06 Jul 2018, 16:05
ތައިލޭންޑްގެ ހޮހޮޅައެއްގެ ތެރޭގައި ތާށިވެފައި ތިބި 12 ކުދިންގެ މައްޗަށް އެކުލެވޭ ފުޓްބޯޅަ ޓީމަކާއި އެކުދީންގެ ކޯޗު ސަލާމަތްކުރުމަށް މިހާރު ކުރިއަށް ގެންދާ އޮޕަރޭޝަނުގައި ހަރަކާތްތެރިވި ޑައިވަރަކު މަރުވެ، ހާސްކަން އިތުރުވެއްޖެއެވެ.
ރިޕޯޓުތައް ބުނާގޮތުން، ޗިއަންގ ރާއީ ޕްރޮވިންސްގެ ތަމް ލުއަންގ ނަންގ ނޮން ހޮހޮޅައިގެ ތެރޭގައި ތާށިވެފައި ތިބި ކުދީންނަށް އޮކްސިޖަން ފޯރުކޮށްދިނުމުގައި މަސައްކަތްކުރަމުން ދިޔަ، ތައި ނޭވީގެ ކުރީގެ ޑައިވަރަކު ވަނީ ފެނުއަޑީގައި މިއަދު މަރުވެފައެވެ.
މޫސުން އަދިވެސް އިތުރަށް ގޯސްވަމުން ދާއިރު، މިހާރު އެކުދީން އެތަނުން ސަލާމަތުން ނެރެން، ވަގުތު ކުޑަތަންވަމުން ދާކަމަށްވެސް ތައިލޭންޑުގެ ކަމާގުޅޭ އިދާރާތަކުން ދަނީ ބުނަމުންނެނެވެ.
"ހާލަތު އިތުރަށް ގޯސްވަމުންދާ މި ދަނޑިވަޅުގައި، ކަންކަން ހަމައަކަށް އެޅެންދެން މަޑުކުރެވޭކަށް ނެތް،" މިއަދު ބޭއްވި ނޫސް ކޮންފަރެންސެއްގައި ތައި ނޭވީގެ ކޮމާންޑަރު އަރްޕަކޯން ޔޫކޮންކޭވް ވިދާޅުވިއެވެ.
"ކުރީން އަހަރެމެން އުންމީދުކޮށްގެން ތިބީ، އެކުދީންނަށް ހޮހޮޅަ ތެރޭގައި ދުވަސްކޮޅެއް ވަންދެން ސަލާމަތުން ތިބެވޭނޭ ކަމަށް. އެކަމަކު ހާލަތު މިހާރު ބަދަލުވެއްޖެ. އަހަރެމެންނަށް އޮތީ ކުޑަ ވަގުތުކޮޅެއް."
ކުދީން ސަލާމަތްކުރުމުގެ ބޮޑު އޮޕަރޭޝަނުގައި ރެއާ ދުވާލު ބައިނަލްއަގްވާމީ ބޮޑު ޓީމަކުން ހަރަކާތްތެރި ވަމުން ދާއިރު، ހޮހޮޅައިގެ އެތެރޭގައި އޮކްސިޖަން ލެވެލް، ވަރަށް ހަލުއިކަމާއެކު ދަށަށްދާ ކަމަށް ރިޕޯޓުތައް ބުނެއެވެ. އަދި ޑަވަރުން ދަނީ، ހޮހޮޅަ ތެރެއަށް އޮކްސިޖަން ކެނިސްޓަރ ފޯރުކޮށްދީގެން އޮކްސިޖަން ލެވެލް މަތިކުރުމަށް ކަމަށްވެސް ރިޕޯޓުތައް ބުނެއެވެ.
ސީނިއަރ އާމީން ކޮމާންޑަރ މޭޖަރ ޖެނެރަލް ޗަލޯންގޗާއީ ޗައްޔަކަމް ވިދާޅުވީ، މިހާރު އެންމެ ބޮޑަށް އިސްކަންދީގެން ކުރަމުން ދާ މަސައްކަތަކީ، ހޮހޮޅައިގެ ތެރޭގައި ތާށިވެފައި ތިބި ކުދިންނާ ހަމައަށް އޮކްސިޖަން ހޮޅިއެއް އެޅުން ކަމަށެވެ. އޮކްސިޖަނާއެކު ބޭސްވެސް ފޯރުކޮށްދިނުމަށް މަސައްކަތް ކުރަމުން ދާއިރު، އެ ހޮޅިއާއެކު ޓެލެފޯނު ލައިނެއްވެސް އެޅުމަށް މަސައްކަތްކުރަމުން ދާކަމަށް އޭނާ ވިދާޅުވިއެވެ.
