ސްރީލަންކާގެ ލީޑަރޝިޕް ޑިވެލޮޕްމަންޓް އަދި ކޯޗިންގ ކުންފުންޏެއް ކަމަށްވާ "ސްމާޓް ކުއެސްޓް" ގެ ޚިދުމަތްތައް ރާއްޖެއަށް ފުޅާކޮށްފި އެވެ. މިއީ އެ ކުންފުންޏަށް 20 އަހަރު ފުރުން ފާހަގަކުރަމުންދާ ދަނޑިވަޅެއްގައި، ގައުމުން ބޭރުގައި ފެށި ފުރަތަމަ މަޝްރޫއެވެ. އަލަށް އުފެއްދި "ސްމާޓް ކުއެސްޓް ކޯޗިންގ އެންޑް ކޮންސަލްޓިންގ (ޕްރައިވެޓް) ލިމިޓެޑް މޯލްޑިވްސް" މެދުވެރިކޮށް، ރާއްޖޭގެ އެކި މުއައްސަސާތަކާއި ފަންނީ ބޭފުޅުންނަށް ލީޑަރޝިޕް ތަމްރީނުތަކާއި، ޕްރޮފެޝަނަލް ކޯޗިންގ ސެޓިފިކޭޝަނާއި، އެގްޒެކެޓިވް އަދި ޓީމް ކޯޗިންގގެ އިތުރުން ހިއުމަން ރިސޯސް ކޮންސަލްޓެންސީގެ ޚިދުމަތްތައް ފޯރުކޮށްދޭނެ ކަމަށް ބުނެފައިވެ އެވެ.
ރާއްޖޭގައި ފަށާ މި މަސައްކަތުގެ ދަށުން، ސްމާޓް ކުއެސްޓްގެ މަގުބޫލު ލީޑަރޝިޕް އަދި ކޯޗިންގ ޕްރޮގްރާމްތައް ތައާރަފުކުރާނެ ކަމަށް އެކުންފުނިން ބުނެ އެވެ. މީގެ ތެރޭގައި އިންޓަރނޭޝަނަލް ކޯޗިންގ ފެޑަރޭޝަން (އައި.ސީ.އެފް) ލެވެލް 1 ގެ އެކްރެޑިޓޭޝަން ލިބިފައިވާ "ލީޑިންގ ވިތު އިމްޕެކްޓް" ޕްރޮގްރާމް ހިމެނެ އެވެ. މިއީ މަސައްކަތުގެ މާހައުލުގައި މެނޭޖަރުންނަށް ބޭނުންވާނެ އަމަލީ ކޯޗިންގ ހުނަރުތައް ދަސްކޮށްދިނުމަށް ފަރުމާކޮށްފައިވާ ޕްރޮގްރާމެކެވެ. މި ތަމްރީނު ފުރިހަމަކުރާ ފަރާތްތަކަށް "ސެޓިފައިޑް ޓްރެއިންޑް ކޯޗިންގ ލީޑަރ" ކްރެޑެންޝަލް ހާސިލުކުރުމަށް ބޭނުންވާ 16 ގަޑިއިރުގެ ޕްރޮފެޝަނަލް ކޯޗު ތަމްރީނު ލިބޭނެ ކަމަށް ވެސް ބުނެފައިވެ އެވެ. މި ޕްރޮގްރާމަކީ މުއާމަލާތްކުރުމުގެ ހުނަރާއި، މުވައްޒަފުންގެ ބައިވެރިވުން އިތުރުކުރުމާއި، ޓީމުތަކުގެ މަސައްކަތުގެ ފެންވަރު ރަނގަޅުކުރަން ބޭނުންވާ ވިޔަފާރިވެރިންނާއި މެނޭޖަރުންނަށް އަމާޒުކޮށްގެން ހިންގާ ޕްރޮގްރާމެކެވެ.
މީގެ އިތުރުން، "ކޯޗު މާސްޓަރސް އެކަޑަމީ" މެދުވެރިކޮށް ހިންގާ ޕްރޮފެޝަނަލް ކޯޗިންގ ސެޓިފިކޭޝަން ޕްރޮގްރާމްތަކުގައި ބައިވެރިވުމުގެ ފުރުސަތުވެސް ސްމާޓް ކުއެސްޓް މޯލްޑިވްސްއިން ފަހިކޮށްދޭނެއެވެ. އޮންލައިންކޮށް ކުރިއަށްގެންދާ މި ޕްރޮގްރާމްތަކަކީ އިންޓަރނޭޝަނަލް ކޯޗު ފެޑަރޭޝަން (އައި.ސީ.އެފް) ގެ އެސޯސިއޭޓް ސެޓިފައިޑް ކޯޗު (އޭ.ސީ.ސީ) އިން ފެށިގެން ޕްރޮފެޝަނަލް ސެޓިފައިޑް ކޯޗު (ޕީ.ސީ.ސީ) އަދި މާސްޓަރ ސެޓިފައިޑް ކޯޗު (އެމް.ސީ.ސީ) ފެންވަރަށް ކްރެޑެންޝަލް ހާސިލުކުރުމުގެ މަގު ފަހިކޮށްދޭ ޕްރޮގްރާމްތަކެކެވެ. މީގެ ތެރޭގައި ސެޓިފައިޑް ކޯޗު ކްރެޑެންޝަލް އާއި ޕްރޮފެޝަނަލް ކޯޗިންގ އެންޑް ލީޑަރޝިޕް ޑިވެލޮޕްމަންޓުން ގްރެޖުއޭޓް ޑިޕްލޮމާ ހާސިލުކުރުމުގެ ފުރުސަތު ވެސް ހިމެނެ އެވެ.
ސްރީލަންކާގެ ކޮލަމްބޯގައި 2006 ވަނަ އަހަރު އުފެއްދި ސްމާޓް ކުއެސްޓަކީ އެ ގައުމުގައި ޕްރޮފެޝަނަލް ކޯޗިންގ އާއި ހުނަރު ތަރައްގީކުރުމުގެ ޚިދުމަތް އެންމެ ފުރަތަމަ ތައާރަފުކުރި ކުންފުނިތަކުގެ ތެރޭގައި ހިމެނޭ ކުންފުންޏެކެވެ. އެ ކުންފުނިން މިހާތަނަށް ލަންކާގެ އެކި ކުންފުނިތަކާއި ބައިނަލްއަގުވާމީ 600 އަށްވުރެ ގިނަ މުއައްސަސާއާއެކު މަސައްކަތްކޮށް، 10،000 އަށްވުރެ ގިނަ ފަރުދުންގެ ފަންނީ ތަރައްގީއަށް އެހީތެރިކަން ފޯރުކޮށްދީފައިވެ އެވެ. ރާއްޖެއަށް މި ޚިދުމަތް ފުޅާކުރުމަކީ އެ ކުންފުނީގެ ސަރަހައްދީ ކުރިއެރުމުގެ ސިޔާސަތުގެ ދަށުން އެޅުނު މުހިންމު ފިޔަވަޅެއް ކަމަށް ބުނެ އެވެ. މީގެ މައިގަނޑު މަގްސަދަކީ ރާއްޖޭގެ ވަޒީފާގެ ބާޒާރުގައި ތިބި ފަރާތްތަކުގެ ފަންނީ ގާބިލުކަން އިތުރުކޮށް، އެކި ދާއިރާތަކުގެ މުއައްސަސާތަކުގެ ހިންގުން ހަރުދަނާކުރުމަށް އެހީތެރިވެދިނުމެވެ.