މިލާން ބަލިކޮށް، އާސެނަލާއި ވެންގާގެ ޕްރެޝަރުތަކަށް ލުޔެއް

09 Mar 2018, 10:42

ޔޫއެފާ ޔޫރޮޕާ ލީގުގައި އޭސީ މިލާން ބަލިކޮށް، އާސެނަލާއި ކޯޗު އާސެން ވެންގާއަށް ކުރިމަތިވެފައިވާ ޕްރެޝަރުތަކަށް ލުޔެއް ހޯދައިފިއެވެ.

ރަށުން ބޭރުގައި ރޭ ކުޅުނު ޔޫރޮޕާ ލީގުގެ ގަދަ 16ގެ ފުރަތަަމަ ލެގު މެޗުގައި މިލާންގެ މައްޗަށް އާސެނަލުން ކުރި ހޯދާފައިވަނީ 2-0ގެ ނަތީޖާއަކުންނެވެ. އެ މެޗަށް ނުކުތް އިރު، އާސެނަލް އެންމެ ފަހުން ކުޅުނު ހަތަރު މެޗުންވެސް ވަނީ ބަލިވެފައެވެ. އަދި މިލާން އެންމެ ފަހުން ކުޅުނު 13 މެޗު ނިންމާލީ ބައްޔަކާ ނުލައެވެ.

ޔޫރޮޕާ ލީގުގައި މިލާނާއި އާސެނަލް ބައްދަލުކުރި މެޗުގެ ތެރެއިން: އެ މެޗުން އާސެނަލް މޮޅުވީ 2-0ގެ ނަތީޖާއަކުން --- ފޮޓޯ/ އޭޕީ

މެޗުގެ 15 ވަނަ މިނެޓުގައި ލަނޑެއްޖަހައި އާސެނަލަށް ލީޑު ހޯދައިދިނީ ހެންރިކް މިކިތާރިޔަންއެވެ. އެ ލަނޑަކީ އާސެނަލްގެ ޖާޒީގައި މިކިތާރިޔަން ކާމިޔާބުކުރި ފުރަތަމަ ލަނޑެވެ. ޔޫރޮޕާ ލީގުގައި ވިދަމުންދާ މިކިތާރިޔަން ވަނީ މިދިޔަ ސީޒަނުގައި މެންޗެސްޓާ ޔުނައިޓެޑާއެކުވެސް ރަނގަޅު ކުޅުމެއް ދައްކައިފައެވެ.

މިކިތާރިޔަންގެ ލަނޑަށްފަހު މިލާނަށް މެޗުގެ ކޮންޓްރޯލް ހޯދުމަށް އުނދަގޫތަކަކާ ކުރިމަތިލަމުން ދަނިކޮށް، ފުރަތަމަ ހާފު ނިމެނިކޮށް އާސެނަލުން ވަނީ އިތުރު ލަނޑެއްޖަހައި ލީޑު ފުޅާކޮށްފައެވެ. މެސުޓް އޮޒިލް ދިން ރީތި ބޯޅައަކުން އާސެނަލަށް އެ ލަނޑު ކާމިޔާބުކޮށްދިނީ އާރޮން ރަމްސީއެވެ.

މެޗުގެ ދެވަނަ ހާފުގައި ގެނޭރޯ ގަޓޫސޯގެ އިރުޝާދުގެ ދަށުން ކުޅެމުންދިޔަ މިލާނުން ގިނަ މަސައްކަތްތަކެއް ކުރިއެވެ. އެގޮތުން މިލާނުގެ ޖިއަކޯމޯ ބޮނަވެންޓޫރާއާއި ނިކޯލާ ކަލިނިޗްއަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔައެވެ. ބޮނަވެންޓޫރާ ފޮނުވާލި ހަމަލާ ގޯލާ އަމާޒުވެފައިނުވާ އިރު، ކަލިނިޗްގެ ހަމަލާގެ ހުރަހަކަށްވީ އާސެނަލްގެ ކީޕަރު ޑޭވިޑް އޮސްޕީނާއެވެ.

އާސެނަލާއި މިލާން ބައްދަލުކުރާ ދެވަނަ ލެގު މެޗު ކުޅުމަށް ހަމަޖެހިފައިވަނީ އަންނަ ބުރާސްފަތި ދުވަހުއެވެ. އެ މެޗު ކުޅުމަށް ހަމަޖެހިފައިވަނީ އާސެނަލްގެ އެމިރޭޓްސް ސްޓޭޑިއަމްގައެވެ.