ގދ. ނަޑެއްލާގެ ގިނަ ރުއްތަކަކަށް ބައްޔެއް ޖެހި، އެ ރުއްތައް ބަލިވަމުން އަންނަ މައްސަލައިގައި އެރަށުގެ ރައްޔިތުން ކަންބޮޑުވާން ފަށަައިފިއެވެ.
ރާއްޖެއެމްވީ.އަށް މައުލޫމާތު ދިން އެރަށުގެ މީހަކު ބުނީ، ރަށުގެ ބިމުން ބޮޑު ބައެއްގައި ހުންނަ ރުއްތަކުގައި ބައްޔެއް ޖަހާފައިވާ ކަމަށް ރުއްތައް ވަރަށް ބޮޑަށް ބަލި ވެފައިވާ ކަމަށެވެ. މިއީ ކަންބޮޑުވާ މައްސަލައެއް ކަމަށާއި، އަވަސް ހެއްލެއް ބޭނުންވާ ކަމަށް އޭނާ ބުންޏެވެ.
އޭނާ ބުނީ، ރުއްތަކުގައި ބަލި ޖެހުމުގެ ސަބަބުން ކާށި، ކުރުނބާ އެއްޗެހި ލިބުމުގައި ދަތިވެފައިވާ ކަމަށެވެ.
މި މައްސަލައާ ގުޅިގެން އެރަށުގެ ކައުންސިލްގެ ރައީސް މުޙައްމަދު އަންޝާއު ވިދާޅުވީ ރަށު ތެރޭގައި ހުރި ގިނަ ރުއްތަކަކަށް ބަލި ޖެހިފައިވާ ކަމަށާއި، ދުވަސްދުވަހުން މި ބަލި ވަރަށް ބޮޑަށް ރުއްތަކުގައި ފެތުރޭ ކަމަށެވެ. ރުއްތަކުގައި ފެތުރެމުން ދަނީ ހަކުރު ބަލި ނަމަކަށް ކިޔާ ބައްޔެއް ކަމަށާއި، ރުއްތަކުން މި ބަލި ފިލުވުމަށް ބޭސް ޖަހައި ބޮޑު ހަރަދެއް ކުރަން ޖެހޭނެ ކަމަށް އޭނާ ވިދާޅުވި އެވެ.
އެހެންކަމުން މި ރުއްތަކަށް ބަލި ޖެހި ހަލާކުވާ މައްސަލަ ވަރަށް އަވަހަށް ސަރުކާރަށް ހުށަހަޅާނެ ކަމަށް ކައުންސިލުން ބުނެ އެވެ. އަދި އަހަރުތަކަކުން ހެދި ބޮޑުވާ އަދި އެތައް އަހަރަކަށް ދެމިގެންދާ މި ބަލިން ރުއް ސަލާމަތް ކުރަން ބޭނުންވާ ކަމަށް ކައުންސިލުން ބުނެ އެވެ.
ނަޑެއްލާގެ ގިނަ ރުއްތަކަށް ބައްޔެއް ފެތުރެމުންދާއިރު، ރާއްޖޭގެ ބައެއް ރަށްރަށުގެ ރުއްތަކުގައި ދޭތެރެދޭތެރެއިން ބަލި ފެތުރޭ މައްސަލަ ބޮޑުވެގެން ދެ އެވެ.
އެގޮތުން ރުއްތަކުގެ ފަންތަކުގައި ކަޅު ކޫޑި އަޅައި މަޑި ކަހަލަ ސުއިއްޕެއްގެ ސަބަބުން، ރުކުގެ ބޮންތި އެއްކޮށް ހިކި، ރުއްތައް ހަލާކުވެގެން ދެ އެވެ. އޭގެ ސަބަބުން ރުކުގައި އެއްވެސް އެއްޗެއް ނާޅަ އެވެ.