21 Jun 2018, 19:02
ރާއްޖޭގައި ފުޅާ ދާއިރާއެއްގައި ރީ ބްރޯޑްކާސްޓް ކުރުމުގެ ޚިދުމަތް ދެމުން އަންނަ މީޑިއާ ނެޓް 52،000 ރުފިޔާއިން ޖޫރިމަނާ ކޮށްފިއެވެ.
ބްރޯޑްކާސްޓިން ކޮމިޝަނުން މިއަދު ނިންމި ނިންމުމުގައި ބުނެފައިވަނީ މީޑިއާނެޓް ޖޫރިމަނާ ކޮށްފައިވަނީ ކޮމިޝަނުން ފާސްކޮށްދީފައިވާ "މީޑިއާ ނެޓް ހިޓްސް ޕެކޭޖް” ގައި ހިމެނޭ އަސާސީ ޕެކޭޖަށް ތިން ފަހަރެއްގެ މަތިން މީޑީއާ ނެޓުން ކޮމިޝަނަށް އެންގުމަކާ ނުލައި އުނިއިތުރު ގެނެސްފައިވާކަން ކޮމިޝަނުގެ ތަހުގީގަށް ސާބިތުވާތީއާއި މީޑިއާ ނެޓަށް ބްރޯޑްކާސްޓް ކުރުމުގެ ހުއްދަ ލިބިފައި ނުވާ 23 ޗެނަލެއް ހިޓްސް ޕެކޭޖްފގައި ހިމަނައިގެން ބްރޯޑްކާސްޓް ކޮށްފައިވާތީ ކަމަށެވެ.
މީޑިއާނެޓް ޖޫރިމަނާ ކޮށްފައިވަނީ ހިޓްސް ޕެކޭޖަށް ބަދަލުގެނެސްފައިވާ ތިން ފަހަރަށް ކޮންމެ ފަހަރަކަށް 2000 ރުފިޔާ އަދި ބްރޯޑްކާސްޓް ކުރުމުގެ ހައްގު ނުހޯދައި ދައްކާފައިވާ 23 ޗެނަލުންކުރެ ކޮންމެ ޗެނަލަކަށް 2,000 ރުފިޔާގެ މަގުންނެވެ.
ޖޫރިމަނާގެ ފައިސާ ކުރިއަށް އޮތް 30 ދުވަހުގެ ތެރޭގައި ދައްކައި ޚަލާސްކުރުމަށް ބްރޯޑްކާސްޓިން ކޮމިޝަނުން ވަނީ އަންގާފައެވެ.
ކޮމިޝަނުން ފާސްކޮށްފައިވާ ޕެކޭޖަށް އުނިއިތުރުގެންނަމަ، އެ ކަން ކޮމިޝަނަށް އެންގުމަށް ބްރޯޑްކާސްޓިން ކޮމިޝަނުން ވަނީ މީޑިއާ ނެޓަށް އަންގާފައެވެ.
ރީބްރޯޑްކާސްޓްކުރުމުގެ ހައްގު ލިބިފައިނުވާ ޗެނަލްތައް ދެއްކުން ވަގުތުން ހުއްޓާލުމަށާއި، ބްރޯޑްކާސްޓްކުރުމުގެ ގާނޫނާއި ރީބްރޯޑްކާސްޓްކުރުމުގެ ގަވާއިދާ އެއްގޮތަށް އަމަލުކުރުމަށް ވެސް މީޑިއާ ނެޓަށް ބްރޯޑްކާސްޓިން ކޮމިޝަނުންވަނީ އަންގާފައެވެ.