26 Mar 2018, 12:02
ޝޫޖިތު ސިރްކާރު ޑައިރެކްޓުކޮށް އަމީތާބް ބައްޗަން ލީޑު ރޯލުން ފެނިގެންދަތާ ފިލްމު 'ޝޫބައިޓް' ރިލީޒް ނުކުރެވި ގިނަ އަހަރުތަކެއް ވެފައި ވާތީ އަމީތާބް އާއި ޝޫޖިތު އެކަމާ ކަންބޮޑުވުން ފާޅުކޮށްފި އެވެ.
'ޝޫބައިޓް' އަކީ ޝޫޖިތުގެ ދެވަނަ ފިލްމެވެ. އަދި އަމީތާބް އާއެކު މަސައްކަތް ކުރި ފުރަތަމަ ފަހަރެވެ. ފިލްމު ޝޫޓުކޮށް ނިންމީ ކޮން އަހަރެއްގައި ކަން ޔަގީން ނުވި ނަމަވެސް، ފިލްމު ރިލީޒް ނުކުރެވިގެން ޝޫޖިތު އެހެން ފިލްމެއްގެ މަސައްކަތް ފެށީ 2012 ވަނަ އަހަރު އެވެ.
ފިލްްމު ރިލީޒް ނުކުރެވި ގިނަ އަހަރުތަކެއް ވެގެން އެކަމާ ކަންބޮޑުވުން ފާޅުކޮށް ފުރަތަމަ ޓުވީޓު ކުރީ އަމީތާބެވެ. ފިލްމުގެ ދެ ޕޯސްޓަރާ އެކު އަމީތާބް ކުރި ޓުވީޓުގައި ވަނީ ފިލްމު ރިލީޒް ކޮށްދިނުމަށް އެދި ޕްރޮޑިއުސަރުންގެ ކިބައިން އާދޭސް ކޮށްފައެވެ.
އަމީތާބް ބުނީ އެއީ ވަރަށް ގިނަ ބައެއްގެ ވަރަށް ބުރަ މަސައްކަތް ކަމަށެވެ. އަދި އުފެއްދުންތެރިކަން މަރާނުލުމަށް ވެސް އަމީތާބް ވަނީ އެދިފައެވެ.
އަމީތާބްގެ އިތުރުން ސާރިކާ ވެސް މުހިންމު ރޯލަކުން ފެނިގެންދާ އެ ފިލްމު ރިލީޒް ނުކުރެވިގެން އުޅެނީ ފިލްމުގެ ޕްރޮޑިއުސަރުންގެ މެދުގައި މައްސަލަ ޖެހިގެންނެވެ.
އެންމެ ފުރަތަމަ އެ ފިލްމު ޕްރޮޑިއުސް ކުރަމުން ދިޔައީ ޕާސެޕްޓް ޕިކްޗާ ކޮމްޕެނީ އިންނެވެ. އަދި އޭރު ފިލްމަށް ދީފައިވާ ނަމަކީ 'ޖޯނީ ވޯކާ' އެވެ. ނަމަވެސް ޖެހުނު މައްސަލައެއްގައި ފިލްމުގެ ޕްރޮޑަކްޝަން އާ ދެން ހަވާލުވީ ޔޫޓީވީ މޯޝަން ޕިކްޗާޒް އިންނެވެ.
އެހާ ހިސާބުން ޕާސެޕްޓު ކުންފުނިން ވަނީ ޔޫޓީވީ އާ ދެކޮޅަށް ކޯޓަށް މައްސަލައެއް ވެސް ހުށަހަޅައިފައެވެ. 2012 ވަނަ އަހަރު އެ މައްސަލަ ކޯޓުން ބޭރުކޮށްލި ނަމަވެސް ފިލްމު ރިލީޒް ކުރެވޭ ގޮތެއް ނުވި އެވެ.
ޝޫޖިތު ބުނީ ފިލްމު ރިލީޒް ކުރެވޭތޯ ވަރަށް މަސައްކަތް ކުރަމުން އަންނަ ކަމަށާއި ނަމަވެސް ޕްރޮޑިއުސަރުންގެ ފަރާތުން އެއްބާރުލުން ނުލިބޭ ކަމަށެވެ.
އޭނާ ބުނީ މިހާރު ފިލްމުގެ ޕްރޮޑިއުސަރުންނަކީ ޑިޒްނީ ޔޫޓީވީ އަދި ފޮކްސް ކަމަށެވެ. ކުރިން ވަކި ދެ ކުންފުނީގެ ގޮތުގައި މަސައްކަތް ކުރި ނަމަވެސް މިހާރު ދެ ކުންފުނި ވެސް މަސައްކަތް ކުރަމުން އަންނަނީ އެއް ފުރާޅެއްގެ ދަށުން ކަމަށް ވާއިރު، އެ ފިލްމު ރިލީޒް ކުރެވޭނެ ގޮތް ހަދައިދޭން ޖެހޭ ކަމަށެވެ.
ފިލްމު ރިލީޒް ކުރެވޭތޯ އަމީތާބް އާ ދެމީހުން ޕްރޮޑިއުސަރުންގެ ކިބައިން އާދޭސް ކުރަމުން އަންނަ ކަމަށާއި އެންމެ ބޮޑު ހިތާމައެއް ލިބެނީ އަމީތާބަށް އެވަރުގެ ގެއްލުމުން ލިބުމުން ކަމަށް ޝޫޖިތު ބުންޏެވެ.
"އަހަރެން މި ހުރީ ފިލްމު ރިލީޒް ކުރަން ނަމަ ގެ ވިއްކާލައިފައި ޕްރޮޑިއުސަރުންނަށް އަގު ދޭން ވެސް ތައްޔާރަށް. އެއީ ހަމައެކަނި އަމީތާބް ބައްޗަން އާއި އަހަރެންގެ ކްރޫ އަދި ޓެކްނީޝަނުންނަށްޓަކައި،" ޝޫޖިތު ބުންޏެވެ.
ޝޫޖިތު މިހާރު އަންނަނީ އޭނާގެ އެންމެ ފަހުގެ ޑައިރެކްޝަން، 'އޮކްޓޯބަރ' ރިލީޒް ކުރުމަށް ތައްޔާރުވަމުންނެވެ. ވަރުން ދަވާން ލީޑު ރޯލުން ފެނިގެންދާ އެ ފިލްމު ރިލީޒް ކުރާނީ އޭޕްރީލް 13 ވަނަ ދުވަހު އެވެ.
އަމީތާބް ދެން އެންމެ އަވަހަށް ފެނިގެން ދާނީ ރިޝީ ކަޕޫރު އާއެކު ފިލްމު '102 ނޮޓް އައުޓް' އިންނެވެ.
ޝޫޖިތު އާއި އަމީތާބް ވަނީ ފަހުން ޕިންކް އަދި ޕީކޫގައި ވެސް އެކުގައި މަސައްކަތް ކޮށްފައެވެ. ޕީކޫ އިން އަމީތާބަށް ވަނީ ގައުމީ އެވޯޑު ވެސް ލިބިގެން ގޮސްފައެވެ.