15 Mar 2018, 16:20
ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރު ބަޣާވާތަކުން ވައްޓާލަން އުޅުނު ކަމުގެ ތުހުމަތުގައި ޖުމުލަ އަށް ފުލުހަކު ހައްޔަރުކޮށްފައިވާކަން "ސަން" އަށް އެނގިއްޖެއެވެ.
އެ ފުލުހުންގެ ތެރޭގައި ސްޕެޝަލިސްޓް އޮޕަރޭޝަންސް (އެސްއޯ) ގައި މަސައްކަތް ކުރާ ފުލުހުން ވެސް ހިމެނެއެވެ.
ފުލުހުން އަންނަނީ އެ ފުލުހުންގެ މައްސަލަތައް ތަހުގީގު ކުރަމުންނެވެ. އަދި އެ އަށް ފުލުހުން މިހާރު ވަނީ ފުލުހުންގެ ވަޒީފާ އިން ވަކިކޮށްފައެވެ.
ހައްޔަރުކުރި ފުލުހުންގެ ތެރޭގައި އެސްއޯގެ ތެރޭގައި އޮންނަ ސްޕެޝަލް ވެޕަންސް އެންޑް ޓެކްޓިކްސް (ސްވަޓް)ގެ ކުރީގެ ކޮމާންޑަރު ހުސައިން ސައިފް ވެސް ހިމެނެއެވެ.
ސަރުކާރު ވައްޓާލަން އުޅުނު ކަމުގެ ތުހުމަތުގައި ކުރީގެ ރައީސް މައުމޫން އަބްދުލް ގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދު މުހައްމަދުގެ އިތުރުން ގިނަ ބަޔަކު ވަނީ ހައްޔަރުކޮށްފައެވެ.