28 Jun 2018, 13:36
ފީފާ ވޯލްޑް ކަޕްގެ ގްރޫޕް ސްޓޭޖުގެ ފަހު މެޗުތައް ކުރިއަށްދާ އިރު، މިރޭ އޮންނާނީ ގްރޫޕް ޖީގެ ދެމެޗެވެ.
އެ ގްރޫޕުން ގަދަ 16އަށްދާ ދެ ޓީމު ވެސް ޔަގީންވެފައިވާ އިރު، މިރޭ އިންގްލެންޑާ ބެލްޖިއަމް ވާދަކުރާ މެޗަކީ ގްރޫޕްގެ އެއްވަނަ ޔަގީން ވާނެ މެޗެކެވެ.
މިރޭގެ މެޗަށް ދެޓީމުން ވެސް މުހިއްމު ބައެއް ކުޅުންތެރިންނަށް ރެސްޓް ދޭނެ ކަމަށް މީޑިއާތަކުގައި ބުނެފައިވާ އިރު، އިންގްލެންޑް ކޯޗު ގެރެތު ސައުތުގޭޓް ބުނެފައި ވަނީ އޭނާގެ ޓީމުން ފޯކަސް ކުރާނީ މޮޅުވުމުގެ ސިލްސިލާ ދެމެހެއްޓުމަށް ކަމަށެވެ.
"ބޭނުން ވަނީ މޮޅުވުމުގެ ސިލްސިލާ ދަމަހައްޓަން. ޓީމުގެ ހުރިހާ ކުޅުންތެރިން ވެސް ވިސްނުން ހުންނަން ވާނީ މޮޅުވަން. މި މެޗު ވަރަސް މުހިއްމު، ވޯލްޑް ކަޕްގެ ނޮކްއައުޓް ސްޓޭޖުގައި ކުރިއަށް ދިއުމަށް މިއަދުގެ މެޗު އެހީތެރިވާނެ،" ސައުތުގޭޓް ބުންޏެވެ.
އިންގްލެންޑުން އެންމެ ފަހުން ބޮޑު މުބާރާތެއްގެ ނޮކްއައުޓް މެޗަކުން މޮޅުވެފައި ވަނީ 2006 ވަނަ އަހަރު ވޯލްޑް ކަޕްގަ އެވެ. ހާއްސަކޮށް އޭގެ ފަހުން އިންގްލެންޑް ފާހަގަކޮށްލެވެނީ ވަރުގަދަ ޓީމުތަކާ ދެކޮޅަށް ނަތީޖާ ނެރުމަށް އުނދަގޫތަކަކާ ކުރިމަތިވާ ޓީމެއްގެ ގޮތުގަ އެވެ.
"ވޯލްޑް ކަޕް 2006ގެ ފަހުން އިންގްލެންޑަށް ނެތް ނޮކްއައުޓް މެޗަކުން މޮޅުވެވިފައެއް. އެހެންވީމަ މިފަހަރު މިއީ އަހަރެމެން އެ ހުރަސް ކަޑައްތު ކުރާ ފަހަރަށް ހަދަން ބޭނުން ވަނީ. ފަސޭހަ ޓީމަކީ ކޮން ޓީމެއްތޯ ބަލާ އެޓީމުތައް ބަލިކުރަން އުޅުމުގެ ބަދަލުގައި ވަރުގަދަ ޓީމުތައް ބަލިކޮށްގެން ނަތީޖާ ނެރެވޭނީ،" ސައުތުގޭޓް ބުންޏެވެ.
އިންގްލެންޑަށް ގްރޫޕް ސްޓޭޖުގައި ފަސޭހަ ޓީމުތައް ލައްވާލި އިރު، މިފަހަރު ވޯލްޑް ކަޕްގައި އެޓީމުގެ ފުރަތަމަ ޓެސްޓަކަށް ވާނީ މިރޭ ބެލްޖިއަމްއާ ދެކޮޅަށް ކުޅޭ މެޗެވެ.