30 Jan 2018, 00:08
ދައުލަތަށް ދައްކަން ޖެހޭ އެތައް މިލިއަން ޑޮލަރުގެ ޓެކްސް ނުދައްކައިގެ ވިލާ ގްރޫޕުގެ ރިސޯޓުތަކާ މެދު ސަރުކާރުން ފިޔަވަޅު އަޅަމުން ދަނީ ދެން ތިބި ވިޔަފާރިވެރިންނާއި ރާއްޖޭގެ އިގްތިސާދުގެ ހައްގުގައި ކަމަށް ޓޫރިޒަމް މިނިސްޓަރު އަދި ޕީޕީއެމްގެ ނައިބް ރައީސް މޫސާ ޒަމީރު ވިދާޅުވެއްޖެއެވެ.
ވިލާ ގުރޫޕުގެ ހަތަރު ރިސޯޓަކަށް ގަވައިދާ ޚިލާފަށް ބަނގުރާ އެތެރެކޮށްފައިވާ ކަމަށް ބުނެ ކަސްޓަމްސް އާއި ފުލުހުން ވަނީ އެތަންތަން ބަލައި ފާސްކޮށްފައެވެ. އަދި ވިލާގެ ފަން އައިލެންޑް ރިސޯޓުގައި ހުރި ބައެއް ބަނގުރާވެސް ވަނީ ކަސްޓަމްސްގެ ބެލުމުގެ ދަށަށް ގެންގޮސްފައެވެ.
ޕީޕީއެމްގެ ރުމާލު2 ޖަގަހައިގައި މިރޭ ބޭއްވި ޖަލްސާގައި މިނިސްޓަރު ޒަމީރު ވިދާޅުވީ ވިލާގެ ފަސް ރިސޯޓުން ދައުލަތަށް ޓެކްސް ދައްކާފައިނުވާތީ އެ ފައިސާ ހޯދަން ދައުލަތުން ވަނީ ދައުވާކޮށްފައި ކަމަށެވެ. އަދި ވިލާގެ ރިސޯޓުތަކުން ޓެކްސްގެ ގޮތުގައި ލިބެންޖެހޭ 2.9 ބިލިއަން ރުފިޔާ އަކީ ރައްޔިތުންގެ ފައިސާ ކަމަށް ޒަމީރު ވިދާޅުވިއެވެ.
"ރިސޯޓުތައް ނަހަދައި އެކިފަހަރު މަތިން ސެޓެލްމަންޓް އެގްރިމެންޓް ހަދައިގެން މިއަދާ ހިސާބަށް ވެސް އެތިބީ. މިއީ އަޅުގަނޑު އަމިއްލަ އަށް ދައްކާ ވާހަކަ އެއް ނޫން. މިއީ މީރާގެ ވެބްސައިޓުގައި ވާ ވާހަކަ އެއް. މީރާއިން ކޯޓަށް ހުށަހަޅާފައިވާ މައްސަލައެއްގެ ވާހަކަ މިއީ. އަޅުގަނޑުމެން މިއުޅެނީ ވަކި ކުންފުންޏަކާ ޖައްސާލައިގެނެއް ނޫން،" ޒަމީރު ވިދާޅުވިއެވެ.
"އިކޮނޮމިސްޓުން ބުނާގޮތުގައި މިތަންތަން ނުހަދާ ބެހެއްޓުމުން 13 ބިލިއަން ރުފިޔާގެ ގެއްލުމެއް ވެފައިވާ ކަމަށް. މިއަދު އަޅުގަނޑުމެން 2.9 ބިލިއަން ރުފިޔާގެ މައްސަލައެއް ކޯޓަށް ހުށައެޅުމަކީ އެމީހުންގެ ފަހަތުން ދިއުމެއް ނޫން. އެއީ އަޅުގަނޑުމެންގެ ވިޔަފާރިވެރިންނާއި އިގްތިސާދުގެ ހައްގުގައި ކުރާ ކަމެއް." ޒަމީރު ވިދާޅުވިއެވެ.
ޕީޕީއެމްގެ ރިޔާސީ ކެންޑިޑޭޓުގެ ގޮތުގައި ރައީސް ޔާމީން ނިކުންނާނީ އިންތިހާބު ކާމިޔާބު ކުރަން ކަމަށާއި އިގްތިސާދީ ގޮތުން ރާއްޖެ އަނދަވަޅަކަށް ވެއްޓިއްޖެނަމަ އެކަމުން ރާއްޖެ ސަލާމަތް ކުރެވޭނީ ވެސް ރައީސް ޔާމީނަށް ކަމަށެވެ.
"ރާއްޖޭގެ ވިޔަފާރި އަށް އޮތް އެންމެ ބޮޑު ގޮންޖެހުމަކީ ގާނޫނާއި ގަވާއިދުތަކާއި އެއްގޮތަށް ޓެކްސް ނުދައްކާ މައްސަލަ. އެކަމަކު ގަބޫލު ކުރަން ޖެހޭ ހަގީގަތަކީ ރާއްޖޭގެ އިގްތިސާދުގެ ހައްގުގައި ކުރަން ޖެހޭ ކަމެއް ކުރާނެ. އަޅަން ޖެހޭ ފިޔަވަޅެއް އަޅާނެ،" ޒަމީރު ވިދާޅުވިއެވެ.
ޓޫރިޒަމް މިނިސްޓަރު ވިދާޅުވީ ގިނަ ބަޔަކު ޓެކްސް ނުދައްކައިފިނަމަ ރާއްޖޭގެ އެއްވެސް ރަށެއް ތަރައްގީއެއް ނުކުރެވޭނެ ކަމަށާއި ވެލާނާ އިންޓަނޭޝަނަލް އެއާޕޯޓު ތަރައްގީކުރަން ނަގާފައިވާ ލޯނުވެސް ނުދެއްކޭނެ ކަމަށެވެ. އެހެންކަމުން އެ ހުރިހާ ކަމަށް ބަލާފައި ދައުލަތުގެ ޓެކްސް އިދާރާ، މީރާގެ އެންފޯސްމެންޓާ އެއްގޮތަށް އަމަލުކުރުން މުހިންމު ކަމަށް އޭނާ ވިދާޅުވިއެވެ.
މިރާއިން ބުނެފައިވަނީ ވިލާ ގުރޫޕުގެ ހަތަރު ރިސޯޓަކުން ޖީއެސްޓީ އަދި ގްރީން ޓެކްސް ނުދައްކާތާ 10 މަސްވެފައިވާ ކަމަށެވެ. ޓެކްސްއަށް ޖުމްލަ 5.1 މިލިއަން ޑޮލަރު ވިލާ ގުރޫޕުން ދައްކަން ޖެހޭ ކަމަށް މީރާއިން ވަނީ ބުނެފައެވެ. އެ މައްސަލަތައް މިހާރު ވަނީ ކޯޓަށް ހުށަހަޅާފައެވެ.