ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ތާރީޚެއްގައި ބޭއްވުމާ މެދު ގޮތެއް ނިންމުމަށް ރެފަރެންޑަމް ވޯޓެއް ނެގުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ނެރުއްވި ޤަރާރު ބާތިލު ކުރުމަށް ކޯޓަށް މައްސަލަ ހުށަހަަޅަން، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ނިންމައިފި އެވެ.
އެމްޑީޕީގެ ފަރާތުންް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އެކަން ހާމަ ކުރެއްވީ، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޛާކިރު އެވެ. އެގޮތުން މައުރޫފް ވިދާޅުވީ، އެ ޤަރާރު ދިރާސާކޮށް ބެލުމަށް ފަހު، އެއީ ޤާނޫނާ ޚިލާފު ޤަރާރެއް ކަމަށް ކަނޑައަޅައި ދިނުމަށް އެދި އަންގާރަ ދުވަހު ކޯޓަށް ހުށަހަޅާ ކަމަށެވެ.
އެއާ އެކު މައުރޫފް ވިދާޅުވީ، އެ ޤަރާރަށް ގޮތެއް ނިންމުމުގެ ކުރިން، ފެންނަ ނުފެންނަ ވޯޓު ނެގުން ހުއްޓުވުމަށް އެކަމާ ގުޅޭ ގޮތުން ވަގުތީ އަމުރެއް ނެރެން ޖެހޭ ކަމަށެވެ. އެހެން ނޫން ނަމަ، ދިވެހި ރައްޔިތުންނާއި، ދިވެހި ރާއްޖެ އަށް އިއާދަ ނުކުރެވޭ ވަރުގެ ބޮޑު ގެއްލުމެއް ކުރިމަތި ވެދާނެ ކަމަށް ވެސް މައުރޫފް ވިދާޅުވި އެވެ.
ނޫސްވެރިންގެ ބައްދަލުވުމުގައި މައުރޫފް ވިދާޅުވީ، އެކަން ހުއްޓުވުމަށްޓަކައި އެމްޑީޕީ އިން ގިނަ މަސައްކަތް ތަކެއް ކުރަމުން ގެންދާނެ ކަމަށެވެ. އެގޮތުން މުޅި ރާއްޖޭގައި ކެމްޕެއިން ކުރިއަށް ގެންދިޔުމަށް ނިންމާފައިވާއިރު، މާޗު މަހުގެ 21 ވަނަ ދުވަހު އެކަމާ ދެކޮޅަށް ބޮޑު މުޒާހަރާއެއް ކުރުމަށް ނިންމާފައިވާ ކަމަށް މައުރޫފް ވިދާޅުވި އެވެ.
މައުރޫފް ވިދާޅުވީ، ހުދުމުޚުތާރު ވެރިކަމަކަށް ރާއްޖެ އަނބުރާލުމަށް ކުރާ މަސައްކަތާ ދެކޮޅަށް ދިވެހި ރައްޔިތުން ތެދުވާން ޖެހޭ ކަމަށާއި، އެކަމުގައި އެމްޑީޕީ އިން ކުރަމުން އަންނަ މަސައްކަތުގައި ބައިވެރިވެ، ދެ އިންތިޚާބު އެއްކޮށްލުމަށް ނޫނެކޭ ބުނަން ޖެހޭ ކަމަށް މައުރޫފް ވަނީ ވިދާޅުވެފަ އެވެ.
ދެ އިންތިޚާބު އެއްކޮލުމަށް ނަގާ ރެފަރަންޑަމްއާ ގުޅޭ ޤަރާރު ރައީސް މުޢިއްޒު ނެރުއްވާފައި ވަނީ، ފެބްވަރުވަރީ މަހުގެ 16 ވީ ހޯމަ ދުވަހު އެވެ.