5 އަހަރުން 1 ފަހަރު ވޯޓު ލުމަކީ ފަރުދީ ގޮތުންނާއި ރަށަށް ބެލިނަމަވެސް އެންމެ ބޮޑު ގެއްލުމެއް ވާނެ އެއް ކަންތައް ކަމަށް ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި ވާހަކަދައްކަވަމުންނެވެ. އޭނާ ވިދާޅުވީ އިންތިޚާބުތައް މަދު ވުމަކީ ރައްޔިތުންނަށް ދޭ ޚިދުމަތްތަކާއި ތަރައްޤީގެ މަޝްރޫޢުތަކާއި މެދު ރައްޔިތުންނަށް ޖަވާބުދާރީ ވާން ޖެހޭ މިންވަރު މަދުވުން ކަމަށެވެ.
އަދި ކުއްލިއަކަށް ޤާނޫނުއަސާސީ ބަދަލުކޮށްގެން އިންތިޚާބުތައް މަދު ކުރުމަކީ ރައްޔިތުންގެ މަސްލަހަތާއި މަންފާ އޮތް ގޮތް ނޫން ކަމަށް ޒިޔާދު ވަނީ ސިފަކުރައްވާފަ އެވެ.
" ހުޅުމާލޭގައި ވެސް އެނގިވަޑައިގަންނަވާނެ. ޕްރޮމޯޝަން ވެސް ދެނީ މިހެން. ހަގީގަތަކީ ރާއްޖޭގައި ކަން ހިނގަނީ މިހެން. ރަށްރަަށަށް ދަނީ ވެސް އިންތިޚާބެއް އޮތީމަ. އެހެންވީމަ އިންތިޚާބު މަދުވީމަ އެކަމުގެ ގެއްލުން ވާނީ އާއްމުންނަށް." ޒިޔާދު ވިދާޅުވި އެވެ.
އިންތިޚާބުތައް އެއްކޮށްލުމަކީ އެއްވެސް ސަރުކާރަކުން ރާއްޖޭގެ ރައްޔިތުން ކައިރި އަށް ނުދާނެ ގޮތަށް ކަންކަން މަގުފަހިކޮށްދިނުން ކަމަށް ޒިޔާދު ވިދާޅުވި އެވެ. ޒިޔާދު ވަނީ އެއީ ރައްޔިތުންގެ ބާރުވެރިކަން ކަނޑުވާލުން ކަމަށް ވިދާޅުވެފަ އެވެ.
ކުރިއަށް އޮތް ކައުންސިލް އިންތިޚާބުގައި، ރިޔާސީ އިންތިޚާބާއި، މަޖިލިސް އިންތިޚާބު އެއްކޮށްލުމާއި މެދު ފެންނަ ނުފެންނަ ވޯޓު ނަގާ އިރު ވިސްނަން ޖެހޭ ވަރަށް ބައިވަރު ކަންކަން ހުރި ކަމަށް އޭނާ ވިދާޅުވި އެވެ. ޒިޔާދު ވިދާޅުވީ ބޭރު ޤައުމުތަކުގައި ވެސް މިޑް ޓަރމް އިލެކްޝަން އެއް ބާއްވާ ސަބަބަކީ ރައްޔިތުންނަށް ބާރުވެރިކަން ދިނުން ކަމަށެވެ. އެހެންވީމަ އިންތިޚާބުތައް އެއްކޮށްލުމަށް އާއެކޭ ބުނެގެން ނުވާނެ ކަަމަށް ޒިޔާދު ވިދާޅުވި އެވެ.