08 Jul 2018, 12:12
ފީފާ ވޯލްޑް ކަޕެއްގެ ސެމީ ފައިނަލަށް އިންގްލެންޑް ދަތުރުކުރުމަކީ އާންމުކަމެއް ނޫން ކަމަށާއި މިވަގުތަކީ މުޅި ގައުމު އުފާ ފާޅުކުރަންވި ވަގުތު ކަމަށް ކޯޗު ގެރެތު ސައުތުގޭޓް ބުނެފި އެވެ.
ރޭ ކުޅުނު ކުއާޓާ ފައިނަލް މެޗުގައި އިންގްލެންޑުން ސްވިޑަން ބަލިކޮށްފައި ވަނީ 2-0ގެ ނަތީޖާއަކުންނެވެ. މެޗުން މޮޅުވެ އިންގްލެންޑުން ވަނީ 28 އަހަރަށް ފަހު ވޯލްޑް ކަޕެއްގެ ސެމީ ފައިނަލްގެ ފުރުސަތު ހޯދައިފަ އެވެ.
ރޭގެ މެޗަށް ނުކުތުމުގެ ކުރިން އިންގްލެންޑުން އެންމެ ފަހުން ސެމީ ފައިނަލަށް ދަތުރުކޮށްފައި ވަނީ 1990 ވަނަ އަހަރު އިޓަލީގައި ކުޅުނު ވޯލްޑް ކަޕްގަ އެވެ. އެ މުބާރާތް އިންގްލެންޑުން ނިންމާލީ ހަތަރު ވަނަ ޓީމުގެ ގޮތުގަ އެވެ.
އިންގްލެންޑުން އަމިއްލަ ގައުމުގައި 1966 ބޭއްވި ވޯލްޑް ކަޕް ކާމިޔާބުކުރި އިރު، ދެން ސެމީއަށް ދަތުރުކުރީ 1990 ވަނަ އަހަރުގަ އެވެ. އޭގެ ފަހުން 1994 ވަނަ އަހަރު އެމެރިކާގައި އޮތް މުބާރާތަށް އެގައުމު ކޮލިފައިވެފައި ނުވާ އިރު، 1998 ވަނަ އަހަރު ފްރާންސްގައި ބޭއްވި ވޯލްޑް ކަޕުން އިންގްލެންޑް ބޭރުވީ ގަދަ 16އިންނެވެ.
އޭގެ ފަހުން 2002 ވަނަ އަހަރާއި 2006 ވަނަ އަހަރުގެ ވޯލްޑް ކަޕް ކުއާޓާ ފައިނަލާ ހަމައަށް އިންގްލެންޑް ދަތުރުކުރި އިރު، 2010 ވަނަ އަހަރުގެ ވޯލްޑް ކަޕުން އިންގްލެންޑް ކެޓީ ގަދަ 16އިންނެވެ. އަދި އެންމެފަހުން ބްރެޒިލްގެ ވޯލްޑް ކަޕުން އިންގްލެންޑް ކެޓީ ގްރޫޕް ސްޓޭޖުންނެވެ.
ވޯލްޑް ކަޕްގެ ހިތި ތަޖުރިބާތަކަކަށް ފަހު އިންގްލެންޑަށް އަނެއްކާ ވެސް ވޯލްޑް ކަޕް އުފުލާލެވޭނެ ކަމުގެ އުންމީދު އާވެފައިވާ އިރު، ރޭގެ މެޗަށް ފަހު ސައުތުގޭޓް ބުނީ ބުނެދޭން ނޭނގޭވަރުގެ އުފާވެރި އިހުސާސްތަކެއް ކުރެވޭ ކަމަށެވެ.
"އަހަރެންގެ އިހުސާސް ބުނެދޭން ވެސް ނޭނގެ. އުފޭވެރިކަމުގެ ތަފާތު އިހުސާސެއް ކުރެވެނޭ. އަހަރެން ބޭނުން މުޅި އިންގްލެންޑްގެ ހުރިހާ ރަތްޔިތުން މިކަމާ އުފާކުރަން. އާންމުކޮށް ވާ ކަމެއް ނޫން ވޯލްޑް ކަޕްގެ ސެމީ ފައިނަލަށް އިންގްލެންޑް ދިއުމަކީ،" ރޭގެ މެޗަށް ފަހު ސައުތުގޭޓް ބުންޏެވެ.
ސައުތުގޭޓް ބުނީ ރޭގެ މެޗަށް ނުކުތް އިރު ސްވިޑެންގެ ކުޅުމުގެ ސްޓައިލަށް ވަރަށް ބޮޑަށް ވިސްނި ކަމަށެވެ. ހާއްސަކޮށް އެޓީމުގެ ޑިފެންސް ފޫއަޅުވާލަން އުނދަގޫވާނެ ކަން އެނގޭ ކަމަށާއި ރޭގެ މެޗަށް ނުކުތީ އެކަމަށް ވަރަށް ބޮޑަށް ތައްޔާރުވެގެން ކަމަށް ވެސް ސައުތުގޭޓް ބުންޏެވެ.