01 Jul 2018, 00:39
ދިރާގު ދިވެހި ޕްރިމިއާ ލީގުގައި އަލަށް ވާދަކުރަމުންދާ ބ. ފެހެންދޫން ދިވެހި ފުޓްބޯޅައިގެ ތާރީހީ ކްލަބު، ވިކްޓަރީ ސްޕޯޓްސް ކްލަބު ހިފަހައްޓައިފިއެވެ.
ގައުމީ ފުޓްބޯޅަ ދަނޑުގައި މިރޭ ފެހެންދުއާއި ވިކްޓަރީ ބައްދަލުކުރި މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ފެހެންދޫއަކީ މިނިވަން ޗެމްޕިއަންޝިޕްގެ ގަދަ ހަތަރެއްގައި ހިމެނި، ޕްރިމިއާ ލީގުން ޖާގަ ހޯދި ޓީމެކެވެ. އަދި ވިކްޓަރީއަކީ މާލޭ ލީގުގެ ފަސްވަނައިގައި ނިންމާލި ޓީމެވެ.
ދިރާގު ދިވެހި ޕްރިމިއާ ލީގުގައި ވިކްޓަރީއާއި ބ. ފެހެންދޫ ބައްދަލުކުރި މެޗުގެ ތެރެއިން: އެ މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން --- ސަން ފޮޓޯ/ މުހައްމަދު އަފްރާހް
މިރޭ ކުޅުނު މެޗުގެ ފުރަތަމަ ހާފުގައި ވިކްޓަރީން ވަނީ ފެހެންދޫގެ ގޯލަށް ނުރައްކާކޮށްފައެވެ. އެގޮތުން ވިކްޓަރީގެ ބިދޭސީ ކުޅުންތެރިޔާ ސިމޯން ޓިބޯއަށް ލިބުނު ދެ ފުރުސަތެއް ފާހަގަކޮށްލެވެއެވެ. އޭނާ ފޮނުވާލި ފުރަތަމަ ހަމަލާ ފެހެންދޫގެ ގޯލާ އަމާޒުވެފައިނުވާ އިރު، ދެވަނަ ހަމަލާގެ ހުރަހަކަށްވީ މެޗުގެ މޮޅު ކުޅުންތެރިޔާގެ މަގާމަށް ހޮވުނު ފެހެންދޫގެ ކީޕަރު އިބްރާހިމް ޒަޔާނެވެ.
މެޗުގެ ދެވަނަ ހާފު ވެސް ވިކްޓަރީން ފެށީ ވަރުގަދަ ކުޅުމަކާއެކުއެވެ. އެގޮތުން ދެވަނަ ހާފުގެ ކުރީކޮޅުގައި ވިކްޓަރީއަށް ލިބުނު ދެ ފުރުސަތެއް ފާހަގަކޮށްލެވެއެވެ. އާދަމް އިޝާމް ނަގައިދިން ހުރަހަކުން އަހްމަދު ރަޝީދު ބޮލުން ފޮނުވާލި ހަމަލާ ފެހެންދޫގެ ގޯލާ އަމާޒުވެފައިނުވާ އިރު، އިޝާމް ދިން ބޯޅައަކުން ސިމޯން ފޮނުވާލި ހަމަލާ ފެހެންދޫގެ ކީޕަރު ޒަޔާން ވަނީ ދިފާއުކޮށްފައެވެ.
ދިރާގު ދިވެހި ޕްރިމިއާ ލީގުގައި ވިކްޓަރީއާއި ބ. ފެހެންދޫ ބައްދަލުކުރި މެޗުގެ ތެރެއިން: އެ މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން --- ސަން ފޮޓޯ/ މުހައްމަދު އަފްރާހް
ދެވަނަ ހާފުގެ ނިމެނިކޮށް ވެސް ވިކްޓަރީއަށް ލަނޑުޖަހާނެ ގިނަ ފުރުސަތުތަކެއް ލިބިގެންދިޔައެވެ. ނަމަވެސް ވިކްޓަރީގެ ހުސައިން ނިހާނާއި، ޗަކަލޯވް ފިރްދޯސްއާއި، ސިމޯންއަށް ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.
ދިވެހި ޕްރިމިއާ ލީގުގެ މެޗެއް ދެން ކުޅުމަށް ހަމަޖެހިފައިވަނީ އަންނަ އަންގާރަ ދުވަހުއެވެ. އަންގާރަ ދުވަހުގެ ހަވީރު 4:00ގައި ކުޅޭ މެޗުގައި އެންމެ ފަހުގެ ޗެމްޕިއަން ނިއު ރޭޑިއަންޓް ސްޕޯޓްސް ކްލަބާއި ކްލަބު އީގަލްސް ބައްދަލުކުރާ އިރު، އެ ދުވަހުގެ ރޭ 9:00ގައި ކުޅޭ މެޗުގައި ބައްދަލުކުރާނީ މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި ފ. ނިލަންދޫއެވެ.