10 Mar 2018, 11:31
ކޮލޮމްބޯ (މާޗް 10): ސްރީލަންކާގައި ތިން ދުވަހަށް ސޯޝަލް މީޑިއާ ބްލޮކްކޮށްފައި އޮތުމަށް ފަހު، އެ ބްލޮކޭޑް މިއަދު އުވާލައިފި އެވެ.
ސްރީލަންކާގެ ސްޓޭޓް މިނިސްޓަރު އޮފް ފޮރިން އެފެއާޒް ޑރ. ހަރުޝާ ޑި ސިލްވާ ވިދާޅުވީ، މިއަދުން ފެށިގެން ސޯޝަލް މީޑިއާ ޕްލެޓްފޯމުތައް އަނެއްކާ ވެސް ބޭނުންކުރެވެން ފަށާނެ ކަމަށެވެ.
ލަންކާގައި މެޖޯރިޓީ ބުދިސްޓުންނާއި މުސްލިމުންނާ ދެމެދު ހިނގި ހަމަނުޖެހުންތައް ކޮންޓްރޯލުކުރުމަށް ޓަކައި އެގައުމުގައި ބްލޮކު ކުރީ ފޭސްބުކްގެ އިތުރުން ވަޓްސްއެޕާއި ވައިބާ އެވެ. މިއީ އެގައުމުގައި އެންމެ ގިނައިން ބޭނުންކުރާ ސޯޝަލް މީޑިއާ އެޕްލިކޭޝަންތަކެވެ.
ސްޓޭޓް މިނިސްޓަރު ޑި ސިލްވާ ވިދާޅުވި ގޮތުގައި ފޭސްބުކާއި ވަޓްސްއެޕް ފަދަ ޕްލެޓްފޯމުތައް ބްލޮކްކުރުމުގެ ސަބަބުން ކެންޑީގައި ހަމަނުޖެހުންތައް ކޮންޓުރޯލު ކުރުމަށް މަގުފަހިވި އެވެ.
"ސޯޝަލް މީޑިއާއަކީ ހައްދު ފަހަނަ އަޅާފައިވާ ފަރާތްތަކުން ދޮގު މައުލޫމާތު ފަތުރަން އާންމުކޮށް ބޭނުންކުރާ ޕްލެޓްފޯމެއް. އަދި އެފަދަ ހަބަރު ފެތުރުން ހުއްޓުވައިގެން ކެންޑީ ވަނީ އާންމު ހާލަތަށް ރުޖޫއަ ކުރެވިފައި،" ޑި ސިލްވާ ވިދާޅުވި އެވެ.
އަދި ލަންކާގެ އެކި ސަރަހައްދުތަކުގައި ހިނގި ދީނީ ހަމަނުޖެހުންތައް ތަހުގީގުކުރަން ރިޔާސީ ކޮމިޝަނެއް އެކުލަވާލަން ޖެހޭ ކަމަށާއި އޭގެ ތެރޭގައި ހައްދުފަހަނައަޅާފައިވާ މުސްލިމު ޖަމާއަތްތައް ވެސް ތަހުގީގު ކުރަން ޖެހޭ ކަމަށް ޑި ސިލްވާ ވިދާޅުވި އެވެ.
ލަންކާގެ ކެންޑީގައި މިދިޔަ ހަފްތާގައި ފެށުނު ހަމަނުޖެހުންތަކުގައި ބުދިސްޓުން ވަނީ މުސްލިމުންގެ ގެތަކާއި ފިހާރަތަކާއި މިސްކިތްތަކުގައި ރޯކޮށްފަ އެވެ. އޭގެ ސަބަބުން ލަންކާގައި ކުއްލި ހާލަތު އިއުލާނު ކުރި އެވެ.
އަދި އެހަމަނުޖެހުންތަކުގައި އިސްކޮށް އުޅުނު ޖިވަން ވީރަސިންހަ ކިޔާ މީހަކާއި އޭނާއަށް އެހީވި ނުވަ މީހަކު މިހާރު ހައްޔަރުކޮށްފައިވާ ކަމަށް ލަންކާ ފުލުހުން ބުންޏެވެ.
(ޑެއިލީމިރާ)