އުމުތުން 11 އަހަރާ 16 އަހަރާ ދެމެދުގެ 12 ކުދިންނާއި އެކުދިންގެ އުމުރުން 25 އަހަރުގެ ކޯޗު އެ ހޮހޮޅައިގައި ތާށިވީ، ޖޫން 23 ވަނަ ދުވަހު ފުޓްބޯޅަ މެޗަކަށް ފަހު، ހޮހޮޅަ ބަލައިލާން ގޮސް ތިއްބައި، ބޯކޮށް ވާރޭވެހި ފެންބޮޑުވުމުގެ ސަބަބުން ހޮހޮޅައިން ނުކުންނަން އޮންނަ މަގުތައް ބަންދުވުމާ ގުޅިގެންނެވެ.
ތައިލޭންޑްގެ ކަމާގުޅޭ ދާއިރާތަކުން އެ ހޮހޮޅައިގެ ފެންގަނޑު ތިރިކުރުމަށް ޕަމްޕު ބޭނުންކޮށްގެން މަސައްކަތް ކުރަމުން ދިޔަ ނަމަވެސް، މޫސުން އިތުރަށް ގޯސްވެ، ބޯކޮށް ވާރޭ ވެހުމާ ގުޅިގެން މިހާރު އަނެއްކާވެސް އޮޕަރޭޝަނަށް ވަނީ ވަރަށް ބޮޑަށް ހުރަސްއެޅިފައެވެ. އަދި، އެގޮތަށް ފެންގަނޑު އުފުލެމުން ދާނަމަ، ހޮހޮޅަތެރޭގައި ތިބިކުދީންނާ ހަމައަށް ފެންގަނޑު އުފުލި، އެކުދީން ސަލާމަތްކުރުމަށް ވަރަށް ބޮޑު ހުރަހަކަށް ވެދާނޭކަމުގެ ބިރު އޮތްކަމަށެވެ.
މިއަދު، ޑައިވަރަކު މަރުވުމާ ގުޅިގެން މި އޮޕަރޭޝަންގެ ނުރައްކާތެރިކަން ބޮޑު ވެފައި ވާއިރު، ކޭވް ރެސްކިއު އެކްސްޕާޓުން ބުނަމުން ދަނީ، އެންމެ ރައްކާތެރި ގޮތަކީ، އެކުދީންނާ ހަމައަށް، ބޭހާއި، ކާނާ އަދި އޮކްސިޖަން ފޯރުކޮށްދީގެން، ފެންގަނޑު ހިނދެންދެން އެކުދީން އެތެރޭގައި ބޭތިއްބުން ކަމަށެވެ. ނަމަވެސް ތައިލޭންޑުގެ މޫސުން އޮންނަ ގޮތުން، އެގޮތަށް އެންމެ އަވަހަށްވެސް މޫސުން ރަނގަޅުވާނޭ ކަމަށް ބެލެވެނީ، އޮކްޓޫބަރު ހިސާބުގައި ކަމަށް ވާތީ، ރަނގަޅަށް އޮކްސިޖަން ނުލިބި އެފަދަ ތަނެއްގެ ތެރޭގައި ތިބުމަކީ އެކުދީންގެ ފުރާނައަށް ނުރައްކާ ވާނޭ ކަމެއް ކަމަށްވެސް ތަޖްރިބާކާރުން ބުނެއެވެ.
ތައި ނޭވީގެ ކޮމާންޑަރު އަރްޕަކޯން ވިދާޅުވީ، އެކުދީން ސަލާމަތްކުރުމަށް ކުރަމުންދާ މަސައްކަތް، ކިތަންމެ ދަތިހާލެއްގައި ވެސް ހުއްޓާ ނުލައި ކުރިއަށް ގެންދާނޭ ކަމަށާއި، އަދި އޮޕަރޭޝަން ނިންމާލާނީ، ކުދީން އެތަނުން ނެރުމަށް ފަހު ކަމަށެވެ.