27 Feb 2018, 20:36
އާސެނަލްގެ ކޯޗުކަމުގެ މަގާމަށް ޝައުގުވެރިކަން އެބަހުރި ކަމަށް އެ ކްލަބުގެ ލެޖެންޑް، ތިއަރީ އޮންރީ ބުނެފިއެވެ.
މިވަގުތު ބެލްޖިއަމް ގައުމީ ޓީމުގެ އެސިސްޓެންޓް ކޯޗު ކަމުގެ މަގާމުގައި ހުރި، ކުރީގެ ކާމިޔާބު ފޯވަޑް އޮންރީ ބުނީ ބެލްޖިއަމްއާއެކު މިވަގުތު ހުރި ނަމަވެސް އާސެނަލަށް ކޯޗުކަން ކޮށްދިނުމަކީ އޭނާ އަބަދުވެސް ދެކެމުން އަންނަ ހުވަފެނެއް ކަމަށެވެ.
"އާސެނަލަށް ކޯޗުކޮށްދިނުމަކީ އަބަދުވެސް ދެކެމުން އަންނަ ހުވަފެނެއް. އެހެން ނަމަވެސް މިވަގުތު މިހުރީ ބެލްޖިއަމްގެ އެސިސްޓެންޓް ކޯޗެއްގެ މަގާމެއްގައި. އެހެން ނަމަވެސް ޝައުގުވެރިކަން އެބަހުރި. ކޮންމެ މީހަކުވެސް އެފަދަ އޮފާއަކަށް ޝައުގުވެރިވާނެ،" އޮންރީ ބުންޏެވެ.
އޮންރީ ބުނީ އާސެނަލްގައި މިވަގުތު ހުރި ކޯޗު އާސެން ވެންގާއަކީ އޭނާ ވަރަށް އިހުތިރާމް ކުރާ ކޯޗެއް ކަމަށާއި، ވެންގާއަށް ދޭ އިހުތިރާމެއްގެ ސަބަބުން މާ ބޮޑަށް އާސެނަލްގެ ކޯޗުކަމުގެ ވާހަކަ ދައްކަން ބޭނުން ނުވާކަމަށެވެ.
މީޑިއާތަކުގައި އަޑު ފެތުރިފައިވާ ގޮތުން އޮންރީއަކީ އާސެނަލްގެ ބޯޑުގައި ހިމެނޭ ޖޯޝް ރޮއެންކޭގެ ފެވަރިޓް ކޯޗެކެވެ. ރެއެންކޭއަކީ އާސެނަލްގެ އެންމެ ބޮޑު ޝެއާ ހޯލްޑަރު ކަމަށްވާ ސްޓޭން ރެއެންކޭގެ ދަރިއެކެވެ.
ވެންގާ އާސެނަލްގެ ކޯޗުކަމާ ހަވާލުވެފައިވަނީ 1996 ވަނަ އަހަރުގައެވެ. އާސެނަލްއާއެކު ތިން ފަހަރަށް ޕްރިމިއާ ލީގު ހުޅުވާލައިފައިވާއިރު، އެންމެފަހުން އެޓީމު ލީގު އުފުލާލައިފައިވަނީ 2004 ވަނަ އަހަރުގައެވެ. މިދިޔަ އަހަރާއި 2014 އަދި 2015 ވަނަ އަހަރުވެސް ވެންގާގެ އިރުޝާދުގެ ދަށުން އާސެނަލުން އެފްއޭ ކަޕް އުފުލާލައިފައިވާއިރު ސަޕޯޓަރުން އަންނަނީ އޭނާއާ ދެކޮޅަށް އަޑު އުފުލަމުންނެވެ.