17 May 2018, 10:40
ވަން ޕްލަސްގެ އެންމެ ފަހުގެ މޮޑެލް، ވަން ޕްލަސް 6 ލޯންޗް ކޮށްފިއެވެ.
ރޭ ލަންޑަންގައި ބޭއްވި ހަފްލާއެއްގައި މި ފޯނު ލޯންޗުކޮށްފައިވާއިރު، މި ފޯނު އާންމުކޮށް ވިއްކަން ފަށާނީ މި މަހުގެ 22 އިން ފެށިގެންނެވެ.
މި ފޯނުގައި ހިމަނާފައިވަނީ 6.3 އިންޗީގެ 19:9 އޯލެޑް ޑިސްޕްލޭއެކެވެ. ފޯނުގައި ނޯޗް އެއް ހިމަނާފައިވާއިރު، މި ފޯނު ގޫގުލްގެ ޕިކްސެލް 2 އެސްއެލް އާ ވައްތަރުކަމަށް ބައެއް މީހުން ބުނެއެވެ.
މިއީ އެންޑްރޮއިޑް ޕީ ބީޓާ ސަޕޯޓްކުރާނެ ފޯނެކެވެ. ފޯނުގެ އަގަށް ބަލާއިރު 6 ޖީބީގެ ރެމްއަކާއެކު 64 ޖީބީގެ ފޯނުގެ އަގު އުޅެނީ 529 ޑޮލަރުގައެވެ. މިއީ ވަންޕްލަސް ފެށިގެން އައިއިރު އެ ކުންފުނީގެ ފޯނުތައް ހުރި އަގާ އަޅާބަލާއިރު ބޮޑު އަގެއް ނަމަވެސް، ކުންފުނީގެ ވާދަވެރިންގެ ފޯނުތަކާއި، މި ކޮލެޓީގެ ފޯނުތަކާ އަޅާ ބަލާއިރު ހެޔޮ އަގެކެވެ.
128 ޖީބީގެ ފޯނު އުޅެނީ 575 ޑޮލަރުގައެވެ. އަދި 256 ޖީބީގެ ފޯނު އުޅެނީ 629 ޑޮލަރަށެވެ.
ސްނެޕް ޑްރެގަން 845 ޕްރޮސެސާއަކާއި އެޑްރީނޯ 630 ގްރެފިކްސް، 8 ޖީބީގެ ރެމް ހިމެނޭ މި ފޯނުގެ ސްޓޯރޭޖް 256 ޖީބީ އާ ހަމައަށް ބޮޑުކޮށްލެވެއެވެ.
ވަންޕްލަސް 6
ހެޑްފޯން ޖެކްވެސް ހިމެނޭ މި ފޯނު ފާސްޓް ޗާޖް ކުރެވޭނެއެވެ. ކެމެރާ އަށް ބަލާއިރު ހިމެނެނީ 16+20 މެގަ ޕިކްސެލްގެ ޑުއަލް ކެމެރާ އެކެވެ. ފްރަން ކެމެރާ އަކީވެސް 16 މެގަ ޕިކްސެެލްގެ ކެމެރާއެކެވެ.
ފޯނު ގަންނައިރު ފޯނުގެ ބެކް ޕްރޮޓެކްޓުކުރާނެ ކޭސްއެއްވެސް ހިމަނާފައިވެއެވެ. މި ފޯނުގައި ފިންގާ ޕްރިންޓުގެ އިތުރުން ފޭސް އަންލޮކް ފީޗާވެސް ހިމެނެއެވެ.