01 Jul 2018, 08:48
ދެހާސް ފަނަރަ ވަނަ އަހަރު ރިލީޒްކުރި ކާމިޔާބު ފިލްމު 'މަސާން' އިން ބެލުންތެރިންގެ މަގުބޫލުކަން ހޯދި ބަތަލާ ޝްވެތާ ތުރިޕަތީ އާއި އޭނާގެ ލޯބިވެރިޔާ ޗައިތަންޔާ ޝަރްމާ، ކައިވެނިކޮށްފިއެވެ.
ދެމީހުން ކައިވެނިކޮށްފައި ވަނީ މިދިޔަ ހުކުރު ދުވަހު، ގޯއާގެ ބީޗް ރިސޯޓެއްގައެވެ.
ކައިވެނި ހަފްލާގައި ބައިވެރިވެފައި ވަނީ ދެފަރާތުގެ އާއިލާ އާއި ގާތް އެކުވެރިން އެކަންޏެވެ.
ކައިވެންޏަށް ފަހު މީޑިއާ އާ ވާހަކަ ދައްކަމުން ޝްވެތާ ބުނީ، އެ ދުވަހަކަށް އޭނާ އިންތިޒާރު ކުރާތާ ވަރަށް ގިނަ ދުވަސް ވެފައިވާ ކަމަށާއި، ވަރަށް ބޮޑަށް އުފަލުން ހުރި ކަމަށެވެ.
ޝްވެތާ ބުނީ ހަފްތާއެއް ފަހުން، އޭނާ މަސައްކަތް ކުރަމުން އަންނަ ވެބް ސީރީޒް "ދަ ޓްރިޕް" ގެ ދެވަނަ ސީޒަންގެ ޝޫޓިން ފެށުމަށް ހަމަޖެހިފައިވާ ކަމަށާއި، އެހެންކަމުން ހަނީމޫން ފަސްކޮށްލަން ޖެހިފައިވާ ކަމަށެވެ.
ނަމަވެސް ސީރީޒްގެ މަސައްކަތް ނިމުނުހާ އަވަހަކަށް ދެމީހުން ހަނީމޫނަށް ފުރުމަށް ވަނީ ނިންމައިފައެވެ.
ޝްވެތާ އާއި ޗައިތަންޔާ ފުރަތަމަ ދިމާވީ މީގެ ފަސް އަހަރު ކުރިން ފްލައިޓަކުންނެވެ.
އާންމުންނަށް ޝްވެތާ ފުރަތަމަ ފާހަގަވީ ފިލްމު 'މަސާން' އިން ނަމަވެސް އޭނާ އެންމެ ފުރަތަމަ ކުޅުނު ފިލްމަކީ 'ހަރާމްކޯރް' އެވެ.
ނަވާޒުއްދީން ސިއްދީގީ އާއެކު ފެނިގެން ދިޔަ އެ ފިލްމަށް ދިމާވި ބައެއް މައްސަލަތަކުގެ ސަބަބުން ފިލްމު ރިލީޒް ކުރުން ފަސްވީއެވެ. ދެ ފިލްމުން ވެސް ޝްވެތާއަށް ވަނީ ބެލުންތެރިންނާއި ކްރިޓީކުންގެ ވަރަށް ބޮޑު ތަރުހީބެއް ލިބިގެން ގޮސްފައެވެ. އަދި ދެ ފިލްމުން އޭނާ އަށް އެވޯޑު ވެސް ވަނީ ލިބިފައެވެ.
ފިލްމުގެ އިތުރުން ޝްވެތާ ވަނީ ވެބް ސީރީޒް ތަކުގައި ވެސް މަސައްކަތް ކޮށްފައެވެ.