27 May 2018, 14:33
މޯލްޑިވިއަންގެ ބޯޓެއްގެ ކެބިން ކުރޫއިންނާ ޒުވާބު ކުރި ފަސް މީހަކު ހަ މަސް ވަންދެން އެ އެއާލައިނުގެ ބޯޓުން ދަތުރު ނުކުރުމަށް ކޯޓުން ހުކުމް ކޮށްފި އެވެ.
ލ. ކައްދޫއަށް ދަތުރުކުރި ބޯޓެއްގައި އެ ހާދިސާ ހިނގާފައި ވަނީ މިދިޔަ ހުކުރު ދުވަހު އެވެ. މައްސަލާގައި ފަސް މީހަކު ފުލުހުން ހައްޔަރުކޮށް ބަންދު މުއްދަތު މަޖިލީހަށް ހާޒިރު ކުރީ ލ. ފޮނަދޫ މެޖިސްޓްރޭޓް ކޯޓަށެވެ.
ކޯޓުން ޝާރުތުތަކެއްކޮށް އެ މީހުން ވަނީ ދޫކޮށްލައިފަ އެވެ. ޝަރުތުތަކަކީ މޯލްޑިވިއަންގެ ބޯޓަކުން ހަ މަސް ވަންދެން ދަތުރު ނުކުރުމާއި ފުލުހުންގެ ތަހުގީގަށް އެއްބާރުލުން ދިނުމެވެ.
ލ. ކައްދޫއަށް ދަތުރުތައް ކުރާ ހަމައެކަނި އެއާލައިނަކީ މޯލްޑިވިއަންނެވެ.
އެ ބޯޓުގައި ޒުވާބު ހިނގި އިރު އިން މީހަކު 'ސަން' އަށް ބުނީ ކެބިން ކުރޫއިންނާ އެމީހުން ޒުވާބު ކުރީ ރޯދަ ވީއްލަން ދިނުން ލަސްކުރީ ކަމަށް ބުނެ ކަމަށެވެ. މާލޭގައި ބަންގި ގޮވާ ގަޑިއަށް ވުރެ ފަސް މިނެޓް ފަހުން ރޯދަ ވީއްލަން ދިން ކަމަށް ބުނެ ބޯޓުގައި ވަރަށް އަޑުގަދަ ކޮށް ޒުވާބު ކުރި ކަމަށް އެމީހާ ބުންޏެވެ.
މޯލްޑިވިއަންގެ މީޑިއާ އޮފިޝަލް ވިދާޅުވީ އެ މައްސަލަ އެއާލައިންނުން ވެސް ބަލަމުން އަންނަ ކަމަށެވެ.
'ސަން' އަށް އެނގިފައިވާ ގޮތުން ހައްޔަރުކޮށްފައި ވަނީ ލ. ގަމުގެ ހަތަރު މީހަކާއި ލ. ކުނަހަންދޫއަށް ނިސްބަތްވާ އެކަކު އެވެ.
ފުލުހުން ބުނީ ކެބިން ކުރޫއިންނާ ޒުވާބު ކުރި މައްސަލައެއްގައި ފަސް މީހެއްގެ މައްސަލަ ބަލަމުންދާ ކަމަށެވެ.