08 Mar 2018, 11:33
މުޖުތަމައުއަށް އަގުހުރި ހިދުމަތްތަކެއް ކޮށްދެއްވާފައިވާ ކަނބަލުންގެ އަގު ވަޒަން ކުރުމުގެ ގޮތުން ސަރުކާރުން ދޭ "ރެހެންދި އެވޯޑު"، މި އަހަރު ތިން ކަނބަލަކަށް ލިބިއްޖެއެވެ.
މި އަހަރުގެ ބައިނަލްއަގުވާމީ އަންހެނުންގެ ދުވަހުގެ މުނާސަބަތުގައި މިއަދު ބޭއްވި ރަސްމީ ޖަލްސާގައި ވަނީ ރެހެންދި އެވޯޑު ދީފައެވެ. އެވޯޑު ދެއްވީ ރައީސުލްޖުމްހޫރިއްޔާގެ ނައިބު އަބްދުﷲ ޖިހާދެވެ.
2018 ވަނަ އަހަރު ރެހެންދި އެވޯޑު ލިބިވަޑައިގެންނެވި އައިޖީއެމްއެޗުގެ ބްލަށޑް ސާވިސަސް ޑިރެކްޓަރ އައިމިނަތު ވަހީދާ -- ސަން ފޮޓޯ/ މުހައްމަދު އަފްރާހު
މި އަހަރުގެ ރެހެންދި އެވޯޑު ލިބިލެއްވި ފުރަތަމަ ކަނބަލަކީ ރާއްޖޭގެ ސިއްހީ ދާއިރާއަށް މެދުކެނޑުމެއް ނެތި 49 އަހަރު ޚިދުމަތް ކޮށްދެއްވަމުން ގެންދަވާ، އަދި އިންދިރާ ގާންދީ މެމޯރިއަލް ހޮސްޕިޓަލްގެ ބްލަޑް ސާވިސަސްގެ ޑިރެކްޓަރުކަން ކުރައްވާ އައިމިނަތު ވަހީދާ (އައިންތު ސިސްޓާ)އެވެ.
އޭނާއަށް ރެހެންދި އެވޯޑު ލިބިވަޑައިގަތީ، އޮފީސް ނުވަތަ މަސައްކަތުގެ ދާއިރާއަށް ކޮށްދެއްވާފައިވާ ޚިދުމަތުގެ ދާއިރާއިންނެވެ.
2018 ވަނަ އަހަރު ރެހެންދި އެވޯޑު ލިބިވަޑައިގެންނެވި އިންސްޕެކްޓަރ އޮފް ޕޮލިސް ފާތިމަތު ނަޝްވާ -- ސަން ފޮޓޯ/ މުހައްމަދު އަފްރާހު
ރެހެންދި އެވޯޑު ލިބިލެއްވި ދެވަނަ ކަނބަލަކީ މޯލްޑިވްސް ޕޮލިސް ސާވިސްގެ އިންސްޕެކްޓާ އޮފް ޕޮލިސް ފާތިމަތު ނަޝްވާއެވެ. ނަޝްވާގެ އިސްނެގުމުގެ މަތިން ފުލުހުންގެ މުއައްސަސާ އިން ވަނީ އިޖުތިމާއީ ގިނަ ޕްރޮގްރާމުތަކެއް ފަރުމާކޮށްފައެވެ. އަދި އޭނާ ވަނީ 900 އަށް ވުރެ ގިނަ ފުލުހުން ބިނާކުރުމުގެ މަސައްކަތް ކުރައްވައި، އަދި އަމިއްލަ ޖަމިއްޔާތަކުން ޒުވާނުން ބިނާކުރުމަށް ބާއްވާ ވޯކްޝޮޕްތަކުގައި ސެޝަންތައް ނަންގަވައިދެއްވަމުންނެވެ. ނަޝްވާ ވަނީ ފުލުހުންގެ މުއައްސަސާއަށް 22 އަހަރު ޚިދުމަތް ކޮށްދެއްވައިފައެވެ.
އައިމިނަތު ވަހީދާ އަދި ފާތިމަތު ނަޝްވާއަށް ރެހެންދި އެވޯޑު ލިބިވަޑައިގަތީ އޮފީސް ނުވަތަ މަސައްކަތުގެ ދާއިރާއަށް ކޮށްދެއްވާފައިވާ ޚިދުމަތުގެ ދާއިރާއިންނެވެ.
2018 ވަނަ އަހަރު ރެހެންދި އެވޯޑު ލިބިވަޑައިގެންނެވި ޑައިވިންގް އިންސްޓްރަކްޓަރު ޒޫނާ ނަސީމް -- ސަން ފޮޓޯ/ މުހައްމަދު އަފްރާހު
ދެން އެވޯޑު ހާސިލުކުރެއްވި ޒޫނާ ނަސީމަކީ ޑައިވިންގްގެ ދާއިރާއަށް 23 އަހަރުގެ ޚިދުމަތް ކޮށްދެއްވި ފަރާތެކެވެ. ޕްރޮފެޝަނަލް އެކެޑެމީ އޮފް ޑައިވިންގް އިންސްޓްރަކްޓާސް (ޕަޑީ)ގެ ކޯސް ޑިރެކްޓަރުކަން ފުރިހަމަކުރެއްވި ހަމައެކަނި ދެ ދިވެހީންގެ ތެރޭގައި ހިމެނޭ ހަމައެކަނި ކަނބަލެވެ.
ނަވާރަސަތޭކަ ނުވަދިހަ ހަވަނަ އަހަރު ޑައިވިންގް އިންސްޓްރަކްޓަރުކަމުގެ ސެޓްފިކޭޓް ހޯއްދަވައި، މިހާތަނަށް 11،000 ޑައިވަރުން އޭނާ ޓްރެއިން ކުރައްވާފައިވެއެވެ. އަންހެނުން އާންމުކޮށް ކޮށް ނޫޅޭ މަސައްކަތުގެ ދާއިރާއިން ރެހެންދި އެވޯޑު ހޯއްދެވި ޒޫނާ ވަނީ ޑައިވަރުންގެ ޖަމިއްޔާގެ ރައީސާގެ މަގާމު ފަސް އަހަރު ދުވަހު ކުރައްވައިފައެވެ.