03 May 2018, 13:43
މި ދިޔަ އަހަރު ރާއްޖޭގެ އޯވާރޯލް ބެލެންސް އޮފް ޕޭމަންޓް އަދި ރަސްމީ ރިޒާވް އިތުރު ވެއްޖެ އެވެ.
އެމްއެމްއޭ އިން ބުނީ، ބެލެންސް އޮފް ޕޭމަންޓް އިތުރުވުމަށް މެދުވެރިވި ސަބަބަކީ، ކަރަންޓް އެކައުންޓްގެ ޑެފިސިޓްއަށް ވުރެ ފައިނޭންޝަލް އެކައުންޓްގެ ނެޓް އިންފްލޯސް ވަރަށް ބޮޑުތަން އިތުރުވުމެވެ.
ރާއްޖޭގެ މަރުކަޒީ ބޭންކުން ނެރެފައިވާ މާލީ ބަޔާނުން ހާމަކުރާ ގޮތުގައި، 2016 ވަނަ އަހަރު ރާއްޖޭގެ އޯވަރޯލް ބެލެންސް އޮފް ޕޭމަންޓް 95.8 މިލިއަން ޑޮލަރުގެ ޑެފިސިޓެއްގައި ހުރުމަށް ފަހު މިދިޔަ އަހަރު ވަނީ އެ އަދަދު 118.9 މިލިއަން ޔޫއެސް ޑޮލަރަށް އަރަނިވެފަ އެވެ. އަދި ބެލެންސް އޮފް ޕޭމަންޓް އަރަނިވުމާ އެކު ރާއްޖޭގެ ރަސްމީ ރިޒާވް ވެސް ވަނީ މިދިޔަ އަހަރު 586.1 މިލިއަން ޑޮލަރަށް އިތުރު ވެފަ އެވެ. ދެހާސް ސޯޅަ ވަނަ އަހަރުގައި ރަސްމީ ރިޒާވް ހުރީ 467.1 މިލިއަން ޑޮލަރުގަ އެވެ.
ރާއްޖޭގެ ރަސްމީ ރިޒާވްގެ ތެރެއިން ޔޫސަބަލް ރިޒާވްގެ ގޮތުގައި 2017 ވަނަ އަހަރު ނިމުނު 206.4 މިލިއަން ޑޮލަރު ހުރިކަމަށް އެމްއެމްއޭއިން ބުންޏެވެ. އެއީ 2016 ވަނަ އަހަރާއި އަޅާބަލާއިރު ތިން ޕަސެންޓްގެ އިތުރު ވުމެއް ކަމަށް ވެސް އެމްއެމްއޭ އިން ބުންޏެވެ.
އެމްއެމްއޭ އިން ބުނީ ރާއްޖޭގެ ރަސްމީ ރިޒާވް 2017 ވަނަ އަހަރުގެ ފުރަތަމަ ދެ ކުއާޓާގައި މަތީގައި ހުރުމަށް ފަހުގައި ތިންވަނަ ކުއާޓާގައި ވަރަށް ބޮޑަށް ދަށަށް ގޮސްފައިވާ ކަމަށެވެ. ސަބަބަކީ ދިވެހިރާއްޖޭގެ އިގްތިސާދުގައި ފޮރިން އެކްސްޗޭންޖް ޕްރެޝާ ކުޑަކުރުމުގެ ގޮތުން ބޭރު ފައިސާ ވިއްކާފައިވާ މިންވަރު އިތުރުވުމާއި، ރާއްޖެއިން ބޭރަށް ހަދާފައިވާ ޕޭމަންޓްތައް އިތުރުވުމުގެ ސަބަބުން ޔޫޒަބަލް ރިޒާވް ދަށަށް ދިޔުން ކަމަށް އެމްއެމްއޭ އިން ބުންޏެވެ.
ދެހާސް ސަތާރަ ވަނަ އަހަރުގެ ތިން ވަނަ ކުއާޓާގައި ޔޫޒަބަލް ރިޒާވް ދަށުގައި ހުރުމަށް ފަހު އަހަރު ނިމުނު އިރު ޔޫޒަބަލް ރިޒާވް މައްޗަށް ދިއުމަށް މެދުވެރިވި ސަބަބަކީ ބައިނަލްއަގުވާމީ ބާޒާރުގައި ސަރުކާރުގެ ބޮންޑު ވިއްކައިގެން އިތުރަށް ފައިސާ ލިބުމާއި ވިޔަފާރި ބޭންކުތަކުން އެމްއެމްއޭގައި ބަހައްޓާ ބޭރު ފައިސާގެ ރިޒާވް އެކައުންޓްގެ ބެލެންސް އިތުރުވުން ކަމަށް އެމްއެމްއޭ އިން ބުންޏެވެ.
ރާއްޖޭގެ ރަސްމީ ރިޒާވް އިތުރުވުމަށް މެދުވެރިވި ސަބަބެއްގެ ގޮތުގައި ފަތުރުވެރިކަމުގެ ދާއިރާއަށް އައި ކުރިއެރުމާ އެކު، ސަރުކާރަށް ލިބުނު ބޭރު ފައިސާގެ މިންވަރު އިތުރުވެ އެމްއެމްއޭއަށް މާރުކުރާވަރު އިތުރުވުން ވެސް އެމްއެމްއޭ އިން ވަނީ ފާހަގަ ކޮށްފަ އެވެ.