ފުލުހުންގެ ބެލުމުގެ ދަށުގައި ހުރި ދެ މިލިއަން
ރުފިޔާގެ ހުއިފިލަނޑާތައް ނީލަން ކިޔަން އިއުލާނުކުރީ އެތަކެތި ބެލެހެއްޓޭނެ
ވަސީލަތް ނެތުމުން ކަމަށާއި، ތަކެތީގެ ވެރިފަރާތް ކަނޑައެޅުމުން އެތަކެތި ވިއްކައިގެން
ލިބޭ ފައިސާ ޙަވާލު ކުރާނެކަމަށް ދާޚިލީ ވަޒީރު އަލީ އިޙްސާން ވިދާޅުވެއްޖެއެވެ.
ބުރާސްފަތި ދުވަހު އޮތް ނޫސްވެރިންގެ
ބައްދަލުވުމުގައި ރާއްޖެޓީވީން ކުރި ސުވާލަށް ޖަވާބު ދެއްވަމުން މިނިސްޓަރ
ވިދާޅުވީ، އެ މައްސަލައިގައި ކަން ހިނގާފައިވާގޮތް ބައްލަވާފައިވާނެ ކަމަށެވެ.
އަދި ވިދާޅުވީ، އެތަކެއްޗަކީ ފުލުހުންގެ އޮފިސަރަކު އަމިއްލަ މަސައްކަތެއްގެ
ގޮތުގައި ތިލަފުށީގައި ހިންގަމުން އައި ގުދަނެއްގައި ހުރި ތަކެތިކަމަށް މައުލޫމާތު
ލިބިފައިވާ ކަމަށާއި، އޭގެ ތެރޭގައި އެހެން ބައެއްގެ ބޭނުމަށްޓަކައި
ރައްކާކޮށްފައިވާ ތަކެތިވެސް ހުރިކަމަށް މައުލޫމާތު ލިބޭ ކަމަށެވެ.
ފުލުހުންގެ އޮފިސަރަކު އަމިއްލަ މަސައްކަތެއްގެ ގޮތުގައި ތިލަފުށީގައި ހިންގަމުން އައި ގުދަނެއްކަމަށް އަޅުގަނޑުމެންނަށް މައުލޫމާތު ލިބެނީ، އެ ގުދަނުގައި އެހެން ފަރާތަކުން ހުއިފިލަނޑާތަކެއް މި ބަހައްޓަނީ، ބެހެއްޓިއިރު އޭގެ ތެރޭގައި އެބަ އުޅޭ އެހެން ބައެއްގެވެސް ބޭނުމަށްޓަކައި ރައްކާކޮށްފައިވާ ހުއިފިލަނޑާ، މި ހުރިހާ އެއްޗެއް އެއްފަހަރާ މާލޭގެ އެހެން ތަނަކަށް މޫވްކުރެވިފައި ހުއްޓައި ފެނިގެން ފުލުހުންނަށް ރިޕޯޓު ކުރީމާ އެތަކެއްޗާ ފުލުހުން ހަވާލުވެފައި ފުލުހުންގެ ކަސްޓަޑީއަށް ގެނެސްފައި އެހިސާބުން މައްސަލަ ތަހުގީގު ކުރަމުން ދިޔައީދާޚިލީ ވަޒީރު އަލީ އިޙްސާން
މިނިސްޓަރ ވިދާޅުވީ، މައްސަލަ ތަހުގީގު ކުރަމުންދިޔައިރު
ހުއިފިލަނޑާގެ ވެރިފަރާތުގެ ގޮތުގައި ދައުވާ ކުރާ ފަރާތްތަކަށް ކަށަވަރުކޮށް
އެކަން ޔަޤީންކޮށް ނުދެވޭ ކަމަށާއި، އެތަނުގައި ހުރި ހުރިހާ ތަކެއްޗަކީ އެ ދައުވާ
ކުރާ މީހުންގެ ތަކެތި ނޫންކަމަށްވެސް އެމީހުން އެއްބަސްވާ ކަމަށެވެ.
އެހިސާބުން ޤާނޫނުގެ ދަށުން އެތަކެތީގެ ވެރިފަރާތް ކަނޑައަޅަން
ޖެހޭ ކަމަށާއި، ނަމަވެސް އެތަކެތީގެ ޒާތުން އެއީ ހަލާކުވާ ތަކެތިކަމަށްވާތީ ޕްރޮސެކިއުޓަރ
ޖެނެރަލް އޮފީހުގެ ލަފަޔާއެކު އެތަކެތި ނީލަން ކިއުމުގެ މަސައްކަތް ފެށީ ކަމަށް
މިނިސްޓަރ ވިދާޅުވިއެވެ. އެގޮތުން އޭގެ ތެރޭގައި ދިރިހުރި ތަކެއްޗާއި ހިއްކާފައި
ހުރި ތަކެތިވެސް ހުރިކަން ފާހަގަ ކުރައްވައި މިނިސްޓަރ ވިދާޅުވީ، އެތަކެތި ބެލެހެއްޓޭނެ
ވަސީލަތްތަކެއް ފުލުހުންގެ ތެރޭގައިވެސް ޤާއިމުވެފައި ނެތް ކަމަށެވެ.
އެހެންކަމުން އެތަކެތި ވިއްކުމަށްފަހު ލިބޭ ފައިސާ
ދޭނީ ތަކެތީގެ ވެރިފަރާތަށްކަމަށްވެސް މިނިސްޓަރ ވިދާޅުވިއެވެ.
އަޅުގަނޑުމެން ނިންމީ މިތަކެތި ނީލަން ކިޔާފައި ފައިސާއަށް ކޮންވަރޓް ކޮށްފައި އެ ފައިސާ ބަހައްޓަން، އޭރުން މައްސަލަ ނިމިގެން އެ ޙައްޤުވެރި ފަރާތަކަށް ހަވާލު ކުރެވޭއިރު އަޅުގަނޑުމެން އެ ފައިސާ ހަވާލުކުރާނީދާޚިލީ ވަޒީރު އަލީ އިޙްސާން
މިނިސްޓަރ ވިދާޅުވީ، ފުލުހުންގެ ތެރޭގައިވެސް އަޚުލާގީ އަދި ސުލޫކީ މައްސަލަތައް ހުންނަ ކަމަށާއި، އެކަމާ ގުޅިގެން އަޅަންޖެހޭ ފިޔަވަޅުތައްވެސް އަޅަމުންދާ ކަމަށެވެ. އަދި ވަކި ފުލުހުންތަކެއް ކުރާ ކަމެއްގެ ސަބަބުން މުޅި މުއައްސަސާ ގޯސް ކުރުމަކީ ރަނގަޅު ގޮތެއް ނޫންކަމަށްވެސް ވިދާޅުވިއެވެ.