05 May 2018, 18:31
ސްރީލަންކާގައި މިހާރު ކުރިއަށްދާ ސައުތު އޭޝިއަން ޖޫނިއާ އެތުލެޓިކްސް މުބާރާތުގެ ފިރިހެން 100 މީޓަރު ރިލޭގައި ދިވެހިރާއްޖެއިން ލޯ މެޑަލް ހޯދައިފިއެވެ.
މިއަދު ކުރިއަށްދިޔަ އިވެންޓްގައި ރާއްޖެއަށް 100 މީޓަރު ރިލޭއިން ލޯ މެޑަލް ހޯދައިދިން އެތުލީޓުންނަކީ އިބްރާހީމް އަޝްފާން އަލީއާއި މުހައްމަދު ނާއިލްގެ އިތުރުން އަހުމަދު އަލީއާއި އިބާދުﷲ އާދަމެވެ.
ރާއްޖޭގެ ޓީމު ރިލޭ ފުރިހަމަކޮށްފައިވަނީ 44.68 ސިކުންތުންނެވެ. އެއީ ގައުމީ ޖޫނިއާ ރިލޭ ރެކޯޑެކެވެ.
ރާއްޖެއިން ބްރޯންޒް ހޯދި އިރު، އެ އިވެންޓްގެ ރަން މެޑަލް ހޯދީ އިންޑިއާއެވެ. ރިހި މެޑަލް ހޯދީ ޕާކިސްތާނެވެ.
ލަންކާގެ ކޮލޮމްބޯގައި މިހާރު ކުރިއަށްދާ ދެކުނު އޭޝިއާގެ ޖޫނިއާ އެތުލެޓިކްސް ޗެމްޕިއަންޝިޕްގައި ރާއްޖޭގެ އަށް އެތުލީޓަކު ވާދަކުރާނެ އެވެ.
ރިލޭ އިވެންޓް ނިންމާ މެޑަލް ހަވާލުކުރުމުގެ ތެރެއިން --- ފޮޓޯ/ އެތުލެޓިކްސް އެސޯސިއޭޝަން
މިހާތަނަށް ރާއްޖޭގެ އެތުލީޓުން ވާދަކުރި އިވެންޓްތަކުގެ ތެރެއިން ނާއިލް ވާދަކުރި 400 މީޓަރުގެ ދެވަނަ ހީޓުން ދެވަނަ ހޯދައި، އޭނާ ވަނީ ފައިނަލް ބުރުގައިވެސް ދުވެފައެވެ.
ރާއްޖޭގެ އަންހެން އެތުލީޓުންގެ ތެރެއިން ސަމްހާ މުހައްމަދު ވާދަކުރީ އަންހެން ޑިވިޝަން 1500 މީޓަރު ފައިނަލް އިވެންޓްގައެވެ. އަދި 400 މީޓަރުގެ އަންހެން ދުވުމުގެ އިވެންޓްގައި ރާއްޖޭގެ އައިޝަތު ހިންމަ ހަސަންވެސް މިއަދު ވަނީ ދުވެފައެވެ.
ނާއިލްގެ އިތުރުން، ރާއްޖޭގެ ފިރިހެން އެތުލީޓުންގެ ތެރެއިން އަހުމަދު އަލީވެސް ވަނީ 400 މީޓަރު ހީޓް އެކެއްގައި ވާދަކޮށްފައެވެ. އޭނާ ފައިނަލް ބުރަށް ކޮލިފައިވެފައެއްނުވެ އެވެ. ރާއްޖޭގެ ވިޝާން އަބްރާހީމް ވެސް މިއަދު ވަނީ 100 މީޓަރު ދުވުގެ ހީޓް ދޭއްގައި ވާދަކޮށްފަ އެވެ. އޭނާ ވެސް ފައިނަލް ބުރަށް ގޮސްފައެއް ނުވެއެވެ.