނަނީ ސިޓީއެއް އެ ނިންމުން ބަދަލުކުރެވެން ނެތް ކަމަށް. އަދި ފެބްރުއަރީ 4 ވަނަ ދުވަހު އެކޮޅަށް ވަޒީފާއަށް ނުކުތުމަށް. ނުނުކުމެއްޖެ ނަމަ ސޯދިގަށް ފިޔަވަޅު އަޅާނެ ކަމަށް. ދެން އެ ލިޔުމުގައި އޮންނަ ގޮތުން ދަތުރާއި ހުރުމާއި ކެއުމާއި ހުރިހާ ކަމަކީ ކުންފުނިން ހަމަޖައްސާނެ ކަންތައް ކަމުގައި ލިޔުމުގައި އޮވޭ. އެހެންނަމަވެސް މިވަގުތާ ހަމައަށްވެސް، ވަޒީފާއިން ވަކިކުރި ޗިޓު ދިނުމާ ހަމައަށް ވެސް ކުންފުންޏަކުން އަޅުގަނޑުގެ ދަތުރު ހަމަޖައްސާފައި އަޅުގަނޑަކަށް އެއްވެސް އަޕްޑޭޓެއް ދީފައި ނުވޭ.މުހައްމަދު ސޯދިގު
ސޯދިގު ވިދާޅުވީ މިކަމަކީ ސިޔާސީ ގޮތުން ކުރަމުންދާ ކަމެއް ކަމަށެވެ. އަދި މިއީ ކައުންސިލް އިންތިހާބުގައި ޕީއެންސީގެ ކެންޑިޑޭޓުންނަށް ވޯޓު ހޯދުމުގެ ނިޔަތުގައި ކުރާ ކަމެއް ކަމަށެވެ.
އޭނާ ވިދާޅުވީ މިކަމުގައި ދާއިރާގެ މެންބަރު އަހުމަދު ނާޒިމުގެ ނުފޫޒު އޮވެގެން މެންބަރުގެ ލަފަޔާއި އިރުޝާދުގެ ދަށުން ފެނަކައިން ކުރާ ކަމެއް ކަމަށެވެ.