11 May 2018, 10:12
އެސްޓީއޯ މާލޭ ލީގުގެ ފުރަތަމަ ބުރުގައި ނިއު ރޭޑިއަންޓް ސްޕޯޓްސް ކްލަބު ބަލިވީ އެންމެ މެޗަކުންނެވެ. އެއީ ވިކްޓަރީ ސްޕޯޓްސް ކްލަބާ ދެކޮޅަށް އެޓީމު ކުޅުނު މެޗުން އެކަންޏެވެ.
އެ މެޗުން ނިއު 2-1ގެ ނަތީޖާއަކުން ބަލިވެފައިވާ އިރު، ވިކްޓަރީން ކުޅެފައިވަނީ ވަރަށް ބޮޑަށް ޑިފެންސަށް ކޮމްޕެކްޓް ކޮށްގެންނެވެ.
"ވަރަށް އުނދަގޫ މެޗަކަށް ވާނީ. ވާދަވެރި ޓީމަކާ ދެކޮޅަށް ނުކުންނަން މިޖެހެނީ. ފުރަތަމަ ކުޅުނު މެޗުން ފިލާވަޅުތަކެއް ލިބުނު. ވިކްޓަރީން ހުރިހާ ބޯޅައަކަށްވެސް މަސައްކަތްކޮށް، އޭގެ ފައިދާ ނެގީ. އެ މެޗުގައިވެސް ނިއުއިން ގިނަ ފުރުސަތުތަކެއް ހޯދި ނަމަވެސް ވިކްޓަރީން ނަތީޖާ ނެރުނީ. އެހެންވީމަ ވިކްޓަރީއަކީ ނަތީޖާ ނެރޭނެ ޓީމެއް، އެމީހުން ކޮންމެ ގޮތަކަށް ކުޅުނަސް،" މިރޭގެ މެޗާ ގުޅިގެން ވާހަކަ ދައްކަމުން ނިއުގެ ކޯޗު އޮސްކާ ބުރުޒޮން ބުންޏެވެ.
އޮސްކާ ބުނީ ވިކްޓަރީން މެޗު ހަޑިކޮށްގެން ނަމަވެސް މޮޅުވާން މަސައްކަތް ކުރާނެ ކަމަށާއި، މެޗުގެ ކުރީކޮޅުގައި ގޯލެއް ޖެހުން މުހިއްމު ކަމަށެވެ.
"ވިކްޓަރީން ބޭނުންކުރާނެ އެމީހުންގެ ހުރިހާ އުކުޅެއް. ރެފްރީއާ ވާހަކަތައް ދައްކާ، ލަސްކޮށް، ދަނޑު މައްޗަށް ގިނަ ފަހަރުތަކަކު ސްޓްރެޗާ އަރުވާ. އެހެންވީމަ ބަލަން ޖެހޭނީ އަވަހަށް ގޯލެއް ޖަހައި، އެކަންކަން ވިޔަ ނުދޭން. ވިކްޓަރީ ފަސޭހަ ނުވާނެ. ކުރިން ކުޅުނު މެޗުން ދަސްވި ކަންކަމުގައި ބޭނުން ހިފަން ޖެހޭނެ،" އޮސްކާ ބުންޏެވެ.
އޮސްކާ އިތުރަށް ބުނީ ނިއުއިން ފުލް ފޯމުގައި ކުޅޭ އިރު، ނިއު ހުއްޓުވަން އުނދަގޫވާނެ ކަމަށެވެ. އަދި އެކަމަށް ކުޅުންތެރިންނަށް ފުރިހަމައަށް އަބަދުވެސް އިތުބާރުކުރާ ކަމަށެވެ.
ނިއުގެ އެޓޭކްގެ ވަރުގަދަކަން ފާހަގަކުރަމުން އޮސްކާ ބުނީ ހަމައެކަނި މާޔޫސްވަނީ ޑިފެންސާ ދޭތެރޭގައި ކަމަށާއި، އެކަން ރަނގަޅުކުރަން ވިސްނާނެ ކަމަށެވެ.
"ޑިފެންސަކީ ހަމައެކަނި އޮތް މާޔޫސްކަން. ފޯވަޑް އޮތީ ރަނގަޅަށް ސެޓް ވެފައި. އެއީ ކޮންމެ މެޗެއްގައިވެސް ގާތް ގަނޑަކަށް ދެ ގޯލް ވަރު ޖަހަމުން މިދަނީ. އެކަމަކު ފަހަތަށް ސަމާލުވާން އެބަ ޖެހޭ. އަދި މި ސީޒަންގައި ލިބުނީ ހަތަރު ކްލީން ޝީޓް. އެބަ ޖެހޭ ވަރަށް ރަނގަޅު ކުރަން. އިދިކޮޅު ޓީމުން ނިއު ބޭނުންވާ ގޮތަށް ކުޅެމުން ގޮސް ލިބޭ މަދު ފުރުސަތަކުން ގޯލް ޖަހަނީ،" އޮސްކާ ބުންޏެވެ.
ނިއުއިިން ފުރަތަމަ ބުރުގައި ވިކްޓަރީއާ ދެކޮޅަށް ކުޅުނު މެޗުގައި ވިކްޓަރީގެ ދެ ގޯލްވެސް ޖެހީ ކައުންޓާ އެޓޭކްގައެވެ. އެ ދެގޯލުންވެސް ނިއުގެ ޑިފެންސްގެ މައްސަލަ ފާހަގަކުރެވުނެވެ.
ނިއުއާއި ވިކްޓަރީންވެސް މި ބުރުގައި ފުރަތަމަ ކުޅުނު މެޗު ކާމިޔާބުކޮށްފައިވާ އިރު، އެ ދެޓީމު މިރޭ ކުޅުނު ފަށާނީ 9:00 ގައެވެ.