28 Mar 2018, 09:19
އޭޝިއަން ކަޕް ކޮލިފިކޭޝަންގައި ރޭ ރާއްޖެއާއި ބޫޓާން ވާދަކުރި މެޗުގައި ކޯޗު ބުނި ވަރަށް ނުކުޅެވޭ ކަމަށާއި އެއާ ގާތް ކުރާ ވަރަށް ކުޅެވުނު ކަމަށް ގައުމީ ޓީމުގެ ފޯވަޑް ނާއިޒް ހަސަން (ދާދު) ބުނެފިއެވެ.
ރޭގެ މެޗުން ރާއްޖެ މޮޅުވީ 7-0ގެ ނަތީޖާއަކުންނެވެ. މެޗުގައި ދާދުވަނީ ހަތަރު ގޯލް ޖަަހައި ތަފާތު މޮޅު ކުޅުމެއް ދައްކައިފައެވެ.
މެޗަށްފަހު ވާހަކަ ދައްކަމުން ދާދު ބުނީ ރޭގެ މެޗުގައި ފެނުނީ ކުޅުންތެރިން ކުރި ބުރަ މަސައްކަތުގެ ނަތީޖާ ކަމަށާއި ސިއްރަކީ ޑިސިޕްލިން ކަމަށެވެ.
"ކޯޗުގެ ބަސްއަހައިގެން ހުރިހާ ކުޅުންތެރިންވެސް ވީ ހުރިހާ ކަމެއް ހަނދާން ނައްތާލައިފައި ކުރި މަސައްކަތުގެ ނަތީޖާ މިއީ. މިއަދު ހުރިހާ ކުޅުންތެރިންވެސް ޑިސިޕްލިންއާއެކު މަސައްކަތް ކުރީ. މޮޅަކަށް ނުކުތީވެސް ހުރިހާ ކުޅުންތެރިން،" ދާދު ބުންޏެވެ.
ރޭގެ މެޗުގެ ކުރިން ގައުމީ ޓީމުގެ ކެޕްޓަން އަލީ އަޝްފާގު (ދަގަނޑޭ) ޓީމުން ބޭރުކޮށްފައިވާއިރު، އިއްޔެ ގައުމީ ޓީމުގެ ވައިސް ކެޕްޓަން އަސްހަދު އަލީ (އަޑުބަރޭ)ވަނީ ގައުމީ ޓީމަށް ކުޅުން ހުއްޓާލި ކަމަށް އިއުލާން ކޮށްފައެވެ.
ރޭގެ މެޗުގައި ޒުވާން ގައުމީ ޓީމެއް ފެނިގެން ގޮސްފައިވާ އިރު، އެންމެ މޮޅަށް ކުޅުނު އެއް ކުޅުންތެރިއަކީ ދާދުއެވެ. ގައުމީ ޓީމުން ސިންގަޕޫރަށް ދިޔަ މެޗުގައި ކޯޗު ދާދު ގެންގޮސްފައި ނުވާއިރު، ކޯޗު ޕީޓާ ސެގަޓް ބުނީ ދާދު ރެސްޓް ކުރުވީ ކަމަށެވެ. އަދި ރޭގެ މެޗަށްފަހު ކޯޗު ބުނީ ދާދު ރެސްޓް ކުރުވުމުން އޭގެ ފައިދާ ފެނުނު ކަމަށެވެ.
ދާދު ބުނީ މެޗުގައި ހަތަރު ގޯލް ޖެހުނު ނަމަވެސް ކޯޗު ބުނި ވަރަށް ނުކުޅެވޭ ކަމަށާއި އަދިވެސް އިތުރަށް ކުޅުވަން ކޯޗު ބޭނުންވާ ކަމަށެވެ.
"އަސްލު ކޯޗު ބުނި ވަރަކަށް ނުކުޅެވުނު. އެކަމަކު އެއާ ގާތް ކުރާ ވަރަށް ކުޅެވުނު،" ދާދު ބުންޏެވެ.
ރޭގެ މެޗުގައި ހަތަރު ގޯލް ޖަހައި ދާދުވަނީ ގައުމީ ޓީމަށް ޖަހައިދިން ގޯލްގެ އަދަދު އަށަކަށް ޖައްސައިލައިފައެވެ.