21 Mar 2018, 12:31
ޑާކްރެއިން އެންޓަޓެއިންމަންޓް އިން ގެނެސްދިނުމަށް ހަމަޖެހިފައިވާ ފިލްމު "މާމުއި"ގެ ކާސްޓަށް އިތުރު ތަރިންތަކެއް ހިމަނައި ޝޫޓިން އަންނަ ޖޫން މަހު ފެށުމަށް ތައްޔާރުވަމުންދާ ކަމަށް ޕްރޮޑިއުސަރު މުހައްމަދު އަލީ (މޮގާ) ބުނެފި އެވެ.
އައިޝަތު ފުއާދު އަދި އަލީ ޝިފާއުގެ ސްކްރީން ޕްލޭ އަކަށް ތައްޔާރުކުރާ އެ ފިލްމުގެ ޕްރޮޑިއުސަރަކީ މޮގާ އެވެ.
މާމުއިގައި ހަރަކާތްތެރިވާ ތަރިންނަކީ އިސްމާއީލް ޖުމައިހް (ޖުމާ)، މުހައްމަދު ފައިސަލް، އަބްދުﷲ ޝާފިއު އިބްރާހިމް (ފުބޫ)، މަރިޔަމް މަޖުދާ (މަޖޫ)، އަހްމަދު ސުނީ، ހަމްދާން ފާރޫގް، އާދަމް ރިޒްވީ، މަރިއްޔާ، އައިމިނަތު ނޫރާ، އަހްމަދް އަމާން، ނުޒުހަތު ޝުއައިބު (ނުޒޫ) އަދި އަހްމަދު ޝާކިރު އެވެ.
ކާމިޔާބު ޑައިރެކްޓަރު އަލީ ޝިފާއު (ޗިއްޕެ) ޑައިރެކްޓް ކުރާ އެ ފިލްމުގެ ކާސްޓަށް އިތުރުވި ތަރިންނަކީ ދިވެހި ފިލްމު އިންޑަސްޓްރީގައި މިހާރު އެންމެ ޑިމާންޑް ބޮޑު ބަތަލާ މަރިޔަމް އައްޒަ، ކުޅަދާނަ ބަތަލާ ޝީލާ ނަޖީބު، އިބްރާހިމް އަމާން، މާރިއާ ތްރޭސާ އަދި އަލީ ޝަޒްލީމް އެވެ.
ފިލްމު މާމުއި އިން މި ދާއިރާ އަށް އަލަށް ތައާރަފްވާ އައިޝަތު ޔާދާ ވެސް ހިމެނޭނެ އެވެ.
ފިލްމުގެ ޕްރޮޑިއުސަރު މޮގާ ބުނީ ޝޫޓިން ފެށުމަށް އެންމެ ފަހުގެ ތައްޔާރީތައް ވަމުން އަންނަ ކަމަށާއި އަންނަ އަހަރުގެ ކުރީކޮޅު ފިލްމު ޕްރިމިއާ ކުރުމަށް ހަމަޖެހިފައިވާ ކަމަށެވެ.
ފިލްމު "މާމުއި" އަކީ ޑާކްރެއިން އެންޓަޓެއިންމަންޓް އިން އުފައްދާ އެންމެ ބޮޑު ޕްރޮޖެކްޓް ކަން ވެސް މޮގާ ވަނީ ސަން އަށް ބުނެފަ އެވެ.
"ރޯދައިގެ ކުރިން ޓްރެއިނިންތަކެއް ހިންގާނަން. މިއީ ވަރަށް ބޮޑު ޕްރޮޖެކްޓް އެއް. ޝޫޓް ކުރަނީ މާލޭގައި،" އޭނާ ބުންޏެވެ.