06 May 2018, 20:08
އެސްޓީއޯ މާލޭ ލީގުގައި ޓީސީ ސްޕޯޓްސް ކްލަބާއި ކްލަބު އީގަލްސް ވާދަކުރި މެޗު 0-0ގެ ނަތީޖާއަކުން އެއްވަރުވެގެން ނިމިއްޖެއެވެ.
މެޗުގެ ފުރަތަމަ ހާފްގައި ޓީސީގެ ޔާމީން އިބްރާހީމް (ޔާންބެ)އަށް ދެއްކި ރަތްކާޑާއެކު އެޓީމުން މެޗުގެ ބާކީބައި ކުޅެފައިވަނީ ކުޅުންތެރިއަކު މަދުކޮށެވެ.
ލީގުގެ ދެވަނަ ބުރު ފެށުމުގެ ގޮތުން މިއަދު ހަވީރު ގައުމީ ފުޓުބޯޅަ ދަނޑުގައި ކުޅުނު މެޗުގެ ފުރަތަމަ ހާފްގައި ދެޓީމުގެ ފަރާތުންވެސް ފެނިގެންދިޔައީ ދާދި ހަމަހަމަ ކުޅުމެކެވެ. ހާފްގެ ފުރަތަމަ ކޮޅުގައި އީގަލްސްއިން ކުރިއަށް ޖެހިގެން ކުޅުނު ނަމަވެސް، ޓީސީވެސް ވަނީ މެޗަށް އަނބުރާވަދެ ހަމަލާތައް އުފެއްދުމަށް މަސައްކަތް ކޮށްފައެވެ.
މާލޭ ލީގުގެ ދެވަނަ ބުރުގައި އީގަލްސްއާއި ޓީސީ ވާދަކުރި މެޗުގެ ތެރެއިން: އެ މެޗު ނިމުނީ 0-0ގެ ނަތީޖާއަކުން އެއްވަރުވެގެން --- ސަން ފޮޓޯ/ ފަޔާޒް މޫސާ
މެޗުގެ 32 ވަނަ މިނެޓުގައި އީގަލްސް އަހުމަދު ރިޒުވާން (ރިޒޭ)، ޓީސީގެ އޭރިއާ ތެރެއަށް ވަދެ ކީޕަރު ބޯމަތިން މަޑުމަޑުން އެއްލި ބޯޅަ އަމާޒުވީ ހުރަސް ދަނޑިއަށެވެ.
އޭގެ އިރުކޮޅެއްފަހުން ރެފްރީ ޔާންބެއަށް ރަތް ކާޑު ދެއްކީ އީގަލްސްގެ އިބްރާހީމް މުބީން ގައިގައި ބޯޅަ ނެތި ޖެހުމުންނެވެ. އޭގެ ކުރިން ޔާންބެއަށްވެސް އަދި މުއްކިއަށްވެސް ރެފްރީ އޮތީ ރީނދޫ ކާޑު ދައްކައިފައެވެ. ރެފްރީ އެ ދެކުޅުންތެރިންނަށްވެސް ފުރަތަމަ ރީނދޫ ކާޑު ދެއްކީ ބޯޅަ ނެތި އެއް ކުޅުންތެރިއަކު އަނެއް ކުޅުންތެރިއަކު ގަޔަށް އަތްލުމުންނެވެ.
ޔާންބެގެ ރަތް ކާޑާއެކު ޓީސީގެ ކުޅުންތެރިންނާއި އޮފިޝަލުންވެސް ވަރަށް ބޮޑަށް ހިތް ހަމަ ނުޖެހުން ފާޅުކޮށްފައިވާ އިރު، ހާފް ނިމުމުންވެސް ޓީސީގެ އޮޝިލުންގެ ފަރާތުން ވަރަށް ބޮޑަށް ހިތްހަމަ ނުޖެހުން ފާޅުކުރިތަން ފެނިގެން ދިޔައެވެ. އަދި ޓީސީގެ އޮފިޝަލެއްގެ ފަރާތުން އީގަލްސްގެ ކުޅުންތެރިއަކަށް ހަމަލާ ދިންތަންވެސް ފެނިގެން ދިޔައެވެ.
މާލޭ ލީގުގެ ދެވަނަ ބުރުގައި އީގަލްސްއާއި ޓީސީ ވާދަކުރި މެޗުގެ ތެރެއިން: އެ މެޗު ނިމުނީ 0-0ގެ ނަތީޖާއަކުން އެއްވަރުވެގެން --- ސަން ފޮޓޯ/ ފަޔާޒް މޫސާ
މެޗުގެ ދެވަނަ ހާފަށް ނުކުމެ ރަނގަޅަށް ކުޅުނީ ޓީސީންނެވެ. އެއް ކުޅުންތެރިއަކު މަދުން ކުޅުނު ނަމަވެސް ޓީސީން ވަނީ ކުރިއަށްޖެހި އެޓޭކްތައް އުފައްދައިފައެވެ. މެޗުގެ 50 ވަނަ މިނެޓުގައި ޓީސީގެ ފޯވަޑް އިބްރާހީމް މަހުދީ (ފޭދޫ އިއްބެ) ފޮނުވާލި ބާރު ހަމަލާ އީގަލްސްގެ ކީޕަރު ސުޖަން ޕެރޭރާ މަތަކޮށް ފޮނުވާލި އިރު، އެ ބޯޅައިގެ ރީބައުންސް ގޯލަށް ފޮނުވާލަން ޓީސީގެ އެނަޓޯލީ ވްލާސިޗޭވަށް ވަނީ ލިބިފައެވެ. އޭނާގެ ހަމަލާ ދިޔައީ ގޯލާ އަމާޒުނުވެ ބޭރަށެވެ.
އޭގެ ކުޑަ އިރުކޮޅެއް ފަހުން ޓީސީގެ ޑިފެންޑަރު މުހައްމަދު ސާމިރު ނަގައިދިން ހުރަސް، ފޭދޫ އިއްބެ ވަރަށް ރީތިކޮށް ގޯލަށް ފޮނުވާލި ނަމަވެސް އެ ހަމަލާގެ ހުރަހަކަށްވެސްވީ އީގަލްސްގެ ކީޕަރު ސުޖަންއެވެ.
މާލޭ ލީގުގެ ދެވަނަ ބުރުގައި އީގަލްސްއާއި ޓީސީ ވާދަކުރި މެޗުގެ ތެރެއިން: އެ މެޗު ނިމުނީ 0-0ގެ ނަތީޖާއަކުން އެއްވަރުވެގެން --- ސަން ފޮޓޯ/ ފަޔާޒް މޫސާ
މެޗުގެ 66 ވަނަ މިނެޓުގައި ޓީސީގެ އޭރިއާ ކައިރިން އީގަލްސްއަށް ލިބުނު ހިލޭ ޖެހުން، ބްރެޒިލްގެ ފޯވަޑް ލުއިޒް އެޑުއާޑޯ ވަރަށް ރީތިކޮށް ގޯލާ އަމާޒުކޮށްލި ނަމަވެސް ޓީސީގެ ކީޕަރު އިބްރާހީމް ނަދީމް ވަނީ އެ ބޯޅަ ހުޝިޔާރު ކަމާއެކު ދިފާއުކޮށްފައެވެ.
މެޗުގެ ފަހު ވަގުތުގައި އީގަލްސްއިން ވަރަށް ބޮޑަށް ކުރިއަށް ޖެހިގެން ކުޅުނުކަން ފާހަގަކޮށްލެވުނެވެ. އެގޮތުން ރިޒޭއާއި މުހައްމަދު ނާއިމަށް ލިބުނު ފުރުސަތުތައް ފާހަގަކޮށްލެވުނެވެ.
މިއަދުގެ މެޗުން ލިބުނު ޕޮއިންޓާއެކު މިހާތަނަށް ލީގުގައި ކުޅުން އަށް މެޗުން އީގަލްސްއަށް ލިބެނީ 12 ޕޮއިންޓެވެ. އެޓީމު އޮތީ ލީގުގެ ހަތަރު ވަނައިގައެވެ. އެއީ އެއް މެޗު މަދުން ކުޅެ، ފަސް ވަނައިގައި އޮތް ވިކްޓަރީއާ ޕޮއިންޓްގެ ގޮތުން އެއްވަރުވެ، ފައިދާ ގޯލްގެ ތަފާތުންނެވެ. ކުޅުނު އަށް މެޗުން ޓީސީއަށް ލިބެނީ 13 ޕޮއިންޓެވެ. 13 ޕޮއިންޓާއެކު ޓީސީ ވަނީ ދެވަނައަށް ޖެހިލައިފައެވެ. އެހެން ނަމަވެސް އެއީ ކުރިން ދެވަނައިގައި އޮތް މާޒިޔާ އަށްވުރެ މެޗެއް އިތުރަށް ކުޅެގެންނެވެ.
އެސްޓީއޯ މާލޭ ލީގުގެ މެޗެއް މިރޭވެސް އޮންނާނެއެވެ. މިރޭ 9:00ގައި އޮންނަ މެޗުގައި ވާދަކުރާނީ މާޒިޔާއާއި ކްލަބު ވެލެންސިއާއެވެ